ബംഗ്ലാദേശ് മുൻ പ്രധാനമന്ത്രി ഷെയ്ഖ് ഹസീനയെ തങ്ങൾക്ക് വിട്ടുനൽകണമെന്ന് വീണ്ടും ഇന്ത്യയോട് ആവശ്യപ്പെട്ട് ബംഗ്ലാദേശ് ഇടക്കാല സർക്കാർ. ഹസീന നിയമപരമായി ശിക്ഷിക്കപ്പെട്ട കുറ്റവാളിയാണെന്നും, ഇരു രാജ്യങ്ങളും തമ്മിലുള്ള കുറ്റവാളി കൈമാറ്റ കരാർ (Extradition Treaty) പ്രകാരം അവരെ തിരികെ എത്തിക്കാൻ നിയമപരമായ എല്ലാ നടപടികളും സ്വീകരിച്ചു വരികയാണെന്നും ബംഗ്ലാദേശ് നിയമമന്ത്രി എം.ഡി. അസദുസ്സമാൻ വ്യക്തമാക്കി.
2024 ഓഗസ്റ്റ് 5-ന് ബംഗ്ലാദേശിൽ അരങ്ങേറിയ കടുത്ത വിദ്യാർത്ഥി പ്രക്ഷോഭത്തെ തുടർന്ന് അധികാരം നഷ്ടപ്പെട്ടാണ് ഷെയ്ഖ് ഹസീന ഇന്ത്യയിലേക്ക് അഭയം പ്രാപിച്ചത്. തുടർന്ന്, 2024-ലെ ജൂലൈ-ഓഗസ്റ്റ് പ്രക്ഷോഭ കാലയളവിൽ ഉണ്ടായ വൻ അക്രമ സംഭവങ്ങളുമായി ബന്ധപ്പെട്ട് ബംഗ്ലാദേശിലെ ഇന്റർനാഷണൽ ക്രൈംസ് ട്രൈബ്യൂണൽ (ICT) ഹസീനയ്‌ക്കെതിരെ വധശിക്ഷ വിധിച്ചിരുന്നു. ഈ ഉത്തരവ് മുൻനിർത്തിയാണ് ഹസീനയെ വിട്ടുകിട്ടണമെന്ന ആവശ്യത്തിൽ ബംഗ്ലാദേശ് ഉറച്ചുനിൽക്കുന്നത്.
എന്നാൽ ഹസീനയെ വിട്ടുകിട്ടാൻ ഇന്ത്യൻ കോടതികളിൽ നിയമപോരാട്ടം നടത്തുമോ എന്ന ചോദ്യത്തിന്, ആ തീരുമാനം പൂർണ്ണമായും ഇന്ത്യൻ സർക്കാരിന്റെ കൈകളിലാണെന്ന് നിയമമന്ത്രി പ്രതികരിച്ചു. “കുറ്റവാളി കൈമാറ്റ കരാർ പ്രകാരം ഞങ്ങൾ ഔദ്യോഗികമായി ഇന്ത്യയോട് അഭ്യർത്ഥിച്ചിട്ടുണ്ട്. അവർ ഹസീനയെ ഞങ്ങൾക്ക് കൈമാറുകയാണെങ്കിൽ നിയമനടപടികളുമായി മുൻപോട്ട് പോകും,” എന്ന് അസദുസ്സമാൻ മാധ്യമങ്ങളോട് പറഞ്ഞു.
