ചെന്നൈ: ജീവിതത്തിലെ സന്തോഷകരമായ ഓരോ നിമിഷവും സോഷ്യൽ മീഡിയയിൽ പങ്കുവയ്ക്കുന്നവരാണ് നയൻതാര- വിഘ്‌നേഷ് ശിവൻ ദമ്പതികൾ. അതുകൊണ്ട് തന്നെ ഇരുവർക്കും സോഷ്യൽ മീഡിയയിൽ ആരാധകരും ഏറെയാണ്. ആദ്യകാലങ്ങളിൽ ഇരുവരുടെയും കല്യാണ വിശേഷങ്ങൾക്ക് വേണ്ടിയായിരുന്നു ആരാധകർ കാത്തിരുന്നത് എങ്കിൽ ഇന്ന് മക്കളുടെ വിശേഷങ്ങളാണ് ഇവർക്ക് അറിയേണ്ടത്. അതുകൊണ്ടുതന്നെ മക്കളും ഒന്നിച്ചുള്ള നിമിഷങ്ങൾ ആരാധകർക്ക് വേണ്ടി നയൻതാരയും വിഘ്‌നേഷും പങ്കുവയ്ക്കാറുണ്ട്. ഇത്തരത്തിൽ കഴിഞ്ഞ ദിവസം വിഘ്‌നേഷ് ശിവൻ പങ്കുവച്ച ചിത്രങ്ങൾ ആണ് ഇപ്പോൾ ആരാധകർ ഏറ്റെടുത്തിരിക്കുന്നത്.
മക്കൾക്കൊപ്പം ഫാദേഴ്‌സ് ഡേ ആഘോഷിക്കുന്നതിനിടെ എടുത്ത ചിത്രങ്ങളാണ് വിഘ്‌നേഷ് പുറത്തുവിട്ടത്. സ്വിമ്മിംഗ് പൂളിൽ നിന്നും ഉയിരിനെയും ഉലകിനെയും എടുത്ത് ഉയർത്തുന്നതാണ് ചിത്രം. പ്രഭാസ് നായകനായ ബാഹുബലി എന്ന സിനിമയിലെ കംഗത്തെ അനുസ്മരിപ്പിക്കുന്ന ചിത്രങ്ങൾ സോഷ്യൽ മീഡിയയിൽ വൈറൽ ആണ്.
സിനിമയിലെ രമ്യാകൃഷ്ണന്റെ കഥാപാത്രമായ ശിവകാമി ദേവി കുഞ്ഞു ബാഹുബലിയെ വെള്ളത്തിൽ നിന്നും ഉയർത്തിപ്പിടിക്കുന്ന രംഗമാണ് വിഘ്‌നേഷ് പുനരാവിഷ്‌കരിച്ചത്. ഉലകിനെയും ഉയിരിനെയും സ്വിമ്മിംഗ് പൂളിൽ നിന്നും ഇരു കൈകളും കൊണ്ട് സിനിമയിലേത് പോലെ ഉയർത്തിപ്പിടിയ്ക്കുകയായിരുന്നു. വെള്ളത്തിൽ മുങ്ങിക്കിടന്നുകൊണ്ടായിരുന്നു വിഘ്‌നേഷിന്റെ ഈ സാഹസം. ഇരുവരുമൊത്തുള്ള വെവ്വേറെ ചിത്രങ്ങളാണ് വിഘ്‌നേഷ് പങ്കുവച്ചിട്ടുള്ളത്.
എന്റെ ഒന്നും രണ്ടും ബാഹുബലികളെയെന്ന് കുഞ്ഞുങ്ങളെ വിളിച്ചുകൊണ്ടുള്ള വൈകാരിക കുറിപ്പും വിഘ്‌നേഷ് ചിത്രങ്ങൾക്കൊപ്പം പങ്കുവച്ചിട്ടുണ്ട്. എന്റെ ഒന്നും രണ്ടും ബാഹുബലികളെ. നിങ്ങളാൽ ഈ ദിനം സന്തോഷകരമായിരിക്കുന്നു. നിങ്ങൾക്കൊപ്പമുള്ള ജീവിതം അതിശയകരമാണ്. ഉയിരിനെയും ഉലകിനെയും നയൻതാരയെയും സ്‌നേഹിക്കുന്നുവെന്നായിരുന്നു കുറിപ്പ്. കുട്ടികൾക്കൊപ്പം സമയം ചിലവിടുന്ന വിഘ്‌നേഷിന്റെ വീഡിയോ നയൻതാരയും സോഷ്യൽ മീഡിയയിൽ പങ്കുവച്ചിട്ടുണ്ട്.
