ഹൈദരാബാദിൽ നടന്ന ‘ഭാരത് ഉച്ചകോടി’യിൽ രാഹുൽ ഗാന്ധിയുടെ പ്രചാരണത്തെ പിന്തുണച്ച് യൂറോപ്യൻ സോഷ്യലിസ്റ്റ് നേതാവ് നടത്തിയ വിവാദ പരാമർശങ്ങൾക്ക് ശക്തമായ മറുപടിയുമായി ഇറ്റാലിയൻ ഭരണസഖ്യത്തിലെ പ്രമുഖ നേതാവും ഫോർസ ഇറ്റാലിയ (Forza Italia) എം.പിയുമായ ഡെബോറ ബെർഗമിനി. 97 കോടി പൗരന്മാർക്ക് വോട്ടവകാശമുള്ള ലോകത്തിലെ ഏറ്റവും വലിയ ജനാധിപത്യ രാജ്യത്തിന് ജനാധിപത്യത്തെക്കുറിച്ച് ക്ലാസെടുക്കാൻ ആരും മുതിരേണ്ടെന്ന് അവർ തുറന്നടിച്ചു. ഇറ്റാലിയൻ പ്രധാനമന്ത്രി ജോർജിയ മെലോനിയുടെ ഭരണസഖ്യത്തിലെ പ്രധാന ഘടകകക്ഷിയായ ഫോർസ ഇറ്റാലിയയുടെ ഡെപ്യൂട്ടി സെക്രട്ടറി കൂടിയായ ബെർഗമിനി, ഇന്ത്യയുടെ തിരഞ്ഞെടുപ്പ് സംവിധാനത്തെയും ജനാധിപത്യ സ്ഥാപനങ്ങളെയും ശക്തമായി പിന്തുണച്ചുകൊണ്ടാണ് രംഗത്തെത്തിയത്.
കഴിഞ്ഞ ദിവസം ഹൈദരാബാദിൽ നടന്ന ഉച്ചകോടിയിൽ, പാർട്ടി ഓഫ് യൂറോപ്യൻ സോഷ്യലിസ്റ്റ്സ് (പി.ഇ.എസ്) സെക്രട്ടറി ജനറൽ ജാക്കോമോ ഫിലിബെക്ക് ഇന്ത്യൻ തിരഞ്ഞെടുപ്പ് പ്രക്രിയയെയും സർക്കാരിനെയും വിമർശിച്ച് സംസാരിച്ചിരുന്നു. വോട്ടർ പട്ടികയിലെ ക്രമക്കേടുകൾക്കെതിരെ കോൺഗ്രസ് നേതാവ് രാഹുൽ ഗാന്ധി നടത്തുന്ന പ്രചാരണത്തിന് ഐക്യദാർഢ്യം പ്രഖ്യാപിച്ച ഫിലിബെക്ക്, പ്രതിപക്ഷത്തിന്റെ ‘വോട്ട് ചോർ, ഗദ്ദി ഛോഡ്’ (വോട്ട് കള്ളന്മാരേ, അധികാരം ഒഴിയൂ) എന്ന മുദ്രാവാക്യം വേദിയിൽ ആവർത്തിക്കുകയും ചെയ്തു. ഇന്ത്യയിൽ ജനാധിപത്യം ആക്രമിക്കപ്പെടുകയാണെന്നും അതിനെ സംരക്ഷിക്കാൻ രാഹുൽ ഗാന്ധിക്കും കോൺഗ്രസ് പാർട്ടിക്കുമൊപ്പം നിൽക്കണമെന്നുമായിരുന്നു അദ്ദേഹത്തിന്റെ ആഹ്വാനം.
ഇന്ത്യയുടെ ആഭ്യന്തര രാഷ്ട്രീയ വിഷയങ്ങളിൽ വിദേശ നേതാവ് നടത്തിയ ഈ ഇടപെടലിനെയാണ് ഡെബോറ ബെർഗമിനി രൂക്ഷമായി വിമർശിച്ചത്. 970 ദശലക്ഷം (97 കോടി) ജനങ്ങളെ തിരഞ്ഞെടുപ്പ് പ്രക്രിയയിൽ പങ്കാളികളാക്കുന്ന ഒരു രാജ്യത്തിന് ജനാധിപത്യ മൂല്യങ്ങളെക്കുറിച്ച് ഉപദേശം നൽകുന്നത് തികച്ചും അനുചിതമാണെന്ന് അവർ ചൂണ്ടിക്കാട്ടി. ഇന്ത്യയ്ക്ക് കരുത്തുറ്റ സ്വന്തം ജനാധിപത്യ സ്ഥാപനങ്ങളും സ്വതന്ത്രമായ നീതിന്യായ വ്യവസ്ഥയുമുണ്ടെന്നും, ആഭ്യന്തര കാര്യങ്ങൾ കൈകാര്യം ചെയ്യാൻ രാജ്യത്തിന് പ്രാപ്തിയുണ്ടെന്നും ബെർഗമിനി എടുത്തുപറഞ്ഞു.
ഇന്ത്യൻ മണ്ണിൽ വെച്ച് വിദേശ പ്രതിനിധി ഭരണകൂടത്തിനെതിരെ രാഷ്ട്രീയ മുദ്രാവാക്യങ്ങൾ വിളിച്ചതിനെതിരെ രാജ്യത്തിനകത്തും വലിയ പ്രതിഷേധം ഉയർന്നിരുന്നു. കോൺഗ്രസ് വിദേശ ശക്തികളെ കൂട്ടുപിടിച്ച് രാജ്യത്തിന്റെ ജനാധിപത്യ സ്ഥാപനങ്ങളെ അപകീർത്തിപ്പെടുത്താൻ ശ്രമിക്കുകയാണെന്ന വിമർശനം ഭരണപക്ഷവും ഉന്നയിച്ചിരുന്നു. ഇതിനിടെയാണ് യൂറോപ്പിൽ നിന്നുതന്നെ ഇന്ത്യൻ ജനാധിപത്യത്തിന്റെ കരുത്തിനെ പിന്തുണച്ചുകൊണ്ടും യൂറോപ്യൻ സോഷ്യലിസ്റ്റ് നേതാവിന്റെ നിലപാടിനെ തള്ളിക്കൊണ്ടും പ്രമുഖ ഇറ്റാലിയൻ നേതാവിന്റെ പ്രതികരണം പുറത്തുവന്നിരിക്കുന്നത്.








