ഇന്ത്യയ്ക്കെതിരെ നിരന്തരം വിദ്വേഷ പരാമർശങ്ങൾ നടത്തുന്ന പാകിസ്ഥാൻ ഫെഡറൽ കാലാവസ്ഥാ വ്യതിയാന മന്ത്രി ഡോ. മുസാദിഖ് മാലിക് ന്യൂഡൽഹിയിലേക്ക് എത്തുന്നു. നവംബർ 20 മുതൽ 22 വരെ ഡൽഹിയിൽ നടക്കുന്ന ഷാങ്ഹായ് സഹകരണ സംഘടനയുടെ (എസ്‌സിഒ) ‘നാഗരിക-സാംസ്കാരിക സംവാദ’ (Civilisational and Cultural Dialogue) ഫോറത്തിൽ പാകിസ്ഥാനെ പ്രതിനിധീകരിക്കാനാണ് ഇസ്ലാമാബാദ് മാലിക്കിനെ നാമനിർദ്ദേശം ചെയ്തിരിക്കുന്നത്. സന്ദർശനം യാഥാർത്ഥ്യമായാൽ, മൂന്ന് വർഷത്തിലേറെ നീണ്ട ഇടവേളയ്ക്ക് ശേഷം ഇന്ത്യയിലെത്തുന്ന ആദ്യ പാകിസ്ഥാൻ ഫെഡറൽ മന്ത്രിയായിരിക്കും ഡോ. മുസാദിഖ് മാലിക്. 2023-ൽ അന്നത്തെ വിദേശകാര്യ മന്ത്രി ബിലാവൽ ഭൂട്ടോ സർദാരി ഗോവയിൽ നടന്ന എസ്‌സിഒ യോഗത്തിൽ പങ്കെടുത്തതിന് ശേഷമുള്ള ആദ്യ ഉന്നതതല സന്ദർശനമാണിത്.
എന്നാൽ, ഇന്ത്യയുടെ കടുത്ത വിമർശകനായി അറിയപ്പെടുന്ന മാലിക്കിനെ തന്നെ സാംസ്കാരിക സമ്മേളനത്തിലേക്ക് അയക്കാനുള്ള പാകിസ്ഥാൻ തീരുമാനത്തിന് പിന്നിൽ കൃത്യമായ രാഷ്ട്രീയ തന്ത്രമുണ്ടെന്നാണ് നയതന്ത്ര വൃത്തങ്ങൾ വിലയിരുത്തുന്നത്. ചരിത്രപ്രസിദ്ധമായ സിന്ധു നദീജല കരാർ (Indus Waters Treaty) മരവിപ്പിക്കാനുള്ള ഇന്ത്യയുടെ തീരുമാനത്തിനെതിരെ അന്താരാഷ്ട്ര വേദിയിൽ ശക്തമായ പ്രതിഷേധം ഉയർത്താനാണ് പാകിസ്ഥാൻ ലക്ഷ്യമിടുന്നത്. സാംസ്കാരിക വിനിമയത്തിനും ജനങ്ങൾ തമ്മിലുള്ള ബന്ധം ശക്തിപ്പെടുത്തുന്നതിനുമായി ഇന്ത്യ മുൻകൈയെടുത്ത് സംഘടിപ്പിക്കുന്ന ഈ ബഹുമുഖ വേദി, സിന്ധു നദീജല തർക്കം ഇന്ത്യൻ മണ്ണിൽ തന്നെ ഉന്നയിക്കാനുള്ള ഉപകരണമാക്കി മാറ്റാനാണ് ഇസ്ലാമാബാദിന്റെ നീക്കമെന്ന് ഉന്നത സർക്കാർ വൃത്തങ്ങൾ സൂചിപ്പിക്കുന്നു.
പഹൽഗാം ഭീകരാക്രമണത്തിന് പിന്നാലെ അതിർത്തി കടന്നുള്ള ഭീകരവാദം അവസാനിപ്പിക്കുന്നത് വരെ സിന്ധു നദീജല കരാർ മരവിപ്പിക്കാൻ ഇന്ത്യ തീരുമാനിച്ചിരുന്നു. ഇതിൽ പ്രകോപിതനായ മുസാദിഖ് മാലിക് കഴിഞ്ഞ ജൂണിൽ ഇന്ത്യയ്ക്കെതിരെ കടുത്ത ഭീഷണി മുഴക്കിയിരുന്നു. പാകിസ്ഥാന്റെ അവകാശപ്പെട്ട ജലവിഹിതത്തിന് നേരെ കൈവെക്കുന്നവരുടെ “കൈകൾ വെട്ടിക്കളയും” എന്നായിരുന്നു മാലിക്കിന്റെ വിവാദ പ്രസ്താവന. അയൽരാജ്യത്തെ പ്രധാനമന്ത്രി ഒരു ടാപ്പ് പോലെ വെള്ളം നിയന്ത്രിക്കുകയാണെന്നും അദ്ദേഹം അന്ന് ആരോപിച്ചിരുന്നു. ഇത്തരത്തിൽ തീവ്ര ഇന്ത്യാ വിരുദ്ധ നിലപാടുകളുള്ള ഒരു മന്ത്രിയെ സാംസ്കാരിക സംവാദത്തിന് അയക്കുന്നത് നയതന്ത്ര തലത്തിൽ വലിയ ചർച്ചകൾക്ക് വഴിവെച്ചിട്ടുണ്ട്.
പ്രധാനമന്ത്രി നരേന്ദ്ര മോദി ഡൽഹിയിലെ പുരാന കിലയിൽ ഉദ്ഘാടനം ചെയ്യുന്ന സമ്മേളനത്തിൽ ചൈന, റഷ്യ, ഇറാൻ തുടങ്ങിയ എസ്‌സിഒ അംഗരാജ്യങ്ങളുൾപ്പെടെ 25-ലധികം രാജ്യങ്ങളിൽ നിന്നുള്ള പ്രതിനിധികൾ പങ്കെടുക്കുന്നുണ്ട്. സാംസ്കാരിക പൈതൃകം, കല, സാഹിത്യം എന്നിവ ചർച്ച ചെയ്യേണ്ട വേദിയെ പാകിസ്ഥാൻ രാഷ്ട്രീയ പ്രചാരണത്തിനായി ഉപയോഗിക്കാൻ ശ്രമിച്ചാൽ ഇന്ത്യ ശക്തമായി തന്നെ തിരിച്ചടിക്കുമെന്നാണ് സൂചന. കരാർ മരവിപ്പിച്ച നടപടിയിൽ നിന്ന് പിന്നോട്ടില്ലെന്ന് ഇന്ത്യ നേരത്തെ തന്നെ വ്യക്തമാക്കിയിട്ടുള്ളതാണ്.
