2011-ലെ ഏകദിന ലോകകപ്പ് വിജയത്തിന്റെ ഓർമ്മകൾ ഒരൊറ്റ ഇന്ത്യൻ ക്രിക്കറ്റ് ആരാധകനും ഒരിക്കലും മറക്കാനിടയില്ല. വാങ്കഡെ സ്റ്റേഡിയത്തിൽ നടന്ന ആവേശഭരിതമായ ഫൈനലിൽ ശ്രീലങ്കയെ ആറ് വിക്കറ്റിന് തകർത്താണ് ക്യാപ്റ്റൻ മഹേന്ദ്ര സിങ് ധോണിയുടെ നേതൃത്വത്തിലുള്ള ഇന്ത്യൻ ടീം കിരീടം ചൂടിയത്. ധോണി സിക്സറിലൂടെ വിജയറൺ കുറിച്ച ആ നിമിഷം ഇന്നും ആരാധകരുടെ മനസ്സിൽ പച്ചപിടിച്ചു നിൽക്കുന്നു. എന്നാൽ, ലങ്ക ഉയർത്തിയ 275 റൺസ് വിജയലക്ഷ്യം പിന്തുടർന്ന ഇന്ത്യയുടെ തുടക്കം കടുത്ത പ്രതിസന്ധിയിലായിരുന്നു. ഇന്ത്യൻ ഓപ്പണർമാരായ വിരേന്ദർ സെവാഗും സച്ചിൻ ടെണ്ടുൽക്കറും തുടക്കത്തിൽ തന്നെ പുറത്തായതാണ് ഇന്ത്യയെ സമ്മർദ്ദത്തിലാക്കിയത്.
ആ ചരിത്ര വിജയത്തിന് വർഷങ്ങൾക്ക് ശേഷം, ലങ്കൻ ഇന്നിങ്സ് പുരോഗമിക്കുന്നതിനിടെ താനും സച്ചിനും വിക്കറ്റിന്റെ അവസ്ഥ കണ്ട് ബാറ്റിങ്ങിനായി ആവേശഭരിതരായ ഒരു രസകരമായ കഥ പങ്കുവെച്ചിരിക്കുകയാണ് വിരേന്ദർ സെവാഗ്. ക്രിക്ബസ്സിലെ ഒരു ചർച്ചയ്ക്കിടയിലാണ് സെവാഗ് അന്ന് മൈതാനത്ത് വെച്ച് സച്ചിനുമായി നടത്തിയ ആ രഹസ്യ ആശയവിനിമയത്തെക്കുറിച്ച് തുറന്നുപറഞ്ഞത്. വിരാട് കോഹ്‌ലിയുടെ ഫോമില്ലായ്മയെയും റൺസ് കണ്ടെത്താനുള്ള ബുദ്ധിമുട്ടുകളെയും കുറിച്ച് വിദഗ്ദ്ധ പാനൽ സംസാരിക്കുന്നതിനിടയിലാണ് സെവാഗ് പഴയ ഓർമ്മ പുതുക്കിയത്.
വിരേന്ദർ സെവാഗിന്റെ വാക്കുകൾ: “ഞാൻ നിങ്ങളോട് 2011 ലോകകപ്പ് ഫൈനലിലെ ഒരു കഥ പറയാം. ശ്രീലങ്ക ബാറ്റ് ചെയ്യുന്ന സമയം, സച്ചിൻ ടെണ്ടുൽക്കർ മിഡ് വിക്കറ്റിലും ഞാൻ ഡീപ്പ് സ്ക്വയർ ലെഗിലുമാണ് ഫീൽഡ് ചെയ്യുന്നത്. സൂര്യൻ അസ്തമിക്കുന്നതിനൊപ്പം വിക്കറ്റിൽ നല്ല തിളക്കം ഞങ്ങൾ ശ്രദ്ധിച്ചു. ഞങ്ങൾ രണ്ടുപേരും വിക്കറ്റിലേക്ക് നോക്കി, പിന്നീട് പരസ്പരം നോക്കി ആംഗ്യം കാണിച്ചു; ‘ഈ വിക്കറ്റിൽ ബാറ്റ് ചെയ്യാൻ നല്ല രസമായിരിക്കും’ എന്ന്. പക്ഷേ കളി കഴിഞ്ഞപ്പോൾ എന്തായി? ഞങ്ങളിൽ ആരും റൺസ് സ്കോർ ചെയ്തില്ല.”
മത്സരത്തിന്റെ ആദ്യ ഓവറിൽ തന്നെ ലസിത് മലിംഗയുടെ പന്തിൽ റണ്ണൊന്നും എടുക്കാതെയാണ് (ഡക്ക്) സെവാഗ് പുറത്തായത്. തൊട്ടുപിന്നാലെ ഏഴാം ഓവറിൽ സച്ചിൻ ടെണ്ടുൽക്കറെയും മലിംഗ മടക്കി. പിച്ച് എത്ര മികച്ചതാണെങ്കിലും ഫോമില്ലാത്ത അവസ്ഥയിലൂടെയാണ് കടന്നുപോകുന്നതെങ്കിൽ റൺസ് കണ്ടെത്തുക അസാധ്യമാണെന്ന് വ്യക്തമാക്കാനാണ് സെവാഗ് ഈ ഉദാഹരണം പറഞ്ഞത്:
“അതുകൊണ്ട് പുറത്ത് കടുത്ത ചൂടാണെന്നോ, വിക്കറ്റ് ബാറ്റിങ്ങിന് അനുകൂലമായ ഫ്ലാറ്റ് പിച്ചാണെന്നോ, ടോസ് ജയിച്ച് ബാറ്റിങ് തിരഞ്ഞെടുത്താൽ ജയിക്കാമെന്നോ ഉള്ള ചർച്ചകൾക്കൊന്നും ഒരു കാര്യവുമില്ല. നിങ്ങൾ റൺസ് കണ്ടെത്താൻ ബുദ്ധിമുട്ടുന്ന ഒരു മോശം ഫോമിലൂടെയാണ് കടന്നുപോകുന്നതെങ്കിൽ, നിങ്ങൾക്ക് റൺസ് അടിക്കാൻ കഴിയില്ല. അത് അത്ര ലളിതമായ കാര്യമാണ്,” സെവാഗ് കൂട്ടിച്ചേർത്തു.
