ഖലിസ്ഥാനി വിഘടനവാദി ഗുർപത്വന്ത് സിങ് പന്നൂനെ വധിക്കാൻ ഗൂഢാലോചന നടത്തിയെന്ന് ആരോപിച്ച് ദേശീയ സുരക്ഷാ ഉപദേഷ്ടാവ് അജിത് ഡോവലിനും മുൻ റോ മേധാവി സമന്ത് ഗോയലിനും സമൻസ് കൈമാറാൻ ഡൽഹി കോടതികളുടെ സഹായം തേടി അമേരിക്കൻ കോടതി. ന്യൂയോർക്കിലെ സതേൺ ഡിസ്ട്രിക്റ്റ് ഫെഡറൽ കോടതി ജഡ്ജി കാതറിൻ പോൾക്ക് ഫെയ്ലയാണ് ഇതുസംബന്ധിച്ച ഉത്തരവ് പുറപ്പെടുവിച്ചത്.
നവംബർ 13-ന് പുറപ്പെടുവിച്ച ഉത്തരവിൽ പട്യാല ഹൗസ് കോടതി, ദ്വാരക കോടതി, തീസ് ഹസാരി കോടതി എന്നിവയോടാണ് സമൻസും അനുബന്ധ രേഖകളും സ്വീകരിച്ച് അജിത് ദോവലിനും സമന്ത് ഗോയലിനും കൈമാറാൻ അമേരിക്കൻ കോടതി ആവശ്യപ്പെട്ടിരിക്കുന്നത്.
ഇന്ത്യൻ നിയമപ്രകാരവും അന്താരാഷ്ട്ര ഉടമ്പടിയായ ഹേഗ് കൺവെൻഷനിലെ ആർട്ടിക്കിൾ 19 പ്രകാരവുമാണ് ഈ അഭ്യർത്ഥന നടത്തുന്നതെന്ന് ഉത്തരവിൽ വ്യക്തമാക്കുന്നു. നേരത്തെ ഔദ്യോഗിക, നയതന്ത്ര മാർഗ്ഗങ്ങളിലൂടെ സമൻസ് കൈമാറാൻ നടത്തിയ ശ്രമങ്ങൾ വിജയിച്ചിരുന്നില്ല.
സിഖ്സ് ഫോർ ജസ്റ്റിസ് (SFJ) നേതാവായ ഗുർപത്വന്ത് സിങ് പന്നൂൻ 2024-ലാണ് ഈ സിവിൽ കേസ് ഫയൽ ചെയ്തത്. ഖലിസ്ഥാൻ പ്രസ്ഥാനവുമായി ബന്ധപ്പെട്ട് തന്നെ വധിക്കാൻ ഗൂഢാലോചന നടന്നുവെന്നാണ് പരാതിയിൽ ആരോപിക്കുന്നത്. ഇന്ത്യ സർക്കാർ, അജിത് ദോവൽ, സമന്ത് ഗോയൽ, വികാസ് യാദവ്, നിഖിൽ ഗുപ്ത തുടങ്ങിയവരെ കേസിൽ പ്രതികളായി ഉൾപ്പെടുത്തിയിട്ടുണ്ട്.
പന്നൂന്റെ കേസ് അടിസ്ഥാനരഹിതവും കെട്ടിച്ചമച്ചതുമാണെന്ന് ഇന്ത്യ നേരത്തെ തന്നെ തള്ളിക്കളഞ്ഞിരുന്നു. നിയമപരമായ ഇത്തരം രേഖകൾ ഇന്ത്യയുടെ കേന്ദ്ര അതോറിറ്റിയായ നിയമ മന്ത്രാലയം വഴിയാണ് കൈകാര്യം ചെയ്യേണ്ടതെന്നും വിദേശകാര്യ മന്ത്രാലയം വ്യക്തമാക്കിയിട്ടുണ്ട്. അതേസമയം, ഈ സമൻസ് ഇന്ത്യയിൽ നിയമപരമായി ബാധകമല്ലെന്നാണ് വൃത്തങ്ങൾ സൂചിപ്പിക്കുന്നത്.











