ജമ്മു കശ്മീരിലെ ശ്രീനഗറിലെ പ്രധാന വ്യാപാരകേന്ദ്രമായ ലാൽചൗക്കിൽ നാല് ഭീകരരെക്കുറിച്ച് വിവരം തേടി സുരക്ഷാ ഏജൻസികൾ ബാനർ സ്ഥാപിച്ചു. സുരക്ഷാ സേനയ്ക്ക് ആവശ്യമായ വിവരങ്ങൾ പൊതുജനങ്ങളിൽ നിന്ന് ലഭ്യമാക്കുകയാണ് ഇതിന്റെ ലക്ഷ്യം. പിടികിട്ടാപ്പുള്ളികളായ നാല് ഭീകരരെ കണ്ടെത്താൻ സഹായിക്കുന്ന വിവരങ്ങൾ നൽകണമെന്ന് ബാനറിലൂടെ ജനങ്ങളോട് അഭ്യർഥിച്ചിട്ടുണ്ട്. ശ്രീനഗറിലെ തിരക്കേറിയ പ്രദേശത്ത് ഇത്തരമൊരു ബാനർ സ്ഥാപിച്ചത് വലിയ ശ്രദ്ധ നേടിയിട്ടുണ്ട്.
മുഹമ്മദ് ലത്തീഫ് ഭട്ട്, ബിലാൽ അഹമ്മദ് മിർ, മുഹമ്മദ് ഉമർ മിർ, ആബിദ് ഖയൂം ലോൺ എന്നിവരാണ് ബാനറിലുള്ളത്.
ഈ വർഷം ജൂലൈയിൽ അനന്ത്നാഗിൽ വച്ച് ഒരു പോലീസ് ഉദ്യോഗസ്ഥനെ കൊലപ്പെടുത്തിയ കേസിൽ പങ്കുള്ള മുഹമ്മദ് ലത്തീഫ് ഭട്ട് ആണ് ബാനറിലുള്ള പ്രമുഖരിൽ ഒരാൾ. ബാരമുള്ള ജില്ലയിൽ നിന്നുള്ള ബിലാൽ അഹമ്മദ് മിർ, മുഹമ്മദ് ഉമർ മിർ, ആബിദ് ഖയൂം ലോൺ എന്നിവരാണ് തിരയുന്ന മറ്റ് മൂന്ന് ഭീകരർ. ഈ ഭീകരരുടെ സാന്നിധ്യത്തെക്കുറിച്ചോ സഞ്ചാരത്തെക്കുറിച്ചോ വിശ്വസനീയമായ വിവരങ്ങൾ നൽകുന്നവർക്ക് വൻ തുക പ്രതിഫലമായി നൽകുമെന്ന് ബാനറിൽ പറയുന്നു.
നാല് പേരുടെയും സാന്നിധ്യമോ നീക്കങ്ങളോ സംബന്ധിച്ച് വിശ്വസനീയമായ വിവരം ലഭിക്കുന്നവർ സുരക്ഷാ ഏജൻസികളെ അറിയിക്കണമെന്ന് ബാനറിൽ ആവശ്യപ്പെടുന്നു. വിവരം നൽകുന്നവരുടെ വ്യക്തിവിവരങ്ങൾ പൂർണമായും രഹസ്യമായി സൂക്ഷിക്കുമെന്നും വിശ്വസനീയമായ വിവരങ്ങൾക്ക് ആകർഷകമായ പാരിതോഷികം നൽകുമെന്നും അറിയിച്ചിട്ടുണ്ട്. കശ്മീർ താഴ്‌വരയിൽ ഭീകരവിരുദ്ധ പ്രവർത്തനങ്ങൾ ശക്തമാക്കുന്നതിനിടെയാണ് ഈ നീക്കം. പ്രാദേശിക യുവാക്കൾ ഭീകരസംഘടനകളിൽ ചേരുന്നത് ഈ വർഷം കുറഞ്ഞതായും നിലവിൽ ഒരു സജീവ പ്രാദേശിക ഭീകരനെ മാത്രമാണ് തിരിച്ചറിഞ്ഞിട്ടുള്ളതെന്നും കശ്മീർ ഐജി നേരത്തെ വ്യക്തമാക്കിയിരുന്നു.
