ബംഗളൂരു: ഒരു സ്ത്രീയെയോ പെൺകുട്ടിയെയോ മോശമായ രീതിയിൽ നോക്കുന്നത് ലൈംഗിക പീഡനമോ ലൈംഗികച്ചുവയോടെയുള്ള ആവശ്യപ്പെടലോ ആയി കണക്കാക്കാനാവില്ലെന്ന് കർണാടക ഹൈക്കോടതി. ഭാരതീയ ന്യായ സംഹിത (BNS) സെക്ഷൻ 75(1)(ii) പ്രകാരം തനിക്കെതിരെ എടുത്ത ക്രിമിനൽ നടപടികൾ റദ്ദാക്കണമെന്ന് ആവശ്യപ്പെട്ട് പ്രതി നൽകിയ ഹർജിയിലാണ് ജസ്റ്റിസ് സൂരജ് ഗോവിന്ദരാജിന്റെ സുപ്രധാന നിരീക്ഷണം.
സാമ്പത്തിക തർക്കവുമായി ബന്ധപ്പെട്ട് പ്രതിയുടെ വീട്ടിൽ പോയപ്പോൾ അയാൾ ലൈംഗികാവശ്യങ്ങൾ ഉന്നയിക്കുകയും തടഞ്ഞുനിർത്തി ഉപദ്രവിക്കാൻ ശ്രമിക്കുകയും ചെയ്തെന്നായിരുന്നു പരാതിക്കാരിയായ സ്ത്രീയുടെ ആദ്യ ആരോപണം. എന്നാൽ പിന്നീട് പൊലീസിന് നൽകിയ മൊഴികളിൽ ഈ ഗുരുതര ആരോപണങ്ങളിൽ ഭൂരിഭാഗവും സ്ത്രീ പിൻവലിച്ചു. പ്രതി തടയാൻ ശ്രമിച്ചില്ലെന്നും തന്നെ മോശമായ രീതിയിൽ നോക്കുക മാത്രമാണ് ചെയ്തതെന്നും അവർ വ്യക്തമാക്കി. എന്നാൽ ഇതൊക്കെയാണെങ്കിലും ബിഎൻഎസ് സെക്ഷൻ 75(1)(ii), ക്രിമിനൽ ഭീഷണിപ്പെടുത്തലിന്റെ സെക്ഷൻ 351(2) എന്നിവ ഉൾപ്പെടുത്തി പൊലീസ് കുറ്റപത്രം സമർപ്പിക്കുകയായിരുന്നു.
തുടർന്ന് പ്രതി നൽകിയ ഹർജിയിലാണ് ക്രിമിനൽ നടപടികൾ ഹൈക്കോടതി റദ്ദാക്കിയത്. അന്വേഷണത്തിനിടെ രേഖപ്പെടുത്തിയ പരാതിക്കാരിയുടെ പുതിയ മൊഴിയോടെ കുറ്റകൃത്യത്തിന്റെ അടിസ്ഥാന ഘടകങ്ങൾ ഇല്ലാതായെന്ന് കോടതി ചൂണ്ടിക്കാണിച്ചു. ലൈംഗികാവശ്യം ഉന്നയിച്ചെന്നോ ഭീഷണിപ്പെടുത്തിയെന്നോ സാധൂകരിക്കുന്ന മറ്റ് തെളിവുകളൊന്നുമില്ലെന്ന് വിലയിരുത്തിയ കോടതി, ഒരാൾ മോശമായി നോക്കിയെന്ന ആരോപണം മാത്രം വച്ച് ലൈംഗികച്ചുവയുള്ള ആവശ്യമായി കേസ് തുടരുന്നത് നിയമവ്യവസ്ഥയുടെ അപഹാസ്യമാണെന്നും വ്യക്തമാക്കുകയായിരുന്നു.
