പാകിസ്താനിൽ സൈന്യത്തിനും സുരക്ഷാ സേനയ്ക്കും കടുത്ത തലവേദന സൃഷ്ടിച്ച് ബലൂചിസ്ഥാൻ ലിബറേഷൻ ഫ്രണ്ടിന്റെ (BLF) പുതിയ വനിതാ പോരാളി സംഘം. ബി.എൽ.എഫ് പുതുതായി രൂപീകരിച്ച ‘കരീമ ആംഡ് അസ്സോൾട്ട് ഡിവിഷൻ’ (KAAD) എന്ന വനിതാ സ്ട്രൈക്ക് ഫോഴ്‌സിന്റെ ആയുധ പരിശീലനത്തിന്റെയും യുദ്ധതന്ത്രങ്ങളുടെയും ദൃശ്യങ്ങൾ പുറത്തുവന്നതോടെയാണ് സംഭവം ആഗോളതലത്തിൽ ശ്രദ്ധനേടുന്നത്. വനിതാ കമാൻഡറുടെ കീഴിൽ തോക്കുകളും അത്യാധുനിക ആയുധങ്ങളുമായി പരിശീലനം നേടുന്നതും, അതിർത്തികളിൽ ഫീൽഡ് ഓപ്പറേഷൻ നടത്തുന്നതുമായ ദൃശ്യങ്ങളാണ് പുറത്തുവന്നിട്ടുള്ളത്. ബലൂച് സ്റ്റുഡന്റ്സ് ഓർഗനൈസേഷൻ മുൻ അധ്യക്ഷയായിരുന്ന കരീമ ബലൂചിന്റെ ഓർമ്മയ്ക്കാണ് ഈ പോരാളി സംഘത്തിന് പേര് നൽകിയിരിക്കുന്നത്.
വനിതകളെ കേവലം യുദ്ധരംഗത്ത് മാത്രമല്ല, ഇന്റലിജൻസ്, കമ്മ്യൂണിക്കേഷൻസ്, മെഡിക്കൽ സപ്പോർട്ട്, ലോജിസ്റ്റിക്സ് എന്നീ മേഖലകളിലും ബി.എൽ.എഫ് പൂർണ്ണമായി ഉപയോഗപ്പെടുത്തുന്നുണ്ട്. പാകിസ്താൻ സൈന്യത്തിന് നേരെ അടുത്തിടെ നടന്ന ആക്രമണങ്ങൾക്ക് പിന്നിൽ കരീമ ആംഡ് അസ്സോൾട്ട് ഡിവിഷനാണെന്ന് ബി.എൽ.എഫ് അവകാശപ്പെട്ടു. തുർബതിന് സമീപം സി.പി.ഇ.സി (CPEC) ഹൈവേയിൽ വെച്ച് പാകിസ്താൻ സൈനിക വ്യൂഹത്തെ അക്രമിച്ചതും, ഒമ്പത് പാക് സൈനികരെ വധിച്ചതും ഈ വനിതാ സംഘമാണെന്നാണ് റിപ്പോർട്ടുകൾ.
അതോടൊപ്പം തന്ത്രപ്രധാനമായ ക്വറ്റ-തഫ്താൻ ദേശീയപാത സായുധരായ വനിതാ പോരാളികൾ ഉപരോധിക്കുകയും, വാഹനങ്ങൾ തടഞ്ഞുനിർത്തി പരിശോധിക്കുകയും ചെയ്തതായി വിവരമുണ്ട്. ചാഘി ജില്ലയിലെ യക്മാച്ചിൽ ദേശീയ തിരിച്ചറിയൽ രേഖകൾ നൽകുന്ന നാഷണൽ ഡാറ്റാബേസ് ആന്റ് രജിസ്ട്രേഷൻ അതോറിറ്റി (NADRA) ഓഫീസ് ഇവർ ആക്രമിച്ചു തീയിട്ടതായും റിപ്പോർട്ടുകളുണ്ട്. മുൻപും പാക് സൈന്യത്തിന് നേരെ ഇവിടെ വലിയ ആക്രമണങ്ങൾ നടന്നിട്ടുണ്ടെങ്കിലും, അത്യാധുനിക ആയുധങ്ങളുമായി വനിതകൾ നേരിട്ട് പോരാട്ടരംഗത്തിറങ്ങിയത് പാകിസ്താൻ ഭരണകൂടത്തെ വലിയ രീതിയിൽ ഞെട്ടിച്ചിരിക്കുകയാണ്.
