കൊച്ചി: സ്വർണപ്രേമികൾക്കും വിവാഹ ആവശ്യങ്ങൾക്കായി ആഭരണങ്ങൾ വാങ്ങാനിരിക്കുന്നവർക്കും വലിയ ആശ്വാസം പകർന്ന് സംസ്ഥാനത്ത് സ്വർണവില വീണ്ടും കുത്തനെ ഇടിഞ്ഞു. വ്യാഴാഴ്ച ഒരു പവൻ 22 കാരറ്റ് സ്വർണത്തിന്റെ വിലയിൽ 1,880 രൂപയുടെ കുറവാണ് രേഖപ്പെടുത്തിയത്. ഇതോടെ ഒരു പവൻ സ്വർണത്തിന്റെ വില 95,840 രൂപയായി താഴ്ന്നു. ഗ്രാമിന് 235 രൂപ കുറഞ്ഞ് 11,980 രൂപയിലാണ് ഇന്ന് വ്യാപാരം നടക്കുന്നത്. തുടർച്ചയായ ദിവസങ്ങളിൽ വില ഒരു ലക്ഷം രൂപയ്ക്ക് താഴെ തുടരുന്നത് ഉപഭോക്താക്കൾക്ക് വലിയ ആശ്വാസമാണ് നൽകുന്നത്.
കഴിഞ്ഞ ഏതാനും ദിവസങ്ങളായി സംസ്ഥാനത്ത് സ്വർണവില തുടർച്ചയായി താഴുന്ന പ്രവണതയാണ് ദൃശ്യമാകുന്നത്.ബുധനാഴ്ച മാത്രം പവന് 2,040 രൂപയുടെ ഇടിവ് രേഖപ്പെടുത്തിയിരുന്നു. കഴിഞ്ഞ രണ്ടാഴ്ചയ്ക്കിടെ മാത്രം കേരളത്തിൽ ഒരു പവൻ സ്വർണത്തിന് 11,240 രൂപയാണ് കുറഞ്ഞത്. ഈ വർഷം ജനുവരി 29-ന് രാവിലെ രേഖപ്പെടുത്തിയ പവന് 1,31,160 രൂപയാണ് ഇതുവരെയുള്ള സർവകാല റെക്കോഡ് നിരക്ക്. അന്നത്തെ റെക്കോഡ് നിരക്കുമായി താരതമ്യം ചെയ്യുമ്പോൾ, വെറും പത്തുമാസം കൊണ്ട് പവൻ വിലയിൽ 35,320 രൂപയുടെ വൻ ഇടിവാണ് സംഭവിച്ചിരിക്കുന്നത്. ഗ്രാം വിലയിൽ 4,415 രൂപയുടെ കുറവുണ്ടായി. ഇതിനുമുൻപ് 2025 ഡിസംബറിലാണ് കേരളത്തിൽ പവൻ വില 95,000 രൂപ നിരക്കിലുണ്ടായിരുന്നത്.
അമേരിക്കൻ കേന്ദ്രബാങ്കായ യു.എസ്. ഫെഡറൽ റിസർവിന്റെ നയങ്ങളാണ് ആഗോളതലത്തിൽ സ്വർണവിലയ്ക്ക് കനത്ത തിരിച്ചടിയായത്. യു.എസിൽ പണപ്പെരുപ്പം സഹനപരിധിയായ രണ്ട് ശതമാനത്തിൽ നിന്ന് നാല് ശതമാനത്തിനും മുകളിലേക്ക് ഉയർന്നതോടെ, പണപ്പെരുപ്പം നിയന്ത്രിക്കുന്നതിനായി അടിസ്ഥാന പലിശനിരക്കുകൾ കുത്തനെ കൂട്ടാനാണ് ഫെഡറൽ റിസർവിന്റെ നീക്കം. പലിശനിരക്ക് ഉയർത്തുമെന്ന സൂചനകൾ വന്നതോടെ നിക്ഷേപകർ സ്വർണത്തിൽ നിന്ന് ലാഭമെടുത്ത് പിൻമാറുന്നതും ഡോളർ ശക്തിപ്പെടുന്നതും വിലയിടിവിന് ആക്കം കൂട്ടി.
അന്താരാഷ്ട്ര വിപണിയിൽ ഒരു ട്രോയ് ഔൺസ് (31.1 ഗ്രാം) തനിത്തങ്കത്തിന്റെ വില 3,725 ഡോളറിലേക്ക് താഴ്ന്നിട്ടുണ്ട്. ജനുവരി അവസാനവാരത്തിൽ അന്താരാഷ്ട്ര വിപണിയിൽ സ്വർണവില ഔൺസിന് 5,595 ഡോളറിനടുത്ത് എത്തി റെക്കോഡ് സൃഷ്ടിച്ചിരുന്നു. ആ നിലയിൽ നിന്ന് അന്താരാഷ്ട്ര വിപണിയിലുണ്ടായ ഇടിവ് അതിരൂക്ഷമാണ്. എങ്കിലും ആഗോള വിപണിയിലെ ഈ വൻ ഇടിവിന്റെ പൂർണ്ണമായ പ്രയോജനം ആഭ്യന്തര വിപണിയിൽ ലഭിക്കാത്തതിന് കാരണം ഇറക്കുമതിത്തീരുവയിൽ വരുത്തിയ വർദ്ധനവും രൂപയുടെ മൂല്യത്തിലുണ്ടായ വ്യതിയാനങ്ങളുമാണ്. അന്താരാഷ്ട്ര വിപണിയിൽ സമ്മർദം തുടരുകയും വില 3,500 ഡോളറിലേക്ക് താഴുകയും ചെയ്താൽ, വരും ദിവസങ്ങളിൽ കേരളത്തിൽ പവൻ വില 90,000 രൂപയിലേക്കുവരെ കുറയാൻ സാധ്യതയുണ്ടെന്നാണ് സാമ്പത്തിക വിദഗ്ധരുടെ വിലയിരുത്തൽ.
22 കാരറ്റിന് പുറമെ 18 കാരറ്റ് സ്വർണത്തിന്റെ വിലയിലും ഇന്ന് വലിയ ഇടിവുണ്ടായിട്ടുണ്ട്. 18 കാരറ്റ് സ്വർണം ഗ്രാമിന് 195 രൂപ താഴ്ന്ന് 9,805 രൂപയിലെത്തി. സ്വർണത്തിന് പിന്നാലെ സംസ്ഥാനത്ത് വെള്ളിവിലയിലും ഇടിവ് രേഖപ്പെടുത്തി.വെള്ളി ഗ്രാമിന് അഞ്ച് രൂപ കുറഞ്ഞ് 180 രൂപയിലാണ് വ്യാപാരം നടക്കുന്നത്. വില കുത്തനെ താഴ്ന്നതോടെ ജ്വല്ലറികളിൽ മുൻകൂർ ബുക്കിങ്ങുകൾ വർദ്ധിക്കാൻ സാധ്യതയുണ്ടെന്ന് വ്യാപാരികൾ പ്രതീക്ഷിക്കുന്നു.












