രാജ്യത്തുടനീളം പാക്കറ്റ് പാൽ വില വർദ്ധിപ്പിച്ച് പ്രമുഖ ഡെയറി ബ്രാൻഡായ അമുൽ. പ്രധാന പാൽ വേരിയന്റുകളായ അമുൽ ടാസ, അമുൽ ഗോൾഡ് എന്നിവയുടെ വിലയിലാണ് പ്രധാനമായും വർദ്ധനവ് വരുത്തിയിരിക്കുന്നത്. ലിറ്ററിന് 2 രൂപ മുതൽ 4 രൂപ വരെയാണ് നിരക്കുകൾ കൂട്ടിയിട്ടുള്ളത്. പുതുക്കിയ വിലകൾ വ്യാഴാഴ്ച മുതൽ പ്രാബല്യത്തിൽ വരുമെന്ന് അമുൽ ഉൽപ്പന്നങ്ങൾ വിപണനം ചെയ്യുന്ന ഗുജറാത്ത് കോ-ഓപ്പറേറ്റീവ് മിൽക്ക് മാർക്കറ്റിംഗ് ഫെഡറേഷൻ (GCMMF) വ്യക്തമാക്കി.
പുതിയ നിരക്കുകൾ പ്രകാരം അമുൽ ടാസ (ടോൺഡ് മിൽക്ക്) ലിറ്ററിന് 2 രൂപ വർദ്ധിക്കും. അതേസമയം അമുൽ ഗോൾഡിന് (ഫുൾ ക്രീം മിൽക്ക്) ലിറ്ററിന് 4 രൂപയാണ് കൂട്ടിയിരിക്കുന്നത്. പാൽ ഉൽപ്പാദന ചെലവിലുണ്ടായ വർദ്ധനവും സംസ്‌കരണത്തിനും പാക്കിംഗിനുമുള്ള ഉയർന്ന ചെലവുകളുമാണ് വിലവർദ്ധനവിന് പ്രധാന കാരണമായി കമ്പനി ചൂണ്ടിക്കാണിക്കുന്നത്. കാലിത്തീറ്റ, ഗതാഗതം, ഇന്ധനം എന്നിവയുടെ വില ഉയർന്നതും പാലുൽപ്പാദനത്തെ പ്രതികൂലമായി ബാധിച്ചിട്ടുണ്ട്.
വില വർദ്ധനവിലൂടെ ലഭിക്കുന്ന വരുമാനത്തിന്റെ വലിയൊരു പങ്ക് ക്ഷീരകർഷകർക്ക് തന്നെ നൽകുമെന്നും അമുൽ വ്യക്തമാക്കി. ഉപഭോക്താക്കളിൽ നിന്ന് ലഭിക്കുന്ന തുകയുടെ ഭൂരിഭാഗവും കർഷകർക്ക് ഉറപ്പാക്കുന്ന സഹകരണ മാതൃകയാണ് അമുൽ പിന്തുടരുന്നത്. പുതിയ വിലവർദ്ധനവ് സാധാരണക്കാരുടെ കുടുംബ ബജറ്റിനെ ബാധിക്കുമെങ്കിലും ക്ഷീരകർഷകർക്ക് ഇത് വലിയ ആശ്വാസമാകുമെന്നാണ് കമ്പനിയുടെ വിലയിരുത്തൽ. ഇതോടൊപ്പം മറ്റ് പ്രമുഖ ബ്രാൻഡുകളും പാൽ വിലയിൽ മാറ്റം വരുത്താൻ സാധ്യതയുണ്ട്.
