കശ്മീർ താഴ്‌വരയിൽ താമസിക്കുകയും ജോലി ചെയ്യുകയും ചെയ്യുന്ന കശ്മീരി പണ്ഡിറ്റ് ജീവനക്കാർക്ക് ദീപാവലി സമ്മാനവുമായി കേന്ദ്ര സർക്കാരും ജമ്മു കശ്മീർ ഭരണകൂടവും. പ്രധാനമന്ത്രിയുടെ പ്രത്യേക പുനരധിവാസ പാക്കേജിന് കീഴിൽ നിർമ്മിച്ച 936 അപാർട്ട്‌മെന്റുകൾ ഉൾപ്പെടുന്ന ട്രാൻസിറ്റ് ഫ്ലാറ്റുകളുടെ താക്കോലുകൾ കശ്മീരി പണ്ഡിറ്റുകൾക്ക് കൈമാറി. ജമ്മു കശ്മീർ ലെഫ്റ്റനന്റ് ഗവർണർ മനോജ് സിൻഹയാണ് ഞായറാഴ്ച നടന്ന ചടങ്ങിൽ ജീവനക്കാർക്ക് ഫ്ലാറ്റുകളുടെ താക്കോൽ ഔദ്യോഗികമായി നൽകിയത്.
ശ്രീനഗറിലെ സേവാൻ പ്രദേശത്ത് നിർമ്മിച്ച 39 ബ്ലോക്കുകളിലായാണ് പ്രധാന ഫ്ലാറ്റ് സമുച്ചയം സ്ഥിതി ചെയ്യുന്നത്. ഇതുകൂടാതെ കുപ്വാര, ബുഡ്ഗാം, കുൽഗാം ജില്ലകളിലെ ബാഗ് എന്നീ മേഖലകളിലായി നിർമ്മിച്ച 69 ബ്ലോക്കുകളിലെ 480 ട്രാൻസിറ്റ് ഫ്ലാറ്റുകളുടെ ഉദ്ഘാടനവും ചടങ്ങിൽ നടന്നു. കശ്മീരിലെ വിവിധ സർക്കാർ വകുപ്പുകളിൽ സേവനമനുഷ്ഠിക്കുന്ന കശ്മീരി പണ്ഡിറ്റ് ജീവനക്കാർക്ക് സുരക്ഷിതമായ താമസസൗകര്യം ഒരുക്കുന്നതിന്റെ ഭാഗമായാണ് ഈ നിർമ്മാണം.
കശ്മീർ താഴ്‌വരയിൽ ആകെ ആറായിരത്തോളം കശ്മീരി പണ്ഡിറ്റ് ജീവനക്കാരാണ് വിവിധ സർക്കാർ വകുപ്പുകളിൽ ജോലി ചെയ്യുന്നത്. ഇവരിൽ ഭൂരിഭാഗവും ശ്രീനഗർ, ബുദ്ഗാം മേഖലകളിലെ വാടകവീടുകളിലായിരുന്നു ഇതുവരെ കഴിഞ്ഞിരുന്നത്. തങ്ങൾക്ക് സുരക്ഷിതമായ താമസസൗകര്യം വേണമെന്ന് ഇവർ ഏറെക്കാലമായി ആവശ്യപ്പെട്ടിരുന്നെങ്കിലും 2020-ൽ പ്രധാനമന്ത്രിയുടെ പാക്കേജ് ജീവനക്കാരനായ രാഹുൽ പണ്ഡിറ്റിനെ ഭീകരർ ലക്ഷ്യമിട്ട് കൊലപ്പെടുത്തിയതോടെയാണ് ആവശ്യം വീണ്ടും ശക്തമായത്. പുതിയ ട്രാൻസിറ്റ് ഫ്ലാറ്റുകൾ നിലവിൽ വന്നതോടെ താഴ്‌വരയിൽ ജോലി ചെയ്യുന്ന കശ്മീരി പണ്ഡിറ്റുകളുടെ സുരക്ഷ ഉറപ്പാക്കാൻ സർക്കാരിന് സാധിക്കും.
