കേരളത്തിൽ അറ്റകുറ്റപ്പണികൾ നടക്കുന്നതിന്റെ ഭാഗമായി പരശുറാം എക്സ്പ്രസ് ഉൾപ്പെടെയുള്ള പ്രമുഖ ട്രെയിനുകളുടെ സർവീസുകളിൽ മാറ്റം വരുത്തി ദക്ഷിണ റെയിൽവേ. തിരുവനന്തപുരം സെൻട്രൽ – മംഗളൂരു സെൻട്രൽ റൂട്ടിൽ സർവീസ് നടത്തുന്ന പരശുറാം എക്സ്പ്രസ്, ചെന്നൈ സെൻട്രൽ – പാലക്കാട് ജങ്ഷൻ സൂപ്പർഫാസ്റ്റ് എക്സ്പ്രസ്, തിരുച്ചെന്തൂർ – പാലക്കാട് ജങ്ഷൻ എക്സ്പ്രസ് തുടങ്ങിയ ട്രെയിനുകളാണ് വിവിധ ദിവസങ്ങളിൽ ഭാഗികമായി റദ്ദാക്കിയിരിക്കുന്നത്. പാലക്കാട് ഡിവിഷന് കീഴിൽ ട്രാക്ക് മെയിന്റനൻസ് ജോലികൾ പുരോഗമിക്കുന്ന പശ്ചാത്തലത്തിലാണ് ഈ നടപടി.
യാത്രക്കാർ ഏറെ ആശ്രയിക്കുന്ന മംഗളൂരു സെൻട്രൽ – കന്യാകുമാരി പരശുറാം എക്സ്പ്രസ് (16649) നവംബർ 16, 20 തീയതികളിൽ തിരുവനന്തപുരത്തിനും കന്യാകുമാരിക്കും ഇടയിൽ ഭാഗികമായി റദ്ദാക്കിയിട്ടുണ്ട്. ഈ ദിവസങ്ങളിൽ ട്രെയിൻ തിരുവനന്തപുരം സെൻട്രൽ സ്റ്റേഷനിൽ വെച്ച് സർവീസ് അവസാനിപ്പിക്കും. തിരുവനന്തപുരത്തിനും കന്യാകുമാരിക്കും ഇടയിൽ ഈ ദിവസങ്ങളിൽ ട്രെയിൻ സർവീസ് ഉണ്ടായിരിക്കില്ല. തിരിച്ചുള്ള സർവീസായ കന്യാകുമാരി – മംഗളൂരു സെൻട്രൽ പരശുറാം എക്സ്പ്രസ് (16650) നവംബർ 17, 21 തീയതികളിൽ കന്യാകുമാരിക്കും തിരുവനന്തപുരത്തിനും ഇടയിലും സർവീസ് റദ്ദാക്കി. ഈ ദിവസങ്ങളിൽ കന്യാകുമാരിക്ക് പകരം തിരുവനന്തപുരം സെൻട്രലിൽ നിന്നാകും ട്രെയിൻ മംഗളൂരുവിലേക്ക് സർവീസ് ആരംഭിക്കുക.
പരശുറാം എക്സ്പ്രസിന് പുറമെ മറ്റ് പ്രധാന ട്രെയിനുകളുടെയും സമയക്രമത്തിലും സർവീസ് ദൂരത്തിലും മാറ്റം വരുത്തിയിട്ടുണ്ട്. ചെന്നൈ സെൻട്രൽ – പാലക്കാട് ജങ്ഷൻ സൂപ്പർഫാസ്റ്റ് എക്സ്പ്രസ് (22651) നവംബർ 13 മുതൽ 24 വരെ പാലക്കാട് ജങ്ഷന് പകരം പാലക്കാട് ടൗൺ സ്റ്റേഷനിൽ സർവീസ് അവസാനിപ്പിക്കും. തിരിച്ചുള്ള സർവീസായ പാലക്കാട് ജങ്ഷൻ – ചെന്നൈ സെൻട്രൽ സൂപ്പർ ഫാസ്റ്റ് എക്സ്പ്രസ് (22652) നവംബർ 14 മുതൽ 25 വരെ പാലക്കാട് ജങ്ഷനിൽ നിന്ന് പുറപ്പെടുന്നതിന് പകരം പാലക്കാട് ടൗൺ സ്റ്റേഷനിൽ നിന്നാകും സർവീസ് ആരംഭിക്കുക.
കൂടാതെ, തിരുച്ചെന്തൂർ – പാലക്കാട് ജങ്ഷൻ എക്സ്പ്രസ് (16732) നവംബർ 14 മുതൽ 25 വരെ പാലക്കാട് ടൗണിൽ യാത്ര അവസാനിപ്പിക്കും. പാലക്കാട് ജങ്ഷൻ – തിരുച്ചെന്തൂർ എക്സ്പ്രസ് (16731) നവംബർ 15 മുതൽ 26 വരെ പാലക്കാട് ടൗൺ സ്റ്റേഷനിൽ നിന്നാകും തിരുച്ചെന്തൂരിലേക്ക് പുറപ്പെടുക. അവധി ദിവസങ്ങളിലും മറ്റും യാത്ര ചെയ്യാൻ തയ്യാറെടുക്കുന്നവർ റെയിൽവേയുടെ ഈ യാത്രാനിയന്ത്രണങ്ങൾ മുൻകൂട്ടി കണ്ട് യാത്രകൾ ക്രമീകരിക്കണമെന്ന് അധികൃതർ അഭ്യർത്ഥിച്ചു. ട്രെയിനുകളുടെ സമയക്രമത്തിലും മറ്റ് മാറ്റങ്ങളെക്കുറിച്ചും കൂടുതൽ വിവരങ്ങൾ അറിയാൻ റെയിൽവേയുടെ ഔദ്യോഗിക ആപ്പുകളോ ഹെൽപ്‌ലൈൻ നമ്പറുകളോ ബന്ധപ്പെടാവുന്നതാണ്.
