2027-ൽ നടക്കാനിരിക്കുന്ന ഉത്തർപ്രദേശ് നിയമസഭാ തിരഞ്ഞെടുപ്പിന് മുന്നോടിയായി കോൺഗ്രസുമായുള്ള സീറ്റ് വിഭജനത്തിൽ നിലപാട് വ്യക്തമാക്കി സമാജ്വാദി പാർട്ടി (എസ്.പി) അധ്യക്ഷൻ അഖിലേഷ് യാദവ്. ഏത് പാർട്ടിയാണോ വിജയസാധ്യതയുള്ള നിലയിൽ നിൽക്കുന്നത് അവർക്ക് ആ സീറ്റ് നൽകുമെന്ന് അദ്ദേഹം പറഞ്ഞു. മെയിൻപുരിയിൽ മാധ്യമപ്രവർത്തകരോട് സംസാരിക്കവെയാണ് അഖിലേഷ് യാദവ് ഇക്കാര്യം അറിയിച്ചത്. കോൺഗ്രസുമായി സീറ്റ് വിഭജന ചർച്ചകൾ മുന്നോട്ട് പോകുകയാണെന്നും എല്ലാ വശങ്ങളും വിശദമായി ചർച്ച ചെയ്ത് ഇരുപാർട്ടികളും ചേർന്ന് അന്തിമ തീരുമാനമെടുക്കുമെന്നും അദ്ദേഹം വ്യക്തമാക്കി.
ആകെ 403 സീറ്റുകളുള്ള ഉത്തർപ്രദേശ് നിയമസഭയിലേക്ക് 181 സീറ്റുകളാണ് കോൺഗ്രസ് ആവശ്യപ്പെട്ടിരിക്കുന്നതെന്ന് അഖിലേഷ് യാദവ് നേരത്തെ വെളിപ്പെടുത്തിയിരുന്നു. മത്സരിക്കാൻ ആഗ്രഹിക്കുന്ന മണ്ഡലങ്ങളുടെ പട്ടിക കോൺഗ്രസ് ഇതിനോടകം സമാജ്വാദി പാർട്ടിക്ക് കൈമാറിയിട്ടുണ്ട്. സീറ്റ് വിഭജനവുമായി ബന്ധപ്പെട്ട് നവംബർ 17 ചൊവ്വാഴ്ച ഇരുപാർട്ടികളും തമ്മിൽ നിർണ്ണായക യോഗം ചേരുന്നുണ്ട്. സീറ്റുകളുടെ എണ്ണത്തേക്കാൾ ഉപരിയായി സംസ്ഥാനത്ത് ബി.ജെ.പിയെ പരാജയപ്പെടുത്തുക എന്നതാണ് സഖ്യത്തിന്റെ പ്രധാന ലക്ഷ്യമെന്ന് ഇരുപാർട്ടികളുടെയും നേതാക്കൾ വ്യക്തമാക്കിയിട്ടുണ്ട്.
അതേസമയം, ആഗ്രയിൽ നടന്ന ദളിത് മഹാസമ്മേളനത്തിൽ ഉത്തർപ്രദേശിലെ ബി.ജെ.പി സർക്കാരിനെതിരെ അഖിലേഷ് യാദവ് രൂക്ഷവിമർശനം ഉന്നയിച്ചു. കഴിഞ്ഞ പത്ത് വർഷത്തെ ഭരണത്തിനിടയിൽ സംസ്ഥാനത്ത് ഇരുപതിലധികം പരീക്ഷകളുടെ ചോദ്യപേപ്പറുകൾ ചോർന്നതായും 26,000-ത്തോളം പ്രൈമറി സ്കൂളുകൾ അടച്ചുപൂട്ടിയതായും അദ്ദേഹം ആരോപിച്ചു. പിന്നാക്ക-ദളിത് വിഭാഗങ്ങളുടെ വിദ്യാഭ്യാസ അവസരങ്ങൾ സർക്കാർ ഇല്ലാതാക്കുകയാണെന്നും ഭരണകൂടം ഭരണഘടനയെ ദുർബലപ്പെടുത്താൻ ശ്രമിക്കുകയാണെന്നും അദ്ദേഹം കുറ്റപ്പെടുത്തി. വരാനിരിക്കുന്ന തിരഞ്ഞെടുപ്പിൽ ജനവികാരം ഭരണമാറ്റത്തിന് വഴിയൊരുക്കുമെന്ന ആത്മവിശ്വാസവും അഖിലേഷ് യാദവ് പങ്കുവെച്ചു.








