സ്വകാര്യ ആശുപത്രി അധികൃതരെ വ്യാജവാർത്ത നൽകി ഭീഷണിപ്പെടുത്തി 10 ലക്ഷം രൂപ തട്ടിയെടുത്ത കേസിൽ അറസ്റ്റിലായ ഡി.സി.സി അംഗം സുഹൈൽ ഷാജഹാൻ പണം കൈപ്പറ്റുന്ന നിർണ്ണായക വീഡിയോ ദൃശ്യങ്ങൾ പുറത്ത്. ആശുപത്രിക്കെതിരെ ഓൺലൈൻ മാധ്യമത്തിൽ വ്യാജവാർത്ത പ്രസിദ്ധീകരിച്ച ശേഷം, അത് പിൻവലിക്കുന്നതിനായി ആശുപത്രി അധികൃതരെ ഭീഷണിപ്പെടുത്തി പണം വാങ്ങുന്ന ദൃശ്യങ്ങളാണ് ഇപ്പോൾ പുറത്തുവന്നിരിക്കുന്നത്. ആനയറ സബൈൻ ഹോസ്പിറ്റൽ ചെയർമാൻ ഡോ. സബൈൻ ശിവദാസിന്റെ പരാതിയിൽ പേട്ട പോലീസാണ് കഠിനംകുളം സ്വദേശിയായ സുഹൈൽ ഷാജഹാനെ കഴിഞ്ഞ ദിവസം കൈയോടെ പിടികൂടിയത്. സുഹൈൽ ഉൾപ്പെടെ അഞ്ച് പേർക്കെതിരെയാണ് പോലീസ് കേസെടുത്തിരിക്കുന്നത്.
ആശുപത്രിയുടെ സൽപ്പേരിന് കളങ്കം വരുത്തുന്ന തരത്തിൽ വ്യാജവാർത്ത നൽകിയ ശേഷം, വാർത്ത പിൻവലിക്കാൻ 10 ലക്ഷം രൂപ നൽകണമെന്നായിരുന്നു സംഘത്തിന്റെ ആവശ്യം. പണം നൽകിയില്ലെങ്കിൽ കൂടുതൽ വ്യാജവാർത്തകൾ പ്രചരിപ്പിച്ച് ആശുപത്രിയുടെ പ്രവർത്തനം തകർക്കുമെന്നും ഇവർ ഭീഷണിപ്പെടുത്തി. തുടർന്ന് ആശുപത്രി അധികൃതർ തിരുവനന്തപുരം സിറ്റി പോലീസ് കമ്മീഷണർക്ക് രഹസ്യമായി പരാതി നൽകുകയായിരുന്നു.
പൊലീസ് നിർദ്ദേശപ്രകാരം പണം നൽകാമെന്ന് ആശുപത്രി അധികൃതർ സുഹൈലിനെ അറിയിച്ചു. ഇതനുസരിച്ച് ഇന്നലെ പണം വാങ്ങുന്നതിനായി സുഹൈൽ ആശുപത്രിയിൽ എത്തിയപ്പോൾ ജീവനക്കാർ ഉടൻ തന്നെ പോലീസിനെ വിവരമറിയിച്ചു. ആശുപത്രി അധികൃതരിൽ നിന്ന് 10 ലക്ഷം രൂപ കൈപ്പറ്റി പുറത്തിറങ്ങുന്നതിനിടെ, പേട്ട എസ്.എച്ച്.ഒയുടെ നേതൃത്വത്തിലുള്ള പോലീസ് സംഘം ഇയാളെ വളഞ്ഞ് പിടികൂടുകയായിരുന്നു. കൈപ്പറ്റിയ പണവും ഇയാളിൽ നിന്ന് പോലീസ് കണ്ടെടുത്തിട്ടുണ്ട്.
2022 ജൂണിൽ നടന്ന കോളിളക്കം സൃഷ്ടിച്ച എ.കെ.ജി സെന്റർ ആക്രമണക്കേസിലെ പ്രതി കൂടിയാണ് അറസ്റ്റിലായ സുഹൈൽ ഷാജഹാൻ. എന്നാൽ, അച്ചടക്ക നടപടികളുടെ ഭാഗമായി സുഹൈലിനെ നേരത്തെ തന്നെ പാർട്ടിയിൽ നിന്ന് പുറത്താക്കിയതാണെന്നും നിലവിൽ ഇയാൾക്ക് കോൺഗ്രസുമായി യാതൊരു ബന്ധവുമില്ലെന്നുമാണ് കോൺഗ്രസ് നേതൃത്വത്തിന്റെ വിശദീകരണം. കേസിലെ മറ്റ് നാല് പ്രതികൾക്കായി പോലീസ് അന്വേഷണം ഊർജിതമാക്കിയിട്ടുണ്ട്.










