ഇൻസ്റ്റഗ്രാമിൽ ഒരു ബൈക്ക് റൈഡർ പങ്കുവെച്ച വീഡിയോ തമിഴ്നാട്ടിലെ ഒരു പെട്രോൾ പമ്പ് ജീവനക്കാരന്റെ ജീവിതത്തിൽ ഉണ്ടാക്കിയത് വലിയൊരു മാറ്റമാണ്. സ്വന്തമായി ഒരു ബൈക്ക് വേണമെന്നുള്ള വലിയ ആഗ്രഹത്തെക്കുറിച്ച് ആയിരുന്നു പെട്രോൾ പമ്പ് ജീവനക്കാരനായ യുവാവ് റൈഡറിനോട് സൂചിപ്പിച്ചിരുന്നത്. ഈ വീഡിയോ സമൂഹമാദ്ധ്യമങ്ങളിൽ പ്രചരിച്ചതോടെ ആ പെട്രോൾ പമ്പ് ജീവനക്കാരന് ഒരു പുതിയ ബൈക്ക് തന്നെ സമ്മാനമായി നൽകിയിരിക്കുകയാണ് തമിഴ് നടൻ കെപിവൈ ബാല.
ബൈക്കിൽ ഇന്ധനം നിറയ്ക്കാനായി എത്തിയ റൈഡറുടെ ഹെൽമറ്റ് ക്യാമറയിൽ റെക്കോർഡ് ആയ ദൃശ്യങ്ങളാണ് സമൂഹമാദ്ധ്യമങ്ങളിൽ വലിയ രീതിയിൽ പ്രചരിച്ചിരുന്നത്. പെട്രോൾ നിറച്ചു കൊണ്ടിരുന്ന ചെറുപ്പക്കാരൻ റൈഡറിനോട് ഈ ഹെൽമെറ്റ് ക്യാമറയ്ക്ക് എത്രയാണ് വില എന്ന് ചോദിക്കുന്നു. തുടർന്ന് അയാൾ 46,000 രൂപ എന്ന് മറുപടി നൽകുമ്പോൾ പമ്പ് ജീവനക്കാരൻ ശരിക്കും അതിശയിച്ചു. ” എനിക്ക് 10,000 രൂപയ്ക്ക് ഒരു ബൈക്ക് എടുക്കാൻ പോലും ഇതുവരെ സാധിച്ചിട്ടില്ല. ബൈക്ക് വാങ്ങുന്ന ആഗ്രഹം പറയുമ്പോൾ തന്നെ വീട്ടുകാർ ചെരുപ്പ് ഊരി അടിക്കുകയാണ് ” എന്നാണ് ഈ പെട്രോൾ പമ്പ് ജീവനക്കാരൻ സങ്കടം നിറഞ്ഞ ചിരിയോടെ ബൈക്ക് റൈഡറിനോട് വെളിപ്പെടുത്തിയത്.
ഹെൽമെറ്റ് ക്യാമറയിൽ റെക്കോർഡ് ആയ ഈ സംഭാഷണം ഈ റൈഡർ സമൂഹമാദ്ധ്യമങ്ങളിൽ പങ്കുവെക്കുകയായിരുന്നു. ഈ വീഡിയോ ശ്രദ്ധയിൽപ്പെട്ട നടൻ കെപിവൈ ബാല പുതിയ ഒരു ബൈക്ക് വാങ്ങിക്കൊണ്ട് ഈ ചെറുപ്പക്കാരൻ ജോലി ചെയ്യുന്ന പെട്രോൾ പമ്പിൽ ഇന്ധനം നിറയ്ക്കാൻ എത്തുകയായിരുന്നു. ബൈക്കിൽ ഇന്ധനം നിറച്ച ശേഷം പണത്തിന് പകരം ബൈക്കിന്റെ ചാവി ആ യുവാവിന്റെ കയ്യിൽ വച്ചുകൊടുത്തു. തുടർന്നാണ് യുവാവിന്റെ അതിശയം മാറ്റാനായി ബാല ഹെൽമറ്റ് ഊരി തന്റെ മുഖം വ്യക്തമാക്കിയത്. ഇതോടെ പെട്രോൾ പമ്പ് ജീവനക്കാരൻ ഇയാളെ കെട്ടിപ്പിടിച്ച് കരയുന്നതും ഇപ്പോൾ സമൂഹമാദ്ധ്യമങ്ങളിൽ പ്രചരിക്കുന്ന വീഡിയോയിൽ കാണാൻ കഴിയുന്നതാണ്. ദശലക്ഷക്കണക്കിന് ആളുകളാണ് കെപിവൈ ബാല പങ്കുവെച്ച ഈ വീഡിയോ ഇതുവരെയായി കണ്ടിരിക്കുന്നത്.
