ഐക്യരാഷ്ട്രസഭയും ഓർഗനൈസേഷൻ ഓഫ് ഇസ്ലാമിക് കോഓപ്പറേഷനും (OIC) തമ്മിലുള്ള സഹകരണം സംബന്ധിച്ച കരട് പ്രമേയത്തിന്റെ ചർച്ചകളിൽ നിന്ന് ഇന്ത്യയെയും മറ്റ് ചില അംഗരാജ്യങ്ങളെയും മനഃപൂർവ്വം ഒഴിവാക്കിയ തുർക്കിയുടെ നടപടിക്കെതിരെ യു.എൻ പൊതുസഭയിൽ ആഞ്ഞടിച്ച് ഇന്ത്യ. തുർക്കിയുടെ ഈ നീക്കം അങ്ങേയറ്റം നഗ്നവും ബോധപൂർവ്വവുമാണെന്ന് (Blatant and intentional) കുറ്റപ്പെടുത്തിയ ഇന്ത്യ, തിങ്കളാഴ്ച നടന്ന വോട്ടെടുപ്പിൽ പ്രമേയത്തിനെതിരെ വോട്ട് രേഖപ്പെടുത്തി. ഇറാഖ് അവതരിപ്പിച്ച പ്രമേയം 112 രാജ്യങ്ങളുടെ പിന്തുണയോടെ പാസായെങ്കിലും, ഇന്ത്യയ്ക്കൊപ്പം അർമേനിയ, സൈപ്രസ്, ഗ്രീസ്, ഇസ്രായേൽ, അമേരിക്ക എന്നീ ആറ് രാജ്യങ്ങൾ പ്രമേയത്തെ ശക്തമായി എതിർത്ത് വോട്ട് ചെയ്തു. 39 രാജ്യങ്ങൾ വോട്ടെടുപ്പിൽ നിന്ന് വിട്ടുനിന്നു.
പ്രമേയത്തിന്റെ ചർച്ചകൾക്ക് മധ്യസ്ഥത വഹിച്ച (Facilitator) തുർക്കി സ്വീകരിച്ച ഏകപക്ഷീയമായ നിലപാടുകളെ യു.എന്നിലെ ഇന്ത്യയുടെ ഡെപ്യൂട്ടി സ്ഥിരം പ്രതിനിധി അംബാസഡർ യോജന പട്ടേൽ രൂക്ഷമായ ഭാഷയിലാണ് വിമർശിച്ചത്. കരട് പ്രമേയത്തിന്റെ വിവിധ ഘട്ടങ്ങളിലുള്ള പകർപ്പുകൾ വിതരണം ചെയ്തപ്പോൾ ഇന്ത്യൻ പ്രതിനിധി സംഘത്തെയും മറ്റ് നിരവധി രാജ്യങ്ങളെയും ഒ.ഐ.സിയുടെ സ്ഥിരം നിരീക്ഷക മിഷൻ മനഃപൂർവ്വം ഒഴിവാക്കി. ഇത് ഞെട്ടിക്കുന്നതാണെന്നും, സ്വന്തം അജണ്ടകൾ നടപ്പിലാക്കാൻ ചില പ്രത്യേക അംഗരാജ്യങ്ങളെ മാറ്റിനിർത്തുന്നത് യു.എന്നിൽ തെറ്റായ കീഴ്വഴക്കം സൃഷ്ടിക്കുമെന്നും യോജന പട്ടേൽ തുറന്നടിച്ചു. പല രാജ്യങ്ങളും എതിർപ്പ് രേഖപ്പെടുത്തിയിട്ടും തിരുത്താൻ തുർക്കി തയ്യാറായില്ലെന്നും, ഇത് അബദ്ധത്തിൽ സംഭവിച്ചതല്ല മറിച്ച് കൃത്യമായ ആസൂത്രണത്തോടെ ചെയ്തതാണെന്നും ഇന്ത്യ ആരോപിച്ചു. വിഷയത്തിൽ യു.എൻ പൊതുസഭാ പ്രസിഡന്റ് അടിയന്തര അന്വേഷണം നടത്തണമെന്നും ഭാവിയിൽ ഇത്തരം സംഭവങ്ങൾ ആവർത്തിക്കാതിരിക്കാൻ നടപടിയെടുക്കണമെന്നും ഇന്ത്യ ആവശ്യപ്പെട്ടു.
കശ്മീർ വിഷയത്തിൽ ഇടപെടാനുള്ള ഒ.ഐ.സിയുടെ നീക്കത്തെയും പാകിസ്ഥാന്റെ ഇരട്ടത്താപ്പിനെയും ഇന്ത്യ കടുത്ത ഭാഷയിൽ വിമർശിച്ചു. കഴിഞ്ഞ ജൂലൈയിൽ ഇസ്ലാമാബാദിൽ നടന്ന ഒ.ഐ.സി വനിതാ മന്ത്രിതല സമ്മേളനത്തിൽ ജമ്മു കശ്മീരിനെ പരാമർശിച്ചുകൊണ്ട് പാസാക്കിയ പ്രഖ്യാപനത്തെ കരട് പ്രമേയത്തിൽ ഉൾപ്പെടുത്തിയതിനെ ഇന്ത്യ തള്ളിക്കളഞ്ഞു. **’ഇന്ത്യയുടെ ആഭ്യന്തര കാര്യങ്ങളിൽ അഭിപ്രായം പറയാൻ ഒ.ഐ.സിക്ക് യാതൊരു അധികാരവുമില്ല. ഇടുങ്ങിയ രാഷ്ട്രീയ താൽപ്പര്യങ്ങൾക്കായി ഒ.ഐ.സി വേദിയെ ദുരുപയോഗം ചെയ്യുകയാണ്’ എന്ന് യോജന പട്ടേൽ വ്യക്തമാക്കി. ഒരു അംഗരാജ്യം (പാകിസ്ഥാൻ) തങ്ങളുടെ വ്യാജവും അടിസ്ഥാനരഹിതവുമായ ആരോപണങ്ങൾ ഉന്നയിക്കാനുള്ള ആയുധമായി ഒ.ഐ.സിയെ നിരന്തരം ഉപയോഗിക്കുന്നത് നിർഭാഗ്യകരമാണെന്നും ഇന്ത്യ ഓർമ്മിപ്പിച്ചു. സ്വന്തം പൗരന്മാരുടെ താൽപ്പര്യങ്ങൾ സംരക്ഷിക്കാൻ പരമാധികാര രാജ്യങ്ങൾക്ക് അറിയാമെന്നും, ഒരേ മതത്തിൽപ്പെട്ടവർക്ക് മാത്രമേ വിശ്വാസികളുടെ താൽപ്പര്യങ്ങൾ സംരക്ഷിക്കാൻ കഴിയൂ എന്ന പിന്തിരിപ്പൻ ചിന്താഗതിക്ക് ഇന്നത്തെ ലോകത്ത് സ്ഥാനമില്ലെന്നും ഇന്ത്യ ശക്തമായി തിരിച്ചടിച്ചു.
ഇന്ത്യയ്ക്ക് പുറമെ സൈപ്രസ്, ഗ്രീസ്, അയർലൻഡ്, അമേരിക്ക എന്നീ രാജ്യങ്ങളും തുർക്കിയുടെ നടപടിക്കെതിരെ രംഗത്തെത്തി. ചർച്ചകളിൽ സുതാര്യതയും എല്ലാവരെയും ഉൾക്കൊള്ളുന്ന സമീപനവും തുർക്കി പാലിച്ചില്ലെന്ന് സൈപ്രസും ഗ്രീസും കുറ്റപ്പെടുത്തി. യൂറോപ്യൻ യൂണിയൻ നൽകിയ ഭേദഗതി നിർദ്ദേശങ്ങൾ പോലും പരിഗണിക്കാതെയാണ് കരട് തയ്യാറാക്കിയതെന്ന് യൂറോപ്യൻ യൂണിയന് വേണ്ടി സംസാരിച്ച അയർലൻഡും വ്യക്തമാക്കി. ഭാവിയിലെങ്കിലും വിവാദ വിഷയങ്ങൾ ഒഴിവാക്കി സമവായത്തിലൂടെയുള്ള സഹകരണത്തിന് ഒ.ഐ.സി പ്രമേയങ്ങൾ ഊന്നൽ നൽകണമെന്ന് അമേരിക്കയും ആവശ്യപ്പെട്ടു.










