2025 നവംബറിൽ ഡൽഹിയിലെ ചെങ്കോട്ട മെട്രോ സ്റ്റേഷന് സമീപമുണ്ടായ കാർ ബോംബ് സ്ഫോടനവുമായി ബന്ധപ്പെട്ട് ജമ്മു കശ്മീരിലും ഹരിയാനയിലും രജിസ്റ്റർ ചെയ്ത രണ്ട് ക്രിമിനൽ കേസുകൾ ഡൽഹിയിലെ പ്രത്യേക എൻ.ഐ.എ കോടതിയിലേക്ക് മാറ്റാൻ സുപ്രീം കോടതി ഉത്തരവിട്ടു. ജസ്റ്റിസ് പ്രശാന്ത് കുമാർ മിശ്ര, ജസ്റ്റിസ് ശ്രീ ചന്ദ്രശേഖർ എന്നിവരടങ്ങിയ ബെഞ്ചാണ് ദേശീയ അന്വേഷണ ഏജൻസിയുടെ (എൻ.ഐ.എ) ഹർജി അംഗീകരിച്ച് നിർണ്ണായക ഉത്തരവ് പുറപ്പെടുവിച്ചത്. ഈ മൂന്ന് കേസുകളും ഒരേ വലിയ ഗൂഢാലോചനയുടെ ഭാഗമാണെന്നും, പ്രതികളും തെളിവുകളും പരസ്പരം ബന്ധപ്പെട്ടിരിക്കുന്നതിനാൽ ഒരുമിച്ച് വിചാരണ നടത്തണമെന്നുമുള്ള എൻ.ഐ.എയുടെ ആവശ്യം കോടതി അംഗീകരിക്കുകയായിരുന്നു. ഇതോടെ മൂന്ന് എഫ്.ഐ.ആറുകളും ഒരുമിച്ച് ചേർത്ത് ഡൽഹിയിലെ പ്രത്യേക എൻ.ഐ.എ കോടതിയിൽ സംയുക്ത വിചാരണ നടക്കും.
2025 നവംബർ 10-നാണ് ചെങ്കോട്ട മെട്രോ സ്റ്റേഷന്റെ മൂന്നാം നമ്പർ ഗേറ്റിന് സമീപം സ്ഫോടകവസ്തുക്കൾ നിറച്ച ഹ്യുണ്ടായ് കാർ പൊട്ടിത്തെറിച്ച് 13 പേർ കൊല്ലപ്പെടുകയും നിരവധി പേർക്ക് പരിക്കേൽക്കുകയും ചെയ്തത്. ഫരീദാബാദിലെ അൽ-ഫലാഹ് സർവകലാശാലയുമായി ബന്ധമുള്ള ഡോ. ഉമർ ഉൻ നബിയാണ് കാർ ഓടിച്ചിരുന്നതെന്നും ഇയാൾ സ്ഫോടനത്തിൽ കൊല്ലപ്പെട്ടതായും അന്വേഷണത്തിൽ കണ്ടെത്തിയിരുന്നു. ഡോക്ടർമാർ ഉൾപ്പെടെയുള്ള ഉന്നത വിദ്യാഭ്യാസമുള്ള പ്രൊഫഷണലുകൾ ഉൾപ്പെട്ട ‘വൈറ്റ് കോളർ’ ഭീകരശൃംഖലയാണ് സ്ഫോടനത്തിന് പിന്നിലെന്ന് എൻ.ഐ.എ വ്യക്തമാക്കി. നിരോധിത ഭീകരസംഘടനയായ അൻസാർ ഗസ്വത്തുൽ ഹിന്ദുമായി ബന്ധമുള്ള ഈ ‘ഡോക്ടർ മൊഡ്യൂൾ’ ശൃംഖല രാജ്യസുരക്ഷയെ അസ്ഥിരപ്പെടുത്താൻ വലിയ തോതിലുള്ള ആക്രമണങ്ങൾ ആസൂത്രണം ചെയ്തിരുന്നതായും അന്വേഷണ ഏജൻസികൾ കോടതിയെ അറിയിച്ചു.
സ്ഫോടനത്തിന് പിന്നാലെ വിവിധ സംസ്ഥാനങ്ങളിൽ നടന്ന അന്വേഷണത്തിൽ ജമ്മു കശ്മീർ പോലീസിന്റെ സ്റ്റേറ്റ് ഇൻവെസ്റ്റിഗേഷൻ ഏജൻസി (എസ്.ഐ.എ) നാല് ഡോക്ടർമാർ ഉൾപ്പെടെ പത്ത് പ്രതികളെ അറസ്റ്റ് ചെയ്തിരുന്നു. കൂടാതെ, ഫരീദാബാദിലെ ധൗജ് പോലീസ് സ്റ്റേഷൻ പരിധിയിൽ നിന്ന് വൻതോതിൽ സ്ഫോടകവസ്തുക്കൾ കണ്ടെടുത്തതിനെ തുടർന്ന് ഹരിയാന പോലീസും ഡോക്ടർമാരടക്കമുള്ളവർക്കെതിരെ കേസെടുക്കുകയും അറസ്റ്റ് രേഖപ്പെടുത്തുകയും ചെയ്തിരുന്നു. ഈ കേസുകളിലെല്ലാം പൊതുവായ പ്രതികളും തെളിവുകളും ഉള്ളതിനാൽ, വിചാരണ നടപടികൾ വേഗത്തിലാക്കുന്നതിനും ആശയക്കുഴപ്പം ഒഴിവാക്കുന്നതിനുമാണ് എല്ലാ കേസുകളും ഡൽഹിയിലെ കോടതിയിലേക്ക് മാറ്റിയത്. നേരത്തെ സെപ്റ്റംബറിൽ ഈ കേസിലെ 12 പ്രതികൾക്കെതിരെ എൻ.ഐ.എ 75,000 പേജുള്ള കുറ്റപത്രം സമർപ്പിച്ചിരുന്നു.










