തട്ടലും മുട്ടലും പോറലും ഒന്നുമില്ലാതെ ബന്ധങ്ങള്‍ നിലനിര്‍ത്തി കൊണ്ടുപോകുകയെന്നത് ഇക്കാലത്ത് അത്ര എളുപ്പമല്ല. ഭാര്യാഭര്‍തൃബന്ധം മാത്രമല്ല, ഏതൊരു ബന്ധവും മുന്നോട്ടുകൊണ്ടുപോകണമെങ്കില്‍ നമ്മുടെ ഭാഗത്ത് നിന്ന് ആത്മാര്‍ത്ഥമായ ശ്രമം കൂടിയേ തീരൂ. ബന്ധങ്ങള്‍ തകരാന്‍ പല കാരണങ്ങളുണ്ട്. അതില്‍ നമ്മുടെ ചില സ്വഭാവങ്ങളും ഉള്‍പ്പെടും. അത്തരത്തില്‍ ബന്ധങ്ങളെ തകര്‍ക്കുന്ന ആറുതരം സ്വഭാവങ്ങള്‍ പട്ടികപ്പെടുത്തിയിരിക്കുകയാണ് പുതിയൊരു ഗവേഷണം. പ്രതിസന്ധികളെ അതിജീവിച്ച് ബന്ധങ്ങള്‍ മുന്നോട്ടുകൊണ്ടുപോകാന്‍ കഴിയുമോ എന്നും അതല്ല ഒരു ട്രാജഡിയില്‍ അവസാനിക്കാനുള്ളതാണോ നിങ്ങളുടെ ബന്ധമെന്നുമെല്ലാം പരിശോധിക്കാന്‍ ഈ ഗവേഷണ ഫലം ഒരുപക്ഷേ നിങ്ങളെ സഹായിച്ചേക്കും.
എവലൂഷനറി സൈക്കോളജി എന്ന ജേണലില്‍ ആണ് ഈ ഗവേഷണഫലം പ്രസിദ്ധീകരിച്ചത്. നിക്കോസ്യ സര്‍വ്വകലാശാല പ്രഫസറും സൈക്കോളജിസ്റ്റുമായ മെനെലാവോസ് അപോസ്‌റ്റോലു ആണ് ഈ ഗവേഷണത്തിന് പിന്നില്‍. എന്തുകൊണ്ടാണ് ചിലയാളുകള്‍ ബന്ധങ്ങളില്‍ തുടരുന്നതെന്നും മറ്റുചിലര്‍ വിട്ടുപോകുന്നതെന്നും കണ്ടെത്താനുള്ള അപോസ്‌റ്റോലുവിന്റെ ശ്രമഫലമാണ് ഈ ഗവേഷണം. രണ്ട് വിഭാഗം ആളുകളോട് ബന്ധങ്ങളില്‍ അവര്‍ നേരിടുന്ന ബുദ്ധിമുട്ടുകളും ബന്ധങ്ങളില്‍ നിന്ന് വിട്ടുപോകാനുള്ള കാരണങ്ങളും സംബന്ധിച്ച ചോദ്യങ്ങളിലൂടെയാണ് പ്രഫസര്‍ തന്റെ നിഗമനങ്ങളില്‍ എത്തിച്ചേര്‍ന്നത്. ആദ്യവിഭാഗം സിപ്രസില്‍ നിന്നുള്ള ഗ്രീക്ക് സംസാരിക്കുന്ന 233 വിദ്യാര്‍ത്ഥികളായിരുന്നു. രണ്ടാമത്തെ വിഭാഗം ആദ്യവിഭാഗത്തേക്കാള്‍ അല്‍പ്പം കൂടി മുതിര്‍ന്ന വിദ്യാര്‍ത്ഥികളായിരുന്നു. എന്നാല്‍ ഇരുവിഭാഗങ്ങളുടെയും ഉത്തരങ്ങള്‍ ഏറെക്കുറേ സമാനമായിരുന്നു. എങ്കിലും ആദ്യവിഭാഗത്തെ അപേക്ഷിച്ച് രണ്ടാമത്തെ വിഭാഗത്തിലുള്ള 28 ശതമാനം പേര്‍ക്ക് കുട്ടികള്‍ ഉണ്ടായിരുന്നുവെന്നതായിരുന്നുവെന്നതാണ് ഇവര്‍ തമ്മിലുള്ള പ്രധാന വ്യത്യാസം.
രണ്ട് വിഭാഗത്തിന്റെയും ഉത്തരങ്ങള്‍ വിശദമായി പഠിച്ചതിന് ശേഷം ബന്ധങ്ങളെ തകര്‍ക്കുന്ന അല്ലെങ്കില്‍ സ്‌നേഹം ഇല്ലാതാക്കുന്ന 88 പ്രവൃത്തികള്‍ കണ്ടെത്താന്‍ പ്രഫസറിന് സാധിച്ചു. അദ്ദേഹം അവയെ വീണ്ടും ക്രോഡീകരിച്ച് പ്രധാനപ്പെട്ട ആറ് വിഭാഗങ്ങളായി തരംതിരിച്ചു. തന്നെ വേണ്ട വിധത്തില്‍ പരിഗണിക്കുന്നില്ല, കുട്ടികള്‍ക്ക് വേണ്ട കരുതല്‍ നല്‍കുന്നില്ല, നിയന്ത്രിക്കാന്‍ ശ്രമിക്കുന്നു, മറ്റ് പുരുഷന്മാരിലോ സ്ത്രീകളിലോ താല്‍പ്പര്യം കാണിക്കുന്നു, അസഭ്യമായ പെരുമാറ്റം ഉണ്ടാകുന്നു, അനഭിലഷണീയമായ സ്വഭാവങ്ങള്‍ ഉണ്ട് എന്നിവയാണ് ബന്ധങ്ങള്‍ക്ക് വെല്ലുവിളിയായി അപോസ്‌റ്റോലു കണ്ടെത്തിയ പ്രധാന പ്രശ്‌നങ്ങള്‍.
ഇതില്‍ തന്നെ ബന്ധങ്ങള്‍ നല്ലരീതിയില്‍ നിലനിര്‍ത്തിക്കൊണ്ടുപോകുന്നതിന് പങ്കാളിക്ക് ആവശ്യത്തില്‍, അല്ലെങ്കില്‍ ആവശ്യത്തിലേറെ പരിഗണന നല്‍കുക എന്നതാണ് ഏറ്റവും പ്രധാനമെന്ന് ഗവേഷണത്തിന്റെ ഭാഗമായവരുടെ മറുപടികളില്‍ നിന്ന് വ്യക്തമാണ്. അവഗണനയാണ് മിക്കവരുടെയും പ്രശ്‌നം. പങ്കാളിക്ക് തനിക്കൊപ്പം ചിലവഴിക്കാന്‍ സമയമില്ല, അവഗണിക്കുന്നു, താല്‍പ്പര്യം കാണിക്കുന്നില്ല, അകലാന്‍ ശ്രമിക്കുന്നു എന്നീ പ്രതികരണങ്ങളെല്ലാം ബന്ധങ്ങളില്‍ നിന്ന് അവര്‍ അല്‍പ്പം കൂടി പരിഗണന ആഗ്രഹിക്കുന്നു എന്ന വസ്തുതയിലാണ് എത്തിനില്‍ക്കുന്നത്.
പങ്കാളിയോടോ മക്കളോടോ നല്ല രീതിയില്‍ പെരുമാറുന്നില്ല എന്നതും ബന്ധങ്ങള്‍ക്ക് വെല്ലുവിളിയായ മറ്റൊരു പ്രധാന സ്വഭാവരീതിയാണ്. അതേസമയം തന്നെ നിയന്ത്രിക്കാന്‍ ശ്രമിക്കുന്നു, കരുതല്‍ കാണിക്കുന്നില്ല, അനഭിലഷണീയമായ സ്വഭാവങ്ങള്‍ കാണിക്കുന്ന തുടങ്ങിയ പ്രതികരണങ്ങള്‍ക്ക് ലിംഗ, പ്രായ വ്യത്യാസം ഒരു പ്രധാനപ്പെട്ട ഘടകമാകുന്നുവെന്നാണ് ഗവേഷണം പറയുന്നത്.
