ശ്രീനഗർ: ജമ്മു കശ്മീരിലെ കുൽഗാം ജില്ലയിൽ സുരക്ഷാസേനയും ഭീകരരും തമ്മിൽ വീണ്ടും ഏറ്റുമുട്ടൽ. തിങ്കളാഴ്ച നടന്ന വെടിവെപ്പിൽ പരിക്കേറ്റ് രക്ഷപ്പെട്ട ലഷ്കർ-ഇ-തൊയ്ബ (LeT) കമാൻഡർ ലത്തീഫ് ഭട്ടിനെ സുരക്ഷാസേന വളഞ്ഞതായാണ് റിപ്പോർട്ട്. ഭീകരനെ ജീവനോടെ പിടികൂടുന്നതിനായി പൊലീസും സുരക്ഷാ ഉദ്യോഗസ്ഥരും വീഡിയോ കോളിലൂടെ കീഴടങ്ങാൻ ആവശ്യപ്പെടുന്ന ദൃശ്യങ്ങൾ പുറത്തുവന്നു.
കുൽഗാമിലെ ലാരൂ മേഖലയിൽ തിങ്കളാഴ്ച സുരക്ഷാസേനയും ഭീകരരും തമ്മിൽ രൂക്ഷമായ ഏറ്റുമുട്ടൽ നടന്നിരുന്നു.അന്ന് ലത്തീഫ് ഭട്ടിനൊപ്പമുണ്ടായിരുന്ന ഉമർ നിസാർ ദാർ എന്ന ഭീകരനെ സൈന്യം വധിച്ചിരുന്നു. എന്നാൽ ഏറ്റുമുട്ടലിനിടെ വെടിയേറ്റ് പരിക്കേറ്റ ലത്തീഫ് ഭട്ട് പ്രദേശത്തുനിന്നും രക്ഷപ്പെടുകയായിരുന്നു. ഇയാൾക്കായി പ്രദേശത്ത് സൈന്യവും ജമ്മു കശ്മീർ പൊലീസും സംയുക്തമായി വൻ തിരച്ചിൽ നടത്തിവരികയായിരുന്നു.
ഇതിനിടെയാണ് ഭീകരൻ ഒളിച്ചിരിക്കുന്ന കേന്ദ്രം സുരക്ഷാസേന കണ്ടെത്തിയതും പ്രദേശം പൂർണ്ണമായും വളഞ്ഞതും.തുടർന്ന് വീണ്ടും വെടിവെപ്പുണ്ടാവുകയായിരുന്നു. രക്തം വാർന്ന നിലയിൽ ഒളിച്ചിരിക്കുന്ന ഭീകരനോട് ആയുധം താഴെ വെച്ച് കീഴടങ്ങാൻ ഉദ്യോഗസ്ഥർ വീഡിയോ കോളിലൂടെ അഭ്യർത്ഥിച്ചു. ഭീകരനെ ജീവനോടെ പിടികൂടാനാണ് സുരക്ഷാസേനയുടെ ശ്രമം. പ്രദേശത്ത് കൂടുതൽ സൈനികരെ വിന്യസിച്ചിട്ടുണ്ട്.








