2027-ലെ ക്യു.എസ് വേൾഡ് യൂണിവേഴ്സിറ്റി സുസ്ഥിരതാ റാങ്കിംഗിൽ (QS World University Rankings: Sustainability) ഇന്ത്യൻ ഉന്നതവിദ്യാഭ്യാസ സ്ഥാപനങ്ങൾ ശ്രദ്ധേയമായ നേട്ടം കൈവരിച്ചു. ആഗോളതലത്തിൽ 194-ാം സ്ഥാനം നേടിയ ഐ.ഐ.ടി ഡൽഹി ആദ്യ 200-ൽ ഇടംപിടിക്കുകയും ഇന്ത്യയിൽ ഒന്നാം സ്ഥാനത്തെത്തുകയും ചെയ്തു. ഐ.ഐ.ടി ഖരഗ്പൂർ 224-ാം സ്ഥാനത്തും ഡൽഹി സർവകലാശാല 237-ാം സ്ഥാനത്തും എത്തി. 2023-ന് ശേഷം ആദ്യമായി ജവഹർലാൽ നെഹ്റു സർവകലാശാല (ജെ.എൻ.യു) ആഗോളതലത്തിൽ ആദ്യ 500 സ്ഥാപനങ്ങളുടെ പട്ടികയിലേക്ക് തിരിച്ചെത്തിയതും ഇത്തവണത്തെ വലിയ പ്രത്യേകതയാണ്.
ആകെ 13 ഇന്ത്യൻ സ്ഥാപനങ്ങളാണ് ഇത്തവണ ആഗോളതലത്തിൽ ആദ്യ 500-ൽ ഇടംനേടിയത്. 2023-ൽ ഈ പട്ടികയിൽ അഞ്ച് ഇന്ത്യൻ സ്ഥാപനങ്ങൾ മാത്രമായിരുന്നു ഉണ്ടായിരുന്നത്. വെല്ലൂർ ഇൻസ്റ്റിറ്റ്യൂട്ട് ഓഫ് ടെക്നോളജി (വി.ഐ.ടി) ആദ്യമായി ആഗോളതലത്തിൽ ആദ്യ 300-ലും മണിപ്പാൽ അക്കാദമി ഓഫ് ഹയർ എഡ്യൂക്കേഷൻ ആദ്യ 400-ലും ഇടംനേടി. ചണ്ഡീഗഡ് സർവകലാശാല, സവീത ഇൻസ്റ്റിറ്റ്യൂട്ട് ഓഫ് മെഡിക്കൽ ആൻഡ് ടെക്നിക്കൽ സയൻസസ് എന്നിവ ആദ്യമായി ആദ്യ 600-ൽ എത്തിയിട്ടുണ്ട്. ആകെ 99 ഇന്ത്യൻ സ്ഥാപനങ്ങൾ പട്ടികയിൽ ഇടംപിടിച്ചപ്പോൾ ഇതിൽ എട്ടെണ്ണം ആദ്യമായാണ് റാങ്കിംഗിൽ ഉൾപ്പെടുന്നത്.
പരിസ്ഥിതി-സാമൂഹിക ആഘാതം, ഭരണനിർവ്വഹണം തുടങ്ങിയ മാനദണ്ഡങ്ങൾ അടിസ്ഥാനമാക്കിയാണ് ക്യു.എസ് സുസ്ഥിരതാ റാങ്കിംഗ് തയ്യാറാക്കുന്നത്. സമത്വം, തൊഴിൽക്ഷമത എന്നീ മേഖലകളിൽ 70 ശതമാനത്തിലധികം ഇന്ത്യൻ സ്ഥാപനങ്ങൾ മികച്ച പുരോഗതി കൈവരിച്ചതായി ക്യു.എസ് സി.ഇ.ഒ ജെസീക്ക ടർണർ വ്യക്തമാക്കി. 2023-ൽ 14 ഇന്ത്യൻ സ്ഥാപനങ്ങൾ മാത്രമുണ്ടായിരുന്ന പട്ടികയിലാണ് ഇപ്പോൾ 99 സ്ഥാപനങ്ങൾ ഇടംപിടിച്ചിരിക്കുന്നത്. ഇക്കാലയളവിൽ ഇന്ത്യൻ സ്ഥാപനങ്ങളുടെ ശരാശരി സ്കോർ 26.9-ൽ നിന്ന് 55 ആയി ഉയർന്നതും രാജ്യത്തെ ഉന്നതവിദ്യാഭ്യാസ മേഖലയുടെ വളർച്ചയെയാണ് സൂചിപ്പിക്കുന്നത്.









