‘അയോധ്യ: സമാജ്‌വാദി പാർട്ടി അധ്യക്ഷൻ അഖിലേഷ് യാദവിന്റെ അയോധ്യ രാമക്ഷേത്ര സന്ദർശന പ്രഖ്യാപനത്തിന് പിന്നാലെ രൂക്ഷമായ രാഷ്ട്രീയ വിമർശനവുമായി ഉത്തർപ്രദേശ് മുഖ്യമന്ത്രി യോഗി ആദിത്യനാഥ്. അഖിലേഷ് യാദവിന് അയോധ്യയിലേക്ക് വരാമെന്നും ഭഗവാൻ രാമന്റെ ദർശനം നടത്താമെന്നും വ്യക്തമാക്കിയ യോഗി, എന്നാൽ അയോധ്യയിലെത്തുന്നതിന് മുൻപ് അദ്ദേഹം ശ്രീരാമഭക്തരോടും സന്യാസിമാരോടും പരസ്യമായി ക്ഷമാപണം നടത്തണമെന്ന് ആവശ്യപ്പെട്ടു. അയോധ്യയിൽ സംഘടിപ്പിച്ച പത്താമത് ദീപോത്സവ ചടങ്ങിൽ സംസാരിക്കവേയാണ് യോഗി ആദിത്യനാഥ് സമാജ്‌വാദി പാർട്ടി നേതൃത്വത്തിനെതിരെ കടുത്ത കടന്നാക്രമണം നടത്തിയത്.
ഡിസംബർ 12-ന് അഖിലേഷ് യാദവ് കുടുംബസമേതം രാമക്ഷേത്രത്തിൽ ദർശനം നടത്തുമെന്ന് സമാജ്‌വാദി പാർട്ടി വൃത്തങ്ങൾ അറിയിച്ചിരുന്നു. അയോധ്യയിൽ രാമക്ഷേത്ര നിർമ്മാണം പൂർത്തിയായ ശേഷം ഇതാദ്യമായാണ് അഖിലേഷ് യാദവ് അയോധ്യ സന്ദർശനത്തിനൊരുങ്ങുന്നത്. ഈ പശ്ചാത്തലത്തിലാണ് വിഎച്ച്പി, കർസേവകർ എന്നിവർക്ക് നേരെ മുൻകാലങ്ങളിൽ നടന്ന സംഭവങ്ങൾ പരാമർശിച്ച് യോഗി പ്രതികരിച്ചത്. ഒരു കാലത്ത് അയോധ്യയെ രക്തരൂഷിതമാക്കിയവരും രാമഭക്തർക്ക് നേരെ വെടിയുതിർക്കാൻ ഉത്തരവിട്ടവരും ഇന്ന് അയോധ്യയെക്കുറിച്ച് ഓർക്കാൻ തുടങ്ങിയിട്ടുണ്ടെന്ന് യോഗി പരിഹസിച്ചു.
“അവർ അയോധ്യയിലേക്ക് വരട്ടെ, അതിലാരും തടസ്സം നിൽക്കില്ല. എന്നാൽ ഇവിടുത്തെ ജനങ്ങളോടും രാമഭക്തരോടും ആദ്യം മാപ്പ് ചോദിക്കാൻ അവർ തയ്യാറാകണം. ഭഗവാൻ രാമൻ വളരെ ദയാലുവാണ്, ക്ഷമ ചോദിച്ചാൽ അവൻ എല്ലാവരോടും ക്ഷമിക്കും. പക്ഷേ, അധികാരത്തിന്റെ അഹങ്കാരം അവസാനിപ്പിക്കാൻ ദൈവത്തിന് അധിക സമയം ആവശ്യമില്ല” – യോഗി ആദിത്യനാഥ് പറഞ്ഞു.
ഒരുകാലത്ത് ശ്രീരാമന്റെ പേര് ഉച്ചരിക്കുന്നതുപോലും വിലക്കപ്പെട്ടിരുന്ന അയോധ്യയിൽ ഇന്ന് ദശലക്ഷക്കണക്കിന് ദീപങ്ങൾ തെളിയുന്ന ത്രേതായുഗത്തിന് സമാനമായ അന്തരീക്ഷമാണ് നിലനിൽക്കുന്നതെന്ന് യോഗി ചൂണ്ടിക്കാട്ടി.രാമക്ഷേത്ര പ്രസ്ഥാനത്തെ എതിർക്കുകയും കോടതികളിൽ രാമന്റെ നിലനിൽപ്പിനെ ചോദ്യം ചെയ്യുകയും ചെയ്തവർ ഇന്ന് അയോധ്യയിലേക്ക് എത്തുന്നത് ജനങ്ങളുടെ വിശ്വാസത്തിന്റെ വിജയമാണെന്നും അദ്ദേഹം കൂട്ടിച്ചേർത്തു.
