ന്യൂഡൽഹി: ലോകമെമ്പാടുമുള്ള ഗെയിമിംഗ് പ്രേമികൾ ആകാംക്ഷയോടെ കാത്തിരുന്ന ‘ഗ്രാൻഡ് തെഫ്റ്റ് ഓട്ടോ 6’ (GTA 6) പുറത്തിറങ്ങിയ പശ്ചാത്തലത്തിൽ, യുവാക്കളുടെ ഭാഷയിൽ പ്രതിപക്ഷത്തിനെതിരെ ഒളിയമ്പെയ്ത് പ്രധാനമന്ത്രി നരേന്ദ്ര മോദി. മുൻ യു.പി.എ സർക്കാരിന്റെ ഭരണകാലവും നിലവിലെ എൻ.ഡി.എ സർക്കാരിന്റെ 13 വർഷത്തെ വികസന നേട്ടങ്ങളും താരതമ്യം ചെയ്തുകൊണ്ടുള്ള പ്രധാനമന്ത്രിയുടെ ഔദ്യോഗിക ഇൻസ്റ്റാഗ്രാം പോസ്റ്റാണ് ഇപ്പോൾ സോഷ്യൽ മീഡിയയിൽ തരംഗമാകുന്നത്. “ഇന്ത്യ ഇപ്പോൾ കളിക്കുന്നത് തികച്ചും പുതിയൊരു കളിയാണ്” (India is playing a whole new game) എന്ന അടിക്കുറിപ്പോടെയാണ് പ്രധാനമന്ത്രിയുടെ ഓഫീസ് ഈ പോസ്റ്റ് പങ്കുവെച്ചിരിക്കുന്നത്.
2013-ൽ ജി.ടി.എ 5 (GTA 5) പുറത്തിറങ്ങിയ കാലം മുതൽ ഇപ്പോൾ ജി.ടി.എ 6 എത്തുന്നതുവരെയുള്ള 13 വർഷത്തിനിടയിൽ ഇന്ത്യ എങ്ങനെയൊക്കെ ‘അപ്ഗ്രേഡ്’ (Upgrade) ആയി എന്ന് വ്യക്തമാക്കുന്ന കറൗസൽ (Carousel) ചിത്രങ്ങളാണ് പോസ്റ്റിലുള്ളത്. യുവാക്കൾക്കിടയിൽ ഏറെ പ്രചാരമുള്ള പോപ്പ് കൾച്ചർ (Pop Culture) റഫറൻസുകൾ ഉപയോഗിച്ച് പുതിയ തലമുറയുമായി സംവദിക്കുന്ന പ്രധാനമന്ത്രിയുടെ ശൈലിയിലുള്ള ഈ പോസ്റ്റ്,കോൺഗ്രസ് നേതൃത്വത്തിലുള്ള മുൻ യു.പി.എ ഭരണകൂടത്തിനെതിരെയുള്ള കൃത്യമായ രാഷ്ട്രീയ വിമർശനം കൂടിയാണ്.
കഴിഞ്ഞ ഒരു ദശാബ്ദത്തിനിടെ രാജ്യം കൈവരിച്ച സുപ്രധാന നാഴികക്കല്ലുകളാണ് പോസ്റ്റിലെ സ്ലൈഡുകളിൽ അക്കമിട്ട് നിരത്തുന്നത്. ഇതിൽ ഏറ്റവും പ്രധാനമായി എടുത്തുപറയുന്നത് രാജ്യത്തെ ദാരിദ്ര്യനിർമ്മാർജ്ജനത്തിൽ കൈവരിച്ച വൻ പുരോഗതിയാണ്. ഇതിനുപുറമെ, അടിസ്ഥാന സൗകര്യ വികസനം, ഡിജിറ്റൽ ഇന്ത്യ മുന്നേറ്റം,സാമ്പത്തിക വളർച്ച, ബഹിരാകാശ നേട്ടങ്ങൾ തുടങ്ങി വിവിധ മേഖലകളിൽ 2013-നേക്കാൾ ഇന്ത്യ എത്രത്തോളം മുന്നോട്ട് പോയി എന്നും ഗ്രാഫിക്സിലൂടെ അവതരിപ്പിക്കുന്നുണ്ട്. ജി.ടി.എ 5 ഇറങ്ങിയ 2013-ലെ സാഹചര്യത്തിൽ നിന്ന് മാറി, ലോകത്തിലെ തന്നെ മുൻനിര ശക്തിയായി ഇന്ത്യ മാറിയെന്നാണ് പോസ്റ്റിലൂടെ അവകാശപ്പെടുന്നത്.
പ്രധാനമന്ത്രിയുടെ ഔദ്യോഗിക ഇൻസ്റ്റാഗ്രാം ഹാൻഡിലിൽ പങ്കുവെച്ച ഈ പോസ്റ്റ് നിമിഷങ്ങൾക്കകം തന്നെ ലക്ഷക്കണക്കിന് ലൈക്കുകളും ഷെയറുകളുമായി വൈറലായിക്കഴിഞ്ഞു. ഗെയിമിംഗ് ലോകത്തെ ഏറ്റവും വലിയ റിലീസിനെ രാഷ്ട്രീയ നേട്ടങ്ങൾ അവതരിപ്പിക്കാനുള്ള വേദിയാക്കി മാറ്റിയതിനെ അനുകൂലിച്ചും പ്രതികൂലിച്ചും നിരവധി പേരാണ് കമന്റ് ബോക്സുകളിൽ എത്തുന്നത്. യുവവോട്ടർമാരെ ലക്ഷ്യമിട്ടുള്ള ബി.ജെ.പിയുടെ സോഷ്യൽ മീഡിയ പ്രചാരണ തന്ത്രത്തിന്റെ ഭാഗമായാണ് ഈ നീക്കത്തെ രാഷ്ട്രീയ നിരീക്ഷകർ വിലയിരുത്തുന്നത്.











