ജമ്മു കശ്മീരിലെ കുൽഗാമിൽ സി.ആർ.പി.എഫ് ചെക്ക്പോസ്റ്റിന് നേരെയുണ്ടായ ഭീകരാക്രമണത്തിന് പിന്നാലെ താഴ്വരയിൽ സുരക്ഷാസേനയുടെ വ്യാപക തിരച്ചിൽ. ആക്രമണത്തിന് പിന്നിൽ പ്രവർത്തിച്ചവരെക്കുറിച്ച് നിർണ്ണായകമായ തെളിവുകളും സൂചനകളും ലഭിച്ചതായി സി.ആർ.പി.എഫ് സ്പെഷ്യൽ ഡയറക്ടർ ജനറൽ സന്ദീപ് ഖിർവാർ വ്യക്തമാക്കി. കഴിഞ്ഞ അഞ്ച് ദിവസമായി ജമ്മു കശ്മീർ പോലീസ്, സി.ആർ.പി.എഫ്, സൈന്യം എന്നിവയുടെ സംയുക്ത സംഘം കുൽഗാമിലെ വിവിധ ഗ്രാമങ്ങളിൽ ശക്തമായ തിരച്ചിൽ തുടരുകയാണ്. അന്വേഷണത്തിന്റെ ഭാഗമായി അഞ്ഞൂറിലധികം യുവാക്കളെ പോലീസ് കസ്റ്റഡിയിലെടുത്ത് ചോദ്യം ചെയ്തു. ഇവരിൽ ഭൂരിഭാഗം പേരെയും ചോദ്യം ചെയ്യലിന് ശേഷം വിട്ടയച്ചു.
കഴിഞ്ഞ ബുധനാഴ്ച കുൽഗാമിലെ അഖ്റാന് സമീപമുള്ള ചെക്ക്പോസ്റ്റിന് നേരെ ഭീകരർ നടത്തിയ വെടിവെപ്പിൽ മൂന്ന് സി.ആർ.പി.എഫ് ജവാന്മാർക്ക് പരിക്കേറ്റിരുന്നു. ഇതിൽ ഒരാളുടെ നില ഗുരുതരമാണ്. ലെഫ്റ്റനന്റ് ഗവർണർ മനോജ് സിൻഹ വേഷോ (Veshow) ഉത്സവം ഉദ്ഘാടനം ചെയ്യാൻ കുൽഗാമിൽ എത്തിയ സമയത്തായിരുന്നു ഈ ആക്രമണം. തിരച്ചിലിനിടെ അക്രമികളിലൊരാളുടേതെന്ന് കരുതുന്ന മൊബൈൽ ഫോൺ പോലീസ് കണ്ടെടുത്തിട്ടുണ്ട്. ആക്രമണത്തിന്റെ ദൃശ്യങ്ങൾ ക്യാമറയിൽ പതിഞ്ഞതായും പോലീസ് വൃത്തങ്ങൾ അറിയിച്ചു. പ്രാദേശിക ലഷ്കർ-ഇ-തൊയ്ബ ഭീകരൻ ലത്തീഫ് അഹമ്മദ് ഭട്ടും രണ്ട് പാകിസ്താൻ ഭീകരരുമാണ് ആക്രമണത്തിന് പിന്നിലെന്നാണ് പോലീസിന്റെ പ്രാഥമിക നിഗമനം.
അക്രമികൾക്കായി തിരച്ചിൽ ഊർജിതമാക്കിയിട്ടുണ്ടെന്നും മറ്റ് അന്വേഷണ ഏജൻസികളുമായി ചേർന്ന് പ്രതികളെ നിയമത്തിന് മുന്നിൽ കൊണ്ടുവരുമെന്നും സന്ദീപ് ഖിർവാർ പറഞ്ഞു. ജമ്മു കശ്മീർ സാധാരണ നിലയിലേക്ക് മടങ്ങിക്കൊണ്ടിരിക്കുകയാണെന്നും അവശേഷിക്കുന്ന ഭീകരവാദ വെല്ലുവിളികളെയും പൂർണ്ണമായി അടിച്ചമർത്തുമെന്നും അദ്ദേഹം കൂട്ടിച്ചേർത്തു. ഭീകരരുടെ സാന്നിധ്യമുണ്ടെന്ന രഹസ്യവിവരത്തെ തുടർന്ന് ഉന്നത പോലീസ്-സൈനിക ഉദ്യോഗസ്ഥരുടെ മേൽനോട്ടത്തിൽ ഞായറാഴ്ച രാത്രി വൈകിയും മേഖലയിൽ തിരച്ചിൽ നടത്തിയിരുന്നു.








