നവരാത്രി ആഘോഷങ്ങളുടെ ആദ്യ ദിനത്തിൽ അമേരിക്കയിലെ ഇല്ലിനോയിസിലുള്ള പ്രശസ്തമായ ശ്രീ വെങ്കിടേശ്വര സ്വാമി ക്ഷേത്രത്തിൽ കൂട്ടവെടിവെപ്പിന് പദ്ധതിയിട്ട 19-കാരനെതിരെ ഗുരുതരമായ ഭീകരവാദ കുറ്റങ്ങൾ ചുമത്തി. പലറ്റൈൻ (Palatine) സ്വദേശിയായ അലക്സാണ്ട്രോസ് പപ്പൊറാക്കിസിനെതിരെയാണ് (Alexandros Paporakis) കുക്ക് കൗണ്ടി ഗ്രാൻഡ് ജൂറി പുതിയ കുറ്റപത്രം സമർപ്പിച്ചത്. ഒക്ടോബർ 11-ന് അറോറയിലെ ക്ഷേത്രത്തിൽ എത്തിയ പ്രതി കാറിലിരുന്ന് വെടിയുതിർക്കാൻ ശ്രമിച്ചെങ്കിലും തോക്ക് തകരാറിലായതിനാൽ (jammed) വൻ ദുരന്തം തലനാരിഴയ്ക്ക് ഒഴിവാകുകയായിരുന്നുവെന്ന് അന്വേഷണ ഉദ്യോഗസ്ഥർ വെളിപ്പെടുത്തി. യുഎസ് കോൺഗ്രസ് അംഗം രാജ കൃഷ്ണമൂർത്തിയും കുടുംബവും ഉൾപ്പെടെ നിരവധി ഭക്തർ ആ സമയം ക്ഷേത്രത്തിലുണ്ടായിരുന്നു.
വെള്ളക്കാരുടെ വംശീയ മേധാവിത്വം (White Supremacy) പ്രചരിപ്പിക്കുന്ന തീവ്രനിലപാടുകാരനാണ് പ്രതിയെന്ന് പോലീസ് വ്യക്തമാക്കി. ആക്രമണത്തിന് മുന്നോടിയായി ‘വൈ ഐ ഫോട്ട്: എ.കെ.എ. (അറോറ ഷൂട്ടേഴ്സ് മാനിഫെസ്റ്റോ)’ എന്ന പേരിൽ എട്ട് പേജുള്ള കുറിപ്പ് ഇയാൾ സഹപ്രവർത്തകർക്ക് അയച്ചുകൊടുത്തിരുന്നു. ഷിക്കാഗോയിലെയും അമേരിക്കയിലെയും ഇന്ത്യൻ വംശജരെയും ദക്ഷിണേഷ്യൻ ജനതയെയും കൂട്ടക്കൊല ചെയ്യണമെന്ന തന്റെ ആഗ്രഹമാണ് ഇതിൽ വ്യക്തമാക്കിയിരുന്നത്. തോക്ക് നന്നാക്കി വീണ്ടും ആക്രമണം നടത്തുമെന്ന് ഇയാൾ സഹപ്രവർത്തകരോട് പറഞ്ഞതോടെ, അപകടം മണത്ത അവർ ഉടൻതന്നെ പോലീസിൽ വിവരമറിയിക്കുകയായിരുന്നു. തുടർന്ന് എഫ്.ബി.ഐയുടെ (FBI) സഹായത്തോടെ പലറ്റൈൻ പോലീസ് ഇയാളെ അറസ്റ്റ് ചെയ്തു.
പ്രതിക്കെതിരെ ആറ് ഭീകരവാദ കുറ്റങ്ങൾ, രണ്ട് ഭീകരാക്രമണ ശ്രമങ്ങൾ, രണ്ട് സായുധ അതിക്രമങ്ങൾ, ഒൻപത് ഭീകരഭീഷണി കുറ്റങ്ങൾ എന്നിവയാണ് ഗ്രാൻഡ് ജൂറി പുതുതായി ചുമത്തിയിരിക്കുന്നത്. ഇതിനുപുറമെ സീരിയൽ നമ്പർ ഇല്ലാത്ത തോക്ക് കൈവശം വെച്ചതടക്കമുള്ള ആയുധ നിയമലംഘന കുറ്റങ്ങളും ചുമത്തിയിട്ടുണ്ട്. പ്രതിയുടെ വീട്ടിൽ നടത്തിയ പരിശോധനയിൽ റൈഫിൾ, വെടിയുണ്ടകൾ, ബുള്ളറ്റ് പ്രൂഫ് ജാക്കറ്റ് (tactical vest), തീവ്ര വംശീയ ചിഹ്നങ്ങൾ പതിപ്പിച്ച ബാഡ്ജുകൾ എന്നിവ പോലീസ് കണ്ടെടുത്തു.
നിലവിൽ ജയിലിൽ കഴിയുന്ന പ്രതിയെ വ്യാഴാഴ്ച കോടതിയിൽ ഹാജരാക്കും. എന്നാൽ, താൻ കുറ്റക്കാരനല്ലെന്ന് കോടതിയിൽ വാദിക്കാനാണ് പ്രതിയുടെ നീക്കമെന്ന് അമേരിക്കൻ മാധ്യമങ്ങൾ റിപ്പോർട്ട് ചെയ്യുന്നു. സംഭവം പുറത്തുവന്നതിന് പിന്നാലെ അമേരിക്കയിലെ ഇന്ത്യൻ സമൂഹത്തിനിടയിൽ വലിയ ആശങ്ക ഉയർന്നിരുന്നു. വിഷയത്തിൽ ഇന്ത്യൻ വിദേശകാര്യ മന്ത്രാലയം കടുത്ത ആശങ്ക രേഖപ്പെടുത്തുകയും, വംശീയ വിദ്വേഷത്തോടെയുള്ള ഇത്തരം നീക്കങ്ങൾക്കെതിരെ ശക്തമായ നടപടി വേണമെന്ന് ആവശ്യപ്പെടുകയും ചെയ്തിരുന്നു. കുടിയേറ്റ വിരുദ്ധ പ്രചാരണങ്ങളും തീവ്ര വംശീയ വാദങ്ങളും ശക്തമാകുന്നതാണ് അമേരിക്കയിൽ ദക്ഷിണേഷ്യൻ വംശജർക്കെതിരായ വിദ്വേഷ കുറ്റകൃത്യങ്ങൾ വർദ്ധിക്കാൻ കാരണമെന്ന് മനുഷ്യാവകാശ പ്രവർത്തകർ ചൂണ്ടിക്കാട്ടുന്നു.








