വിദേശ സഹായത്തോടെയാണ് നരേന്ദ്ര മോദി പ്രധാനമന്ത്രിയായി തുടരുന്നതെന്ന ആരോപണത്തിൽ പരസ്യ സംവാദത്തിന് തയ്യറാണോ എന്ന രാഹുൽ ഗാന്ധിയുടെ വെല്ലുവിളി പൂർണ്ണമായി തള്ളി ബി.ജെ.പി. പക്വതയുള്ള രാഷ്ട്രീയ നേതാക്കൾ തമ്മിലാണ് സംവാദം നടത്തേണ്ടതെന്നും ‘പക്വത’ എന്ന വാക്ക് രാഹുൽ ഗാന്ധിക്ക് ഇന്നും അന്യമാണെന്നും കേന്ദ്ര മന്ത്രി കിരൺ റിജിജു പരിഹസിച്ചു. കൈയിൽ ഭരണഘടനയും പിടിച്ച് രാജ്യത്ത് കലാപം അഴിച്ചുവിടാൻ ശ്രമിക്കുന്ന അരാജകവാദിയാണ് രാഹുലെന്നും മതതീവ്രവാദികൾ മതേതരത്വത്തെക്കുറിച്ച് സംസാരിക്കുന്നത് പോലെ വിരോധാഭാസമാണ് അദ്ദേഹത്തിന്റെ വെല്ലുവിളിയെന്നും റിജിജു ആഞ്ഞടിച്ചു.
വിദേശ ശക്തികളുമായി ചേർന്ന് രാജ്യത്തെ ഒറ്റുകൊടുക്കുന്നുവെന്ന ആരോപണം ബി.ജെ.പി ശക്തമാക്കുന്നതിനിടെയാണ് നരേന്ദ്ര മോദിക്കെതിരെ അതേ ആയുധവുമായി രാഹുൽ ഗാന്ധി രംഗത്തെത്തിയത്. വിദേശ സോഷ്യൽ മീഡിയ പ്ലാറ്റ്‌ഫോമുകളുടെയും വിദേശ ഏജൻസികളുടെയും സഹായത്തോടെയാണ് മോദി ഭരണത്തിൽ തുടരുന്നതെന്നും ഇത് തെറ്റാണെന്ന് തെളിയിക്കാൻ പ്രധാനമന്ത്രിയെ പരസ്യ സംവാദത്തിന് ക്ഷണിക്കുകയാണെന്നും രാഹുൽ ഗാന്ധി വ്യക്തമാക്കിയിരുന്നു. താൻ ഉന്നയിച്ച ആരോപണങ്ങളിൽ 24 മണിക്കൂർ പിന്നിട്ടിട്ടും പ്രധാനമന്ത്രി മൗനം തുടരുകയാണെന്ന് ചൂണ്ടിക്കാട്ടിയാണ് രാഹുൽ വെല്ലുവിളി ആവർത്തിച്ചത്.
എന്നാൽ രാഹുലിന്റെ ആരോപണങ്ങൾ നിരാശയിൽ നിന്നുള്ളതാണെന്ന് ബി.ജെ.പി നേതാക്കൾ തിരിച്ചടിച്ചു. പുറത്ത് സോഷ്യൽ മീഡിയയിൽ വെല്ലുവിളികൾ നടത്തുന്നതിന് പകരം പാർലമെന്റിൽ വന്ന് എസ്.ഐ.ആർ (SIR) ചർച്ചകളിൽ പങ്കെടുക്കാൻ ധനമന്ത്രി നിർമ്മല സീതാരാമൻ രാഹുൽ ഗാന്ധിയോട് ആവശ്യപ്പെട്ടു. പാർലമെന്റിൽ വിഷയങ്ങൾ ചർച്ച ചെയ്യാൻ സർക്കാർ എപ്പോഴും സന്നദ്ധമാണെന്ന് അറിയിച്ചിട്ടും പ്രതിപക്ഷ നേതാവ് അതിൽ നിന്ന് ഒളിച്ചോടുന്നത് എന്തുകൊണ്ടാണെന്നും ധനമന്ത്രി ചോദിച്ചു. കോൺഗ്രസ് ഈ അരാജകത്വ രാഷ്ട്രീയമാണ് തുടരുന്നതെങ്കിൽ വൈകാതെ ജനങ്ങൾ ജനകീയമായ മറ്റൊരു ബദൽ പ്രതിപക്ഷത്തെ കണ്ടെത്തുമെന്ന് ഗൗരവ് ഭാട്ടിയ എം.പിയും വ്യക്തമാക്കി. വിഷയം ദേശീയ തലത്തിൽ ബി.ജെ.പി – കോൺഗ്രസ് പോര് കൂടുതൽ രൂക്ഷമാക്കിയിട്ടുണ്ട്.
