മുംബൈ : ദക്ഷിണ മുംബൈയിലെ കൊളാബയിലുള്ള ജൂത ആരാധനാകേന്ദ്രമായ ചബാദ് ഹൗസ് (നരിമാൻ ഹൗസ്) ഉൾപ്പെടെയുള്ള തന്ത്രപ്രധാന കേന്ദ്രങ്ങളിൽ നിരീക്ഷണം നടത്തുകയും ചിത്രങ്ങൾ പകർത്തുകയും ചെയ്ത 20 വയസ്സുകാരനെ മഹാരാഷ്ട്ര ഭീകരവിരുദ്ധ സ്ക്വാഡ് (ATS) കസ്റ്റഡിയിലെടുത്തു. നവി മുംബൈയിലെ ഐരോളി സ്വദേശിയായ യഷ് സിങ്ങാണ് പിടിയിലായത്. ഇയാളെ പിന്നീട് തുടരന്വേഷണത്തിനായി കേരള പൊലീസിന് കൈമാറി.
വിദേശത്തുള്ള അജ്ഞാത കേന്ദ്രങ്ങളുടെ നിർദേശപ്രകാരമാണ് യഷ് സിങ് പ്രവർത്തിച്ചിരുന്നത്. ചബാദ് ഹൗസിന്റെ കൃത്യമായ ലൊക്കേഷൻ, സമീപപ്രദേശങ്ങളിലെ ജൂത ഉടമസ്ഥതയിലുള്ള സ്ഥാപനങ്ങൾ, വിദേശ പൗരന്മാരും ജൂത വംശജരും സ്ഥിരമായി എത്തുന്ന ഇടങ്ങൾ, അവിടെയുള്ള വാഹനങ്ങളുടെ വിവരങ്ങൾ എന്നിവ ഇയാൾ ശേഖരിച്ച് കൈമാറിയതായി അന്വേഷണ ഏജൻസികൾ വ്യക്തമാക്കുന്നു. ഇതിനായി ഇയാൾക്ക് സാമ്പത്തിക പ്രതിഫലം ലഭിച്ചിരുന്നുവെന്നും ചോദ്യം ചെയ്യലിൽ സമ്മതിച്ചിട്ടുണ്ട്.
ടെലഗ്രാം ഉൾപ്പെടെയുള്ള സമൂഹമാധ്യമങ്ങൾ വഴിയാണ് വിദേശത്തുള്ള ‘ഹാൻഡ്ലർമാർ’ യഷ് സിങ്ങുമായി ബന്ധപ്പെട്ടിരുന്നത്. അന്താരാഷ്ട്ര ക്രിമിനൽ സംഘങ്ങളുമായും ദേശവിരുദ്ധ ശക്തികളുമായും ഇവർക്ക് ബന്ധമുള്ളതായി മഹാരാഷ്ട്ര എടിഎസ് സംശയിക്കുന്നു. യുവാക്കളെ പണം നൽകി പ്രലോഭിപ്പിച്ച് ഭീകര-ക്രിമിനൽ പ്രവർത്തനങ്ങൾക്ക് ഉപയോഗിക്കുന്ന ‘ഷഹ്സാദ് ഭട്ടി’ ശൃംഖലയുടെ പ്രവർത്തനരീതിക്ക് സമാനമാണിതെന്ന് എടിഎസ് ഉദ്യോഗസ്ഥർ ചൂണ്ടിക്കാട്ടുന്നു.
തൃശൂർ ഈസ്റ്റ് പൊലീസ് സ്റ്റേഷനിൽ യുഎപിഎ പ്രകാരം രജിസ്റ്റർ ചെയ്ത ഒരു ഭീകരവിരുദ്ധ കേസുമായി യഷ് സിങ്ങിന് ബന്ധമുണ്ടെന്ന് കണ്ടെത്തിയിട്ടുണ്ട്. കേരളത്തിലെ സിനഗോഗിന് നേരെയുണ്ടായ തീവെപ്പ് കേസുമായി ബന്ധപ്പെട്ട അന്വേഷണത്തിലാണ് ഇയാളുടെ പങ്കിനെക്കുറിച്ച് സൂചന ലഭിച്ചതെന്ന് റിപ്പോർട്ടുണ്ട് . ഇതേത്തുടർന്ന് തൃശൂരിൽ നിന്നുള്ള പ്രത്യേക പൊലീസ് സംഘം നവി മുംബൈയിലെത്തി ഇയാളെ ചോദ്യം ചെയ്യുകയും ഔദ്യോഗികമായി അറസ്റ്റ് രേഖപ്പെടുത്തുകയും ചെയ്തു.
2008 നവംബർ 26-ലെ മുംബൈ ഭീകരാക്രമണത്തിൽ ഭീകരർ ലക്ഷ്യമിട്ട പ്രധാന കേന്ദ്രങ്ങളിലൊന്നാണ് ചബാദ് ഹൗസ്. 26/11 ആക്രമണത്തിന്റെ 18-ാം വാർഷികം അടുത്തിരിക്കുന്ന സാഹചര്യത്തിലും, പശ്ചിമേഷ്യയിൽ ഇസ്രായേലുമായി ബന്ധപ്പെട്ട സംഘർഷങ്ങൾ നിലനിൽക്കുന്ന പശ്ചാത്തലത്തിലും ഈ സംഭവത്തെ അതീവ ഗൗരവത്തോടെയാണ് സുരക്ഷാ ഏജൻസികൾ കാണുന്നത്.
സമൂഹമാധ്യമങ്ങൾ വഴി പരിചയപ്പെടുന്ന അപരിചിതരുടെ നിർദേശപ്രകാരം തന്ത്രപ്രധാനമായ സ്ഥലങ്ങളുടെ ചിത്രങ്ങളോ വിവരങ്ങളോ പങ്കുവെക്കരുതെന്ന് മഹാരാഷ്ട്ര എടിഎസ് പൊതുജനങ്ങൾക്ക് മുന്നറിയിപ്പ് നൽകി. പണം വാഗ്ദാനം ചെയ്ത് യുവാക്കളെ ഇത്തരം രാജ്യവിരുദ്ധ പ്രവർത്തനങ്ങളിലേക്ക് ആകർഷിക്കുന്ന സംഘങ്ങളെക്കുറിച്ച് മാതാപിതാക്കളും യുവാക്കളും ജാഗ്രത പാലിക്കണമെന്നും അന്വേഷണ ഏജൻസികൾ ആവശ്യപ്പെട്ടു.








