മുംബൈ: ആഗോള ഉപഭോക്തൃ ഉൽപ്പന്ന ഭീമനായ യൂണിലീവറിന്റെ ഇന്ത്യൻ ഹ്യൂമൻ റിസോഴ്സ് (എച്ച്.ആർ) വിഭാഗത്തിലെ നിർണ്ണായക പദവിയായ ‘പീപ്പിൾ എക്സ്പീരിയൻസ് മേധാവി’യായി (Head of People Experience) മലയാളി വനിത മേഘ്ന മേനോൻ നിയമിതയായി. പാലക്കാട് കുടുംബവേരുകളുള്ള മേഘ്ന, മുംബൈ ആസ്ഥാനമാക്കിയാണ് പുതിയ ചുമതലകൾ നിർവ്വഹിക്കുക. കമ്പനിയിലെ ജീവനക്കാരുടെ നിയമനം, പരിശീലനം, തൊഴിലിടങ്ങളിലെ മികച്ച അനുഭവം ഉറപ്പാക്കൽ തുടങ്ങിയ സുപ്രധാന ചുമതലകളാണ് മേഘ്നയ്ക്ക് നൽകിയിരിക്കുന്നത്.
പാലക്കാട് കോട്ടമൈതാനം കൊരട്ടിയിൽ കുടുംബാംഗമാണ് മേഘ്ന മേനോൻ. ഇൻഫോസിസ് ബി.പി.ഒയിൽ നിന്ന് വൈസ് പ്രസിഡന്റായി വിരമിച്ച കോഴിക്കോട് സ്വദേശി വിജയ് മേനോന്റെയും, കോളേജ് അധ്യാപികയായിരുന്ന പാലക്കാട് സ്വദേശി അനിത മേനോന്റെയും മകളാണ്. കോർപ്പറേറ്റ് ലോകത്ത് മികച്ച പ്രവർത്തന പരിചയമുള്ള മേഘ്ന, പ്രമുഖ റീട്ടെയിൽ ശൃംഖലയായ ടാറ്റ സ്റ്റാർ ബസാറിന്റെ മാർക്കറ്റിങ് വിഭാഗം മേധാവി ഭരത് വൈദ്യനാഥനെയാണ് വിവാഹം ചെയ്തിരിക്കുന്നത്.
ആഗോളതലത്തിൽ തന്നെ പ്രമുഖരായ ബഹുരാഷ്ട്ര കമ്പനികളുടെ തലപ്പത്തേക്ക് കൂടുതൽ മലയാളികൾ എത്തുന്നതിന്റെ തുടർച്ചയായാണ് മേഘ്നയുടെ ഈ നേട്ടവും വിലയിരുത്തപ്പെടുന്നത്. ഇന്ത്യയിലെ ഏറ്റവും വലിയ എഫ്.എം.സി.ജി (FMCG) കമ്പനികളിലൊന്നായ ഹിന്ദുസ്ഥാൻ യൂണിലീവറിന്റെ മാനവ വിഭവശേഷി വിഭാഗത്തെ നയിക്കാൻ ഒരു മലയാളി എത്തുന്നത് കേരളത്തിനും പ്രത്യേകിച്ച് പാലക്കാടിനും വലിയ അഭിമാനമായിരിക്കുകയാണ്.








