ദക്ഷിണേന്ത്യയിലെ റെയിൽവേ കണക്റ്റിവിറ്റി കൂടുതൽ ശക്തമാക്കാൻ രണ്ടു പുതിയ വന്ദേ ഭാരത് എക്സ്പ്രസ് ട്രെയിനുകൾ കൂടി പാളത്തിലിറങ്ങുന്നു. നവംബർ 13-നാണ് ഈ പുതിയ സർവീസുകളുടെ ഉദ്ഘാടനം നടക്കുക. യശ്വന്ത്പൂർ–മഡ്ഗാവ്, മംഗളൂരു–ബെംഗളൂരു റൂട്ടുകളിലാണ് വന്ദേ ഭാരത് സർവീസുകൾ ആരംഭിക്കുന്നത്. കർണാടകയിലെ തീരദേശ മേഖലകൾക്കും പ്രകൃതിരമണീയമായ ഗോവയ്ക്കും ബെംഗളൂരു നഗരത്തിനും തമ്മിലുള്ള യാത്രാ സമയം ഗണ്യമായി കുറയ്ക്കാൻ ഈ ട്രെയിനുകൾക്ക് സാധിക്കും.
ബെംഗളൂരുവിൽ നിന്ന് ഗോവയിലെ മഡ്ഗാവിലേക്ക് ആരംഭിക്കുന്ന വന്ദേ ഭാരത് എക്സ്പ്രസ് മംഗളൂരു ജംഗ്ഷൻ വഴിയാണ് സർവീസ് നടത്തുന്നത്. ട്രെയിൻ നമ്പർ 26655/26656 ആയി സർവീസ് നടത്തുന്ന ഈ ട്രെയിനിന് റെയിൽവേ ബോർഡ് ഇതിനകം അംഗീകാരം നൽകിക്കഴിഞ്ഞു. പശ്ചിമഘട്ടത്തിന്റെ ദൃശ്യഭംഗി ആസ്വദിച്ച് യാത്ര ചെയ്യാൻ സാധിക്കുന്ന തരത്തിലാണ് ഇതിന്റെ റൂട്ട് ക്രമീകരിച്ചിരിക്കുന്നത്. ആഴ്ചയിൽ ആറ് ദിവസമായിരിക്കും ഈ സർവീസ് ലഭ്യമാവുക.
ശ്രവണബെലഗോള, ഹാസൻ, സകലേശ്പൂർ, സുബ്രഹ്മണ്യ റോഡ്, കബക പുത്തൂർ, മംഗളൂരു ജംഗ്ഷൻ, ഉഡുപ്പി, കുന്ദാപുര, മൂകാംബിക റോഡ് ബൈന്ദൂർ, മുരുഡേശ്വർ, ഗോകർണം റോഡ്, കാർവാർ എന്നിവിടങ്ങളിലാണ് ട്രെയിനിന് പ്രധാന സ്റ്റോപ്പുകൾ അനുവദിച്ചിട്ടുള്ളത്. രാവിലെ 7:35-ന് യശ്വന്ത്പൂരിൽ നിന്ന് പുറപ്പെടുന്ന ട്രെയിൻ രാത്രി 8:55-ന് മഡ്ഗാവിലെത്തും. മടക്ക സർവീസിൽ രാവിലെ 8:20-ന് മഡ്ഗാവ ഭവനിൽ നിന്ന് പുറപ്പെട്ട് രാത്രി 9:15-ന് യശ്വന്ത്പൂരിൽ തിരിച്ചെത്തുന്ന രീതിയിലാണ് സമയം ക്രമീകരിച്ചിരിക്കുന്നത്. പുതിയ സർവീസുകൾ ആരംഭിക്കുന്നതോടെ തീർത്ഥാടകർക്കും വിനോദസഞ്ചാരികൾക്കും ഐ.ടി ജീവനക്കാർക്കും വലിയ യാത്രാസൗകര്യമാണ് തുറന്നു കിട്ടുന്നത്.
