കേരളത്തിൽ റോഡ് സുരക്ഷാ നിയമങ്ങൾ കർശനമായി നടപ്പാക്കുമെന്ന് മുഖ്യമന്ത്രി വി.ഡി. സതീശൻ. നിയമലംഘനം നടത്തുന്നവരെ സംരക്ഷിക്കാൻ രാഷ്ട്രീയ നേതാക്കളോ ജനപ്രതിനിധികളോ ഇടപെടരുതെന്നും പോലീസും മോട്ടോർ വാഹന വകുപ്പും ആരുടെയും ശുപാർശകൾ പരിഗണിക്കേണ്ടതില്ലെന്നും അദ്ദേഹം വ്യക്തമാക്കി. കൊച്ചിയിൽ ‘ജീവ-സുയാത്ര’ റോഡ് സുരക്ഷാ പദ്ധതിയുടെ സംസ്ഥാനതല ഉദ്ഘാടനം നിർവഹിക്കുകയായിരുന്നു മുഖ്യമന്ത്രി. അടുത്ത ആറുമാസം വിട്ടുവീഴ്ചയില്ലാതെ പരിശോധനയും നടപടികളും നടത്തണം. ഇതിന്റെ പേരിൽ സർക്കാരിനെതിരെ ജനവികാരമുണ്ടായാലും ഉത്തരവാദിത്തം ഏറ്റെടുക്കാൻ തയ്യാറാണെന്നും അദ്ദേഹം പറഞ്ഞു. മദ്യപിച്ച് വാഹനമോടിക്കൽ, അമിതവേഗം, വാഹനമോടിക്കുമ്പോൾ മൊബൈൽ ഫോൺ ഉപയോഗിക്കൽ, ട്രാഫിക് സിഗ്നലുകൾ ലംഘിക്കൽ തുടങ്ങിയവയ്ക്കെതിരെ കർശന നടപടി സ്വീകരിക്കും. ആവശ്യമെങ്കിൽ ഡ്രൈവിങ് ലൈസൻസ് റദ്ദാക്കുന്നതുൾപ്പെടെയുള്ള നടപടികളും ഉണ്ടാകുമെന്ന് മുഖ്യമന്ത്രി അറിയിച്ചു.
സംസ്ഥാനത്ത് വർധിച്ചുവരുന്ന വാഹനാപകടങ്ങളും മരണങ്ങളും കുറയ്ക്കുകയാണ് ജീവ-സുയാത്ര പദ്ധതിയുടെ പ്രധാന ലക്ഷ്യം. 2030ഓടെ റോഡപകടങ്ങളും മരണങ്ങളും പരിക്കുകളും 50 ശതമാനം കുറയ്ക്കാനാണ് പദ്ധതി ലക്ഷ്യമിടുന്നത്. ഇതിനായി അപകടസാധ്യത കൂടുതലുള്ള സ്ഥലങ്ങൾ കണ്ടെത്തി ആവശ്യമായ മാറ്റങ്ങൾ വരുത്തും. റോഡുകളുടെ നിലവാരം മെച്ചപ്പെടുത്തുന്നതിനും കുഴികൾ നികത്തുന്നതിനും സുരക്ഷാ ബോർഡുകളും സീബ്രാ ക്രോസിങ്ങുകളും സ്ഥാപിക്കുന്നതിനും മുൻഗണന നൽകും. സ്മാർട്ട് നിരീക്ഷണ സംവിധാനങ്ങൾ ഉപയോഗിച്ച് നിയമലംഘനങ്ങൾ കണ്ടെത്താനും പിഴ ചുമത്താനും പദ്ധതിയുണ്ട്. സ്കൂളുകളിലും കോളേജുകളിലും റോഡ് സുരക്ഷാ ബോധവത്കരണം നടത്തും. അപകടത്തിൽപ്പെട്ടവർക്ക് അടിയന്തര ചികിത്സ ഉറപ്പാക്കുന്നതിനും സുരക്ഷിതമായ വാഹനങ്ങളും റോഡുകളും ഒരുക്കുന്നതിനും പ്രത്യേക ശ്രദ്ധ നൽകും.
ഗതാഗതമന്ത്രി സി.പി. ജോൺ, നടൻ മമ്മൂട്ടി തുടങ്ങിയവരും ചടങ്ങിൽ പങ്കെടുത്തു. കേരളത്തിൽ പ്രതിവർഷം ഏകദേശം 4,000 പേർ റോഡപകടങ്ങളിൽ മരിക്കുന്നുണ്ടെന്ന് മന്ത്രി ചൂണ്ടിക്കാട്ടി. അപകടങ്ങളുടെ പ്രധാന കാരണം മനുഷ്യരുടെ അശ്രദ്ധയും നിയമലംഘനങ്ങളുമാണെന്ന് മമ്മൂട്ടി പറഞ്ഞു. പൊതുനിരത്തുകൾ വാഹനമത്സരങ്ങൾക്കും അഭ്യാസപ്രകടനങ്ങൾക്കും ഉള്ളതല്ലെന്നും ഇത്തരം പ്രവർത്തനങ്ങൾ നിശ്ചിത സ്ഥലങ്ങളിൽ മാത്രമേ നടത്താവൂ എന്നും അദ്ദേഹം ഓർമിപ്പിച്ചു. കാൽനടയാത്രക്കാരും വാഹനമോടിക്കുന്നവരും ഒരുപോലെ ഉത്തരവാദിത്തത്തോടെ പെരുമാറണം. നിയമം നടപ്പാക്കുന്നതിനൊപ്പം ജനങ്ങളുടെ മനോഭാവത്തിലും മാറ്റം വരുത്തുകയാണ് പദ്ധതിയുടെ ലക്ഷ്യം. ആറുമാസത്തിനുള്ളിൽ റോഡുകളിലെ പെരുമാറ്റത്തിൽ മാറ്റമുണ്ടാക്കുകയും ഒരു വർഷത്തിനുള്ളിൽ പുതിയ റോഡ് സുരക്ഷാ സംസ്കാരം വളർത്തുകയും ചെയ്യുമെന്ന് മുഖ്യമന്ത്രി പ്രത്യാശ പ്രകടിപ്പിച്ചു.












