കോട്ടയം: ചലച്ചിത്ര ശാഖയ്ക്ക് പകരംവെക്കാനില്ലാത്ത സംഭാവനകൾ നൽകിയ അതുല്യ സംവിധായകൻ ജി. അരവിന്ദന്റെ ഓർമ്മയ്ക്കായി തമ്പ് ഫിലിം സൊസൈറ്റിയുടെ ആഭിമുഖ്യത്തിൽ സംഘടിപ്പിക്കുന്ന രണ്ടാമത് ‘അരവിന്ദം നാഷണൽ ഷോർട്ട് ഫിലിം ഫെസ്റ്റിവൽ 2027’-ന്റെ പോസ്റ്റർ പ്രകാശനം പ്രശസ്ത നടൻ വിജയരാഘവൻ നിർവ്വഹിച്ചു. 2027 മാർച്ച് 13, 14, 15 തീയതികളിൽ കോട്ടയത്തു വെച്ചാണ് മേള അരങ്ങേറുന്നത്. ചടങ്ങിൽ ആർ. സാനു, അഡ്വ. അനിൽ ഐക്കര, ശ്രീകുമാർ ജി, സാജൻ, സൂരജ് മുതുകാട്ട്, ശ്രീകുമാർ, നന്ദഗോപൻ, ആദിശേഷൻ, രൂപേഷ് സി.ബി, മനു മറ്റക്കര തുടങ്ങിയ സാംസ്കാരിക-സിനിമാ രംഗത്തെ പ്രമുഖർ പങ്കെടുത്തു.
ചലച്ചിത്ര മേളയിലേക്കുള്ള ഹ്രസ്വചിത്രങ്ങളുടെയും ഡോക്യുമെന്ററികളുടെയും എൻട്രികൾ സമർപ്പിക്കാനുള്ള തീയതികൾ ഔദ്യോഗികമായി പ്രഖ്യാപിച്ചു. 2026 നവംബർ 10 മുതൽ 2027 ജനുവരി 10 വരെ ചിത്രങ്ങൾ സമർപ്പിക്കാം. 40 മിനിറ്റോ അതിൽ താഴെയോ ദൈർഘ്യമുള്ള ഹ്രസ്വചിത്രങ്ങളെയാണ് മത്സരവിഭാഗത്തിൽ പരിഗണിക്കുന്നത്. ഇത്തവണ ഹ്രസ്വചിത്രങ്ങൾക്ക് പുറമെ ഡോക്യുമെന്ററികളെയും മത്സരത്തിൽ ഉൾപ്പെടുത്തിയിട്ടുണ്ട് എന്നതാണ് മേളയുടെ പ്രധാന സവിശേഷത. പൊതുവിഭാഗം, ക്യാമ്പസ് വിഭാഗം എന്നിങ്ങനെ രണ്ട് പ്രധാന തലങ്ങളിലാണ് മത്സരങ്ങൾ നടക്കുക.
വൻ തുകയുടെ ക്യാഷ് പ്രൈസുകളാണ് വിജയികളെ കാത്തിരിക്കുന്നത്. പൊതുവിഭാഗത്തിലെ മികച്ച ചിത്രത്തിന് ഒരു ലക്ഷം രൂപയും പ്രശസ്തി ശില്പവും പുരസ്കാരമായി ലഭിക്കും. കൂടാതെ മികച്ച നടൻ, നടി, സംവിധായകൻ, ഛായാഗ്രഹണം, എഡിറ്റിങ്, തിരക്കഥ എന്നീ സാങ്കേതിക-അഭിനയ മികവുകൾക്കും പ്രത്യേക പുരസ്കാരങ്ങൾ നൽകും. ക്യാമ്പസ് വിഭാഗത്തിലെ മികച്ച ചിത്രത്തിനും മികച്ച ഡോക്യുമെന്ററിക്കും 50,000 രൂപ വീതവും പ്രശസ്തിപത്രവും സമ്മാനിക്കും. പനോരമ പ്രദർശനത്തിനായി തെരഞ്ഞെടുക്കപ്പെടുന്ന ചിത്രങ്ങൾക്ക് 10,000 രൂപ വീതം പ്രത്യേക അവാർഡും നൽകും. പൊതുവിഭാഗത്തിന് 1000 രൂപ എൻട്രി ഫീസ് ഈടാക്കുമ്പോൾ ക്യാമ്പസ് വിഭാഗത്തിന് എൻട്രി ഫീസ് സൗജന്യമാണ്.
2025 ജനുവരി ഒന്നു മുതൽ 2026 ഡിസംബർ 30 വരെയുള്ള കാലയളവിൽ പൂർത്തിയാക്കിയതോ റിലീസ് ചെയ്തതോ ആയ ചിത്രങ്ങളാണ് മത്സരത്തിന് പരിഗണിക്കുക. മുൻ പതിപ്പിൽ കശ്മീർ മുതൽ തമിഴ്‌നാട് വരെയുള്ള വിവിധ സംസ്ഥാനങ്ങളിൽ നിന്നായി നിരവധി ഭാഷാ ചിത്രങ്ങളാണ് മത്സരത്തിന് എത്തിയത്. പ്രശസ്ത സംവിധായകനും സിനിമാ നിരൂപകനുമായ വിജയകൃഷ്ണനാണ് ഇത്തവണയും ഫെസ്റ്റിവൽ ഡയറക്ടറായി പ്രവർത്തിക്കുന്നത്. മത്സരത്തിലെത്തുന്ന ചിത്രങ്ങളുടെ ഗുണനിലവാരം ഉറപ്പാക്കാൻ ചലച്ചിത്ര രംഗത്തെ പ്രമുഖരടങ്ങിയ ജൂറിയെ നിയോഗിക്കുമെന്ന് സംഘാടകർ അറിയിച്ചു. താത്പര്യമുള്ളവർക്ക് https://filmfreeway.com/Aravindam എന്ന വെബ്‌സൈറ്റ് വഴിയും +91 70128 64173 എന്ന വാട്ട്‌സ്ആപ്പ് നമ്പറിലൂടെയും കൂടുതൽ വിവരങ്ങൾ അറിയാനും എൻട്രികൾ സമർപ്പിക്കാനും സാധിക്കും.
