തമിഴ്നാട്ടിലെ മധുരയിലുള്ള തിരുപ്പരൻകുണ്ഡ്രം കുന്നിൽ കാർത്തിക ദീപം തെളിയിക്കുന്നതുമായി ബന്ധപ്പെട്ട തർക്കത്തിനിടെ പ്രകോപനപരമായ കൊലവിളിയുമായി മധുര ഐക്യ ജമാഅത്ത് ഭാരവാഹി രംഗത്തെത്തി. തിരുപ്പറങ്കുൻറം കുന്ന് പൂർണ്ണമായും സിക്കന്ദർ ബാദുഷ ദർഗയുടേതാണെന്നും, അവിടെ ദീപം തെളിയിക്കാൻ മലകയറുന്ന ഹിന്ദുക്കൾ ആരും ജീവനോടെ തിരിച്ചുപോകില്ലെന്നുമാണ് ജമാഅത്ത് നേതാവിന്റെ ഭീഷണി. കൂടാതെ, ദീപം തെളിയിക്കാൻ അനുമതി നൽകിയ മദ്രാസ് ഹൈക്കോടതി ജഡ്ജിമാർക്ക് ബീഹാറിലെ ജഡ്ജിമാർക്കുണ്ടായ ഗതി വരുമെന്നും ഇയാൾ പരസ്യമായി മുന്നറിയിപ്പ് നൽകി. ഈ പ്രകോപനപരമായ പ്രസംഗത്തിന്റെ വീഡിയോ ദൃശ്യങ്ങൾ സമൂഹമാധ്യമങ്ങളിൽ വ്യാപകമായി പ്രചരിച്ചതോടെ പ്രദേശത്ത് വലിയ രീതിയിലുള്ള സംഘർഷാവസ്ഥയും ആശങ്കയും ഉടലെടുത്തിട്ടുണ്ട്.
കുന്നിൻ മുകളിലെ പുരാതന കൽത്തൂണായ ‘ദീപത്തൂണിൽ’ കാർത്തിക ദീപം തെളിയിക്കാൻ മദ്രാസ് ഹൈക്കോടതി സിംഗിൾ ബെഞ്ചും ഡിവിഷൻ ബെഞ്ചും നേരത്തെ അനുമതി നൽകിയിരുന്നു. കുന്നിന്റെ താഴ്ഭാഗത്തുള്ള ഉച്ചിപിള്ളയാർ ക്ഷേത്രത്തിന് സമീപം മാത്രമാണ് പതിറ്റാണ്ടുകളായി ദീപം തെളിയിച്ചിരുന്നതെന്നും, ദർഗയ്ക്ക് 50 മീറ്റർ അകലെയുള്ള കൽത്തൂണിൽ ദീപം തെളിയിക്കുന്നത് ക്രമസമാധാന പ്രശ്നങ്ങൾക്ക് ഇടയാക്കുമെന്നും ചൂണ്ടിക്കാട്ടിയാണ് ദർഗ ഭരണസമിതിയും തമിഴ്നാട് സർക്കാരും ഇതിനെ എതിർത്തത്. എന്നാൽ കൽത്തൂൺ നിൽക്കുന്ന സ്ഥലം ക്ഷേത്രത്തിന് അവകാശപ്പെട്ടതാണെന്ന ഹൈക്കോടതി വിധിക്ക് പിന്നാലെയാണ്, നിയമവ്യവസ്ഥയെ പോലും വെല്ലുവിളിച്ചുകൊണ്ടുള്ള ഭീഷണിയുമായി ഐക്യ ജമാഅത്ത് ഭാരവാഹി രംഗത്തെത്തിയത്.
സംഭവത്തിൽ കർശന നടപടി ആവശ്യപ്പെട്ട് വിവിധ ഹിന്ദു സംഘടനകളും ബി.ജെ.പി നേതാക്കളും രംഗത്തെത്തിയിട്ടുണ്ട്. ജുഡീഷ്യറിയെയും ഒരു വിഭാഗം വിശ്വാസികളെയും പരസ്യമായി ഭീഷണിപ്പെടുത്തിയ ജമാഅത്ത് നേതാവിനെതിരെ ഉടൻ കേസെടുത്ത് അറസ്റ്റ് ചെയ്യണമെന്ന് ഇവർ ആവശ്യപ്പെട്ടു. അതേസമയം, തിരുപ്പറങ്കുൻറം കുന്നിൽ നവംബർ 24-ന് ഒറ്റത്തവണ ക്രമീകരണമെന്ന നിലയിൽ കാർത്തിക ദീപം തെളിയിക്കാൻ സുപ്രീം കോടതി അനുമതി നൽകിയ പശ്ചാത്തലത്തിൽ മധുരയിൽ പോലീസ് സുരക്ഷ ശക്തമാക്കിയിട്ടുണ്ട്. പ്രദേശത്ത് യാതൊരുവിധ അനിഷ്ട സംഭവങ്ങളും ഉണ്ടാകാതിരിക്കാൻ കുന്നിന് ചുറ്റും വൻ പോലീസ് സന്നാഹത്തെ വിന്യസിക്കുകയും നിരീക്ഷണം കർശനമാക്കുകയും ചെയ്തിട്ടുണ്ടെന്ന് ജില്ലാ ഭരണകൂടം അറിയിച്ചു.








