രാജ്യത്തെ പ്രമുഖ വാഹന-വ്യവസായ ഗ്രൂപ്പായ ടി.വി.എസ് (TVS) കുടുംബത്തിൽ വൻ സ്വത്ത് തർക്കം. ടി.വി.എസ് ഗ്രൂപ്പിലെ മുതിർന്ന വ്യവസായിയും എമരിറ്റസ് ചെയർമാനുമായ വേണു ശ്രീനിവാസന്റെ മകൾ ലക്ഷ്മി വേണു, പിതാവിന്റെ സ്വത്തുക്കളിൽ തുല്യ വിഹിതം ആവശ്യപ്പെട്ട് ഔദ്യോഗികമായി അവകാശവാദം ഉന്നയിച്ചു. വേണു ശ്രീനിവാസന്റെ കീഴിലുള്ള കൂട്ടുകുടുംബ സ്വത്തുക്കൾ നിയമപരമായി ഭാഗം വെക്കണമെന്നാണ് ലക്ഷ്മിയുടെ പ്രധാന ആവശ്യം.
2005-ൽ ഭേദഗതി ചെയ്ത 1956-ലെ ഹിന്ദു പിന്തുടർച്ചാവകാശ നിയമപ്രകാരം പിതൃസ്വത്തിൽ തനിക്ക് തുല്യ വിഹിതത്തിന് നിയമപരമായ അർഹതയുണ്ടെന്ന് ലക്ഷ്മി വാദിക്കുന്നു. നിയമത്തിലെ സെക്ഷൻ 6 ഉദ്ധരിച്ചുകൊണ്ട്, കൂട്ടുകുടുംബ സ്വത്തുക്കളിൽ ആൺമക്കൾക്കുള്ള അതേ ജന്മാവകാശം പെൺമക്കൾക്കുമുണ്ടെന്ന് അവർ വ്യക്തമാക്കി. ഇത് സംബന്ധിച്ച് പിതാവിനും സഹോദരൻ സുദർശൻ വേണുവിനും, വി.എസ് ട്രസ്റ്റിനും (VS Trust) ലക്ഷ്മി ഔദ്യോഗികമായി നിയമനോട്ടീസ് അയച്ചിട്ടുണ്ട്.
വി.എസ് ട്രസ്റ്റ്, മറ്റ് ഹോൾഡിംഗ് സ്ഥാപനങ്ങൾ എന്നിവ വഴിയുള്ള കോടിക്കണക്കിന് രൂപയുടെ കുടുംബ ഓഹരികളാണ് ഇപ്പോൾ തർക്കത്തിലുള്ളത്. 2020-ലെ ടി.വി.എസ് കുടുംബ കരാർ പ്രകാരം വേണു ശ്രീനിവാസൻ വിഭാഗത്തിന് ലഭിച്ച ബിസിനസ്സുകളും നിക്ഷേപങ്ങളും ഇതിൽ ഉൾപ്പെടുന്നു. പ്രമുഖ കമ്പനികളായ ടി.വി.എസ് ഹോൾഡിംഗ്സ്, ടി.വി.എസ് മോട്ടോർ കമ്പനി, ടി.വി.എസ് ക്രെഡിറ്റ് സർവീസസ്, സുന്ദരം-ക്ലേട്ടൺ എന്നിവയിലെ ഓഹരികളും സ്വത്തുക്കളുമാണ് ഈ തർക്കത്തിന്റെ പരിധിയിലുള്ളത്.
നിലവിൽ സുന്ദരം-ക്ലേട്ടൺ ലിമിറ്റഡിന്റെ മാനേജിംഗ് ഡയറക്ടറായി പ്രവർത്തിക്കുകയാണ് ലക്ഷ്മി വേണു. സഹോദരൻ സുദർശൻ വേണു ടി.വി.എസ് മോട്ടോർ കമ്പനിയുടെ മാനേജിംഗ് ഡയറക്ടറാണ്. ദക്ഷിണേന്ത്യയിലെ ഏറ്റവും പ്രബലമായ ബിസിനസ് കുടുംബങ്ങളിലൊന്നിൽ ഉടലെടുത്തിരിക്കുന്ന ഈ പിന്തുടർച്ചാവകാശ തർക്കം കോർപ്പറേറ്റ് ലോകത്ത് വലിയ ചർച്ചകൾക്കാണ് വഴിവെച്ചിരിക്കുന്നത്. കുടുംബത്തിനുള്ളിലെ ഓഹരി പങ്കാളിത്തത്തിലും കമ്പനികളുടെ ഭരണനിയന്ത്രണത്തിലും ഈ നീക്കം നിർണ്ണായക സ്വാധീനം ചെലുത്തുമെന്നാണ് വിലയിരുത്തപ്പെടുന്നത്.










