ഇന്ത്യയില്‍ കാറുകള്‍ക്കും യൂട്ടിലിറ്റി വാഹനങ്ങള്‍ക്കുമുള്ള ഡിമാന്‍ഡ് പുതിയ ഉയരങ്ങളിലേക്ക്. ഫെബ്രുവരിയില്‍ 2.92 ലക്ഷം യാത്രാവാഹനങ്ങളാണ് രാജ്യത്തെ വാഹന നിര്‍മ്മാതാക്കള്‍ വിൽപ്പനക്കായി പ്ലാന്റുകളിൽ നിന്ന് വിതരണം ചെയ്തത്. മുന്‍വര്‍ഷങ്ങളിലെ കണക്കുമായി താരതമ്യം ചെയ്യുമ്പോള്‍ ഇത് പുതിയ റെക്കോഡാണെന്ന് ഇന്ത്യന്‍ ഓട്ടോമൊബൈല്‍ നിര്‍മ്മാതാക്കളുടെ സംഘടന (SIAM) വ്യക്തമാക്കുന്നു. 2022 ഫെബ്രുവരിയെ അപേക്ഷിച്ച് ഈ വര്‍ഷം കമ്പനികളില്‍ നിന്നും ഡീലര്‍മാര്‍ക്ക് കയറ്റിയയച്ച വാഹനങ്ങളുടെ എണ്ണത്തില്‍ 11 ശതമാനം വര്‍ധനയാണ് ഉണ്ടായിട്ടുള്ളത്.
ഈ വര്‍ഷം ഫ്രെബ്രുവരിയില്‍ 1,42,201 കാറുകളാണ് കമ്പനികള്‍ ഡീലര്‍മാര്‍ക്ക് വിതരണം ചെയ്തത്. കഴിഞ്ഞ വര്‍ഷം 1,33,572 യൂണിറ്റുകള്‍ വിതരണം ചെയ്ത സ്ഥാനത്താണിത്. സമാനമായി സ്‌പോര്‍ട്‌സ് യൂട്ടിലിറ്റി വാഹനങ്ങള്‍ ഉള്‍പ്പടെ യൂട്ടിലിറ്റി വാഹനങ്ങളുടെ എണ്ണത്തിലും കാര്യമായ വര്‍ധനയുണ്ടായിട്ടുണ്ട്. കഴിഞ്ഞ വര്‍ഷം 1,20,122 യൂണിറ്റ് യൂട്ടിലിറ്റി വാഹനങ്ങളാണ് കമ്പനികള്‍ പുറത്തുവിട്ടതെങ്കില്‍ ഈ വര്‍ഷം ഫെബ്രുവരിയില്‍ 1,38,238 യൂണിറ്റ് യൂട്ടിലിറ്റി വാഹനങ്ങള്‍ ഡീലര്‍മാര്‍ക്ക് അയച്ചു. കയറ്റിയയച്ച വാനുകളുടെ എണ്ണം കഴിഞ്ഞ വര്‍ഷം ഫെബ്രുവരിയിലെ 9,290ല്‍ നിന്നും 11,489 യൂണിറ്റായി വര്‍ധിച്ചു.
മാരുതി സുസുക്കി ഇന്ത്യ കഴിഞ്ഞ മാസം 1,02,565 വാഹനങ്ങളാണ് ഡീലര്‍മാര്‍ക്ക് അയച്ചത്. മുന്‍വര്‍ഷത്തെ അപേക്ഷിച്ച് 3 ശതമാനം അധികമാണിത്. മാരുതി കഴിഞ്ഞാല്‍ ഏറ്റവുമധികം വാഹനങ്ങള്‍ ഇറക്കിയത് ഹ്യുണ്ടായ് മോട്ടോര്‍ ഇന്ത്യയാണ്. ഹ്യൂണ്ടായി 24,493 വാഹനങ്ങൾ കഴിഞ്ഞ മാസം പുറത്തിറക്കി.
കാറുകള്‍ക്ക് മാത്രമല്ല, ഇരുചക്ര വാഹനങ്ങള്‍ക്കും രാജ്യത്ത് വന്‍ ഡിമാന്‍ഡാണ് അനുഭവപ്പെടുന്നത്. കഴിഞ്ഞ വര്‍ഷത്തെ അപേക്ഷിച്ച് ഈ വര്‍ഷം ഫെബ്രുവരിയില്‍ വാഹന നിര്‍മ്മാതാക്കള്‍ പുറത്തിറക്കിയ ഇരുചക്ര വാഹനങ്ങളുടെ എണ്ണത്തില്‍ എട്ട് ശതമാനം വര്‍ധനയാണ് രേഖപ്പെടുത്തിയിട്ടുള്ളത്. കഴിഞ്ഞ വര്‍ഷം ഫെബ്രുവരിയില്‍ 10,50,079 ഇരുചക്ര വാഹനങ്ങളാണ് കമ്പനികള്‍ പുറത്തിറക്കിയതെങ്കിൽ ഈ വര്‍ഷം അത് 11,29,661 ആയി വര്‍ധിച്ചു. കമ്പനികളില്‍ നിന്നും പുറത്തിറക്കിയ മുചക്ര വാഹനങ്ങളുടെ എണ്ണത്തില്‍ 86 ശതമാനം വര്‍ധനയാണ് രേഖപ്പെടുത്തിയത്. കഴിഞ്ഞ വര്‍ഷം ഫെബ്രുവരിയില്‍ 27,074 യൂണിറ്റ് മുച്ചക്ര വാഹനങ്ങള്‍ വിതരണം ചെയ്തപ്പോൾ ഈ വര്‍ഷം അത് 50,382 ആയി ഉയര്‍ന്നു.
യാത്രാവാഹനങ്ങളെ സംബന്ധിച്ച് റെക്കോഡ് വില്‍പ്പനയാണ് ഫെബ്രുവരിയില്‍ നടന്നതെന്ന് SIAM ഡയറക്ടര്‍ ജനറല്‍ രാജേഷ് മേനോന്‍ വ്യക്തമാക്കി. വിപണിയിലെ മൊത്തത്തിലുള്ള പേസിറ്റീവ് വികാരം വരുംമാസങ്ങളിലും തുടരുമെന്നാണ് കരുതുന്നതെന്നും കേന്ദ്രബജറ്റിലെ പ്രഖ്യാപനങ്ങള്‍ വിപണിക്ക് കരുത്ത് പകരുമെന്നും SIAM പ്രസിഡന്റ് വിനോദ് അഗര്‍വാള്‍ പ്രതീക്ഷ പ്രകടിപ്പിച്ചു.
