കൊച്ചി: എറണാകുളം ജംഗ്ഷൻ റെയിൽവേ സ്റ്റേഷനിൽ ഓടിക്കൊണ്ടിരുന്ന ട്രെയിനിൽ കയറാൻ ശ്രമിക്കുന്നതിനിടെ യാത്രക്കാർ വാതിൽ അടച്ചതോടെ ട്രെയിൻ ടിക്കറ്റ് എക്സാമിനർ (ടി.ടി.ഇ) തലനാരിഴയ്ക്ക് വൻ അപകടത്തിൽ നിന്ന് രക്ഷപ്പെട്ടു. കോഴിക്കോട്–തിരുവനന്തപുരം ജനശതാബ്ദി എക്സ്പ്രസിലാണ് ബുധനാഴ്ച വൈകുന്നേരം നാടകീയ സംഭവങ്ങൾ അരങ്ങേറിയത്. ടി.ടി.ഇ ടിംസൺ തോമസിനാണ് ട്രെയിൻ നീങ്ങിത്തുടങ്ങിയതോടെ ഏകദേശം 200 മീറ്ററോളം ദൂരം വാതിലിൽ തൂങ്ങിപ്പിടിച്ച് ജീവൻ പണയം വെച്ച് നിൽക്കേണ്ടി വന്നത്. സംഭവവുമായി ബന്ധപ്പെട്ട് ടിക്കറ്റില്ലാതെ യാത്ര ചെയ്ത രണ്ട് ആലപ്പുഴ സ്വദേശികളെ റെയിൽവേ സംരക്ഷണ സേന (ആർ.പി.എഫ്) പിടികൂടി.
ബുധനാഴ്ച വൈകുന്നേരം ട്രെയിൻ എറണാകുളം ജംഗ്ഷനിൽ നിന്ന് പുറപ്പെടാൻ തുടങ്ങുമ്പോഴായിരുന്നു സംഭവം.ടിക്കറ്റ് പരിശോധന ഒഴിവാക്കുന്നതിനായി സാധുവായ ടിക്കറ്റില്ലാതിരുന്ന രണ്ട് യാത്രക്കാർ കോച്ചിന്റെ വാതിൽ അകത്തുനിന്ന് വലിച്ചടയ്ക്കുകയായിരുന്നുവെന്നാണ് പ്രാഥമിക നിഗമനം. ഈ സമയം വാതിൽപ്പടിയിലുണ്ടായിരുന്ന ടി.ടി.ഇ ടിംസൺ തോമസ് പിടിവിടാതെ വാതിലിൽ തൂങ്ങിക്കിടക്കുകയായിരുന്നു. പ്ലാറ്റ്ഫോമിലൂടെ ട്രെയിൻ വേഗതയെടുക്കുന്നതിനിടെ ടി.ടി.ഇ വാതിലിൽ തൂങ്ങിക്കിടക്കുന്നത് ശ്രദ്ധയിൽപ്പെട്ട ട്രെയിൻ ഗാർഡ് ഉടൻ തന്നെ അപായച്ചങ്ങല വലിച്ച് പ്ലാറ്റ്ഫോമിൽത്തന്നെ ട്രെയിൻ നിർത്തിച്ചു.
ട്രെയിൻ കൂടുതൽ ദൂരം മുന്നോട്ടുപോയിരുന്നെങ്കിലോ പ്ലാറ്റ്ഫോം കടന്നിരുന്നെങ്കിലോ ടി.ടി.ഇ താഴെ വീണ് ജീവൻ തന്നെ അപകടത്തിലാകുമായിരുന്നുവെന്ന് ആർ.പി.എഫ് ഉദ്യോഗസ്ഥർ വ്യക്തമാക്കി. ഗാർഡിന്റെ സമയോചിതമായ ഇടപെടലാണ് വലിയൊരു ദുരന്തം ഒഴിവാക്കിയത്. ട്രെയിൻ നിർത്തിയതോടെ വാതിലടച്ച യാത്രക്കാർ കോച്ചിൽ നിന്നിറങ്ങി റെയിൽവേ ട്രാക്കിലേക്ക് ചാടി രക്ഷപ്പെടാൻ ശ്രമിച്ചു. എന്നാൽ, പ്ലാറ്റ്ഫോമിലും പരിസരത്തുമായി നിലയുറപ്പിച്ചിരുന്ന ആർ.പി.എഫ് ഉദ്യോഗസ്ഥർ ഇവരെ പിന്തുടർന്ന് സാഹസികമായി പിടികൂടുകയായിരുന്നു.
ഡ്യൂട്ടിയിലിരുന്ന റെയിൽവേ ഉദ്യോഗസ്ഥന്റെ ജീവൻ അപകടത്തിലാക്കുന്ന തരത്തിൽ പെരുമാറിയതിനും ടിക്കറ്റില്ലാതെ യാത്ര ചെയ്തതിനും ഉൾപ്പെടെയുള്ള വകുപ്പുകൾ പ്രകാരം പ്രതികൾക്കെതിരെ കേസെടുത്ത് അന്വേഷണം ആരംഭിച്ചു.യാത്രക്കാർക്കിടയിലും റെയിൽവേ ജീവനക്കാർക്കിടയിലും വലിയ ആശങ്കയുണ്ടാക്കിയ സംഭവത്തിൽ, ട്രെയിനുകളിലും സ്റ്റേഷനുകളിലും സുരക്ഷാ പരിശോധനകളും ടിക്കറ്റ് പരിശോധനകളും കൂടുതൽ കർശനമാക്കുമെന്ന് റെയിൽവേ അധികൃതർ അറിയിച്ചു.









