റോഡുകൾ അഭ്യാസപ്രകടനങ്ങളും മത്സരയോട്ടങ്ങളും നടത്താനുള്ള ഇടമല്ലെന്നും, അശ്രദ്ധമായ ഡ്രൈവിങ് മറ്റുള്ളവരുടെ ജീവനുവുകൂടി ഭീഷണിയാണെന്നും മലയാളത്തിന്റെ മെഗാസ്റ്റാർ മമ്മൂട്ടി. സംസ്ഥാന സർക്കാരിന്റെ റോഡ് സുരക്ഷാ കാമ്പയിനായ ‘ജീവ സുയാത്ര മിഷൻ’ സംസ്ഥാനതല ഉദ്ഘാടനം നിർവഹിച്ച് സംസാരിക്കുകയായിരുന്നു അദ്ദേഹം. പദ്ധതിയുടെ ഔദ്യോഗിക ബ്രാൻഡ് അംബാസിഡർ കൂടിയായ മമ്മൂട്ടി, യുവതലമുറയെ ലക്ഷ്യമിട്ട് നടത്തിയ കടുത്തതും എന്നാൽ യാഥാർത്ഥ്യബോധമുള്ളതുമായ പ്രതികരണങ്ങൾ ഇപ്പോൾ സമൂഹമാധ്യമങ്ങളിൽ വലിയ ചർച്ചയായിരിക്കുകയാണ്.
തനിക്ക് റോഡ് സുരക്ഷാ മിഷന്റെ ബ്രാൻഡ് അംബാസിഡർ പദവി നൽകിയതായി അറിഞ്ഞപ്പോൾ താൻ ആദ്യം ഒന്ന് ഭയന്നുപോയെന്ന് മമ്മൂട്ടി തുറന്നുപറഞ്ഞു. തന്റെ ഡ്രൈവിങ് ചരിത്രം അത്ര നല്ല സൽപ്പേരുള്ളതല്ലെന്നും, വേഗതയോടും ആവേശത്തോടും കൂടി വണ്ടിയോടിക്കാൻ ഇഷ്ടപ്പെടുന്ന ഒരാളാണ് താനെന്നും അദ്ദേഹം വ്യക്തമാക്കുകയുണ്ടായി. എന്നാൽ, വണ്ടിയുടെ വേഗതയും പവറും കയ്യിലെടുക്കുമ്പോൾ അതിനനുസരിച്ചുള്ള വലിയ ഉത്തരവാദിത്തവും ജാഗ്രതയും ഡ്രൈവർമാർക്ക് ഉണ്ടാകണമെന്ന് അദ്ദേഹം ഓർമ്മിപ്പിച്ചു. സ്പീഡ് ഉണ്ടെങ്കിലും ഏകാഗ്രതയും ശ്രദ്ധയുമുണ്ടെങ്കിൽ വലിയ അപകടങ്ങൾ ഒരുപരിധി വരെ ഒഴിവാക്കാൻ സാധിക്കുമെന്നും അദ്ദേഹം കൂട്ടിച്ചേർത്തു.
എന്നാൽ, താൻ അടുത്തകാലത്തായി പൊതുനിരത്തുകളിൽ വണ്ടി ഓടിക്കാറില്ലെന്ന കാര്യം മമ്മൂട്ടി വെളിപ്പെടുത്തി. റോഡുകൾ എത്ര നവീകരിച്ചാലും അതിനനുസരിച്ച് വാഹനങ്ങളുടെ എണ്ണവും നഗരങ്ങളിലെ തിരക്കും കുത്തനെ വർദ്ധിച്ചുകൊണ്ടിരിക്കുകയാണെന്നും, ഇന്നത്തെ ട്രാഫിക് സാഹചര്യങ്ങൾ വലിയ ആശങ്ക ഉണ്ടാക്കുന്നതാണെന്നും അദ്ദേഹം പറഞ്ഞു. വാഹനങ്ങളുടെ വർദ്ധനവുമൂലം റോഡപകടങ്ങൾ പെരുകുന്ന സാഹചര്യത്തിൽ ഓരോ വാഹനയാത്രികനും വലിയ തോതിലുള്ള ജാഗ്രതയും റോഡ് മര്യാദകളും അത്യന്താപേക്ഷിതമാണെന്ന് അദ്ദേഹം ഓർമ്മിപ്പിച്ചു.
റോഡപകടങ്ങൾ പരമാവധി കുറയ്ക്കുന്നതിനും ജനങ്ങളിൽ ഗതാഗത നിയമങ്ങളെക്കുറിച്ച് കൃത്യമായ ബോധവൽക്കരണം നടത്തുന്നതിനുമായി സംസ്ഥാന സർക്കാർ ആവിഷ്കരിച്ച അതിപ്രധാന പദ്ധതിയാണ് ‘ജീവ സുയാത്ര മിഷൻ’. ചടങ്ങിൽ സിനിമാ-സാംസ്കാരിക-രാഷ്ട്രീയ രംഗത്തെ പ്രമുഖർ സംബന്ധിച്ചു. മമ്മൂട്ടി തന്റെ സിനിമാനുഭവങ്ങളുടെയും വ്യക്തിജീവിതത്തിന്റെയും പശ്ചാത്തലത്തിൽ സംസാരിച്ച റോഡ് സുരക്ഷാ കാര്യങ്ങൾ ചടങ്ങിൽ പങ്കെടുത്തവരെയും ആരാധകരെയും ഒരുപോലെ ചിന്തിപ്പിക്കുന്നതായിരുന്നു. അശ്രദ്ധമായി വാഹനമോടിക്കുന്ന യുവതലമുറയ്ക്ക് മാതൃകാപരവും ശക്തവുമായ സന്ദേശമാണ് മെഗാസ്റ്റാർ ഈ ചടങ്ങിലൂടെ നൽകിയിരിക്കുന്നത്.
