ചിക്കമഗളൂരു: അന്താരാഷ്ട്ര അധോലോക കുറ്റവാളി ദാവൂദ് ഇബ്രാഹിമിനെ പ്രകീർത്തിക്കുന്ന രീതിയിലുള്ള പേരും വാചകങ്ങളും പതിപ്പിച്ച സ്വകാര്യ ടൂറിസ്റ്റ് ബസ് കർണാടകയിൽ പൊലീസ് കസ്റ്റഡിയിലെടുത്തു. കേരളത്തിൽ നിന്ന് കോളേജ് വിദ്യാർഥികളുമായി കർണാടകയിലെ ചിക്കമഗളൂരുവിൽ വിനോദയാത്രയ്‌ക്കെത്തിയ ബസാണ് ഇത്.
‘ദാവൂദ്, റൈസ് ഓഫ് എ ഡോൺ’ (Dawood, Rise of a Don) എന്നെഴുതിയ വലിയ സ്റ്റിക്കറുകളാണ് ബസിന്റെ പുറത്തു പതിപ്പിച്ചിരുന്നത്. ചിക്കമഗളൂരുവിലെ ബൊളരാമേശ്വര ക്ഷേത്രത്തിന് സമീപത്ത് വച്ച് ബസ് കണ്ട പ്രാദേശിക സംഘടനാ പ്രവർത്തകർ ഇതിനെതിരെ രംഗത്തെത്തുകയായിരുന്നു. രാജ്യദ്രോഹിയും അധോലോക കുറ്റവാളിയുമായ വ്യക്തിയെ വീരനായകനായി ചിത്രീകരിച്ച് പ്രകീർത്തിക്കുന്നതാണ് എഴുത്തുകളെന്ന് ആരോപിച്ച് ഇവർ ബസ് തടയുകയും ജീവനക്കാരുമായി വാക്കേറ്റത്തിലേർപ്പെടുകയും ചെയ്തു.
സംഭവം സംഘർഷാവസ്ഥയിലേക്ക് നീങ്ങിയതോടെ ചിക്കമഗളൂരു ടൗൺ പൊലീസ് സ്ഥലത്തെത്തി ബസ് കസ്റ്റഡിയിലെടുക്കുകയും രേഖകൾ പരിശോധിക്കുകയും ചെയ്തു. തുടർന്ന് ബസിലുണ്ടായിരുന്ന വിവാദ സ്റ്റിക്കറുകളും എഴുത്തുകളും പൂർണ്ണമായും മായ്പ്പിച്ച ശേഷമാണ് മുന്നറിയിപ്പ് നൽകി പൊലീസ് ബസ് വിട്ടയച്ചത്. മാസങ്ങൾക്ക് മുൻപും തമിഴ്‌നാട്ടിൽ നിന്ന് ‘ദാവൂദ്’ എന്ന പേരുമായി എത്തിയ മറ്റൊരു ബസിനെച്ചൊല്ലി സമാനമായ തർക്കങ്ങളും പ്രതിഷേധങ്ങളും ഉണ്ടായിരുന്നു.
കുറ്റവാളികളെയും രാജ്യവിരുദ്ധ ശക്തികളെയും പ്രകീർത്തിക്കുന്ന തരത്തിലുള്ള വാഹനങ്ങളുടെ സഞ്ചാരം കർശനമായി തടയണമെന്നും അതിർത്തി കടന്നുള്ള ഇത്തരം നീക്കങ്ങളിൽ സുരക്ഷാ വീഴ്ചയുണ്ടോ എന്ന് പരിശോധിക്കണമെന്നും ആവശ്യപ്പെട്ട് പ്രതിഷേധം ശക്തമായിട്ടുണ്ട്.
