2027ലെ ഉത്തർപ്രദേശ് നിയമസഭാ തിരഞ്ഞെടുപ്പിന് മുന്നോടിയായി സമാജ്വാദി പാർട്ടി അധ്യക്ഷൻ അഖിലേഷ് യാദവിനെതിരെ വെല്ലുവിളിയുമായി മുഖ്യമന്ത്രി യോഗി ആദിത്യനാഥ്. അയോധ്യ മണ്ഡലത്തിൽ നിന്ന് മത്സരിക്കാൻ അഖിലേഷ് തയ്യാറാണെങ്കിൽ താനും അവിടെ നിന്ന് നാമനിർദേശ പത്രിക സമർപ്പിക്കുമെന്ന് യോഗി പ്രഖ്യാപിച്ചു. നവംബർ 19ന് ഗോരഖ്പൂരിലെ ക്യാമ്പിയർഗഞ്ചിൽ നടന്ന പൊതുപരിപാടിയിലായിരുന്നു അദ്ദേഹത്തിന്റെ പരാമർശം. “അഖിലേഷ് ജി, നിങ്ങൾ അയോധ്യയിൽ നിന്ന് മത്സരിക്കാൻ തയ്യാറാകൂ. ഞാനും അവിടെ നിന്ന് മത്സരിക്കും. നമുക്ക് നേരിട്ട് ഏറ്റുമുട്ടാം. നിങ്ങളെ വെല്ലുവിളിക്കുന്നവർക്ക് നേരിട്ടുള്ള പോരാട്ടത്തെ നേരിടാനുള്ള ധൈര്യമില്ല” എന്നായിരുന്നു യോഗിയുടെ വാക്കുകൾ. അഖിലേഷ് യാദവിന്റെ ധൈര്യത്തെ ചോദ്യം ചെയ്ത അദ്ദേഹം രാഷ്ട്രീയ എതിരാളികൾ ജനാധിപത്യപരമായ മത്സരത്തെ നേരിടണമെന്നും പറഞ്ഞു.
ഇതിന് പിന്നാലെ സമാജ്വാദി പാർട്ടിയുടെ മുൻ ഭരണകാലത്തെ നയങ്ങളെയും യോഗി രൂക്ഷമായി വിമർശിച്ചു. സംസ്ഥാനത്ത് അക്രമവും കലാപങ്ങളും മാഫിയാ പ്രവർത്തനങ്ങളും പ്രോത്സാഹിപ്പിച്ച ഭരണമായിരുന്നു അഖിലേഷിന്റേതെന്ന് അദ്ദേഹം ആരോപിച്ചു. സ്ത്രീകളുടെയും വ്യാപാരികളുടെയും സുരക്ഷ ഉറപ്പാക്കുന്നതിൽ മുൻ സർക്കാരുകൾ പരാജയപ്പെട്ടെന്നും യുവാക്കൾക്ക് തൊഴിൽ അവസരങ്ങൾ നൽകുന്നതിൽ വീഴ്ച വരുത്തിയെന്നും യോഗി കുറ്റപ്പെടുത്തി. രാമക്ഷേത്ര പ്രസ്ഥാനവുമായി ബന്ധപ്പെട്ട വിഷയങ്ങളും പ്രസംഗത്തിൽ അദ്ദേഹം ഉന്നയിച്ചു. അതേസമയം, ഗോരഖ്പൂരിൽ നടന്ന പരിപാടിയിൽ 792 കോടി രൂപയിലധികം ചെലവിൽ 55 വികസന പദ്ധതികൾക്ക് അദ്ദേഹം തുടക്കം കുറിക്കുകയും ചെയ്തു.
യോഗിയുടെ വെല്ലുവിളിക്ക് പിന്നിൽ അഖിലേഷ് യാദവ് നടത്തിയ നേരത്തെയുള്ള പരാമർശങ്ങളാണ്. ഗോരഖ്പൂരിൽ 20 കിലോമീറ്ററോളം നീണ്ട പി.ഡി.എ രഥയാത്ര നടത്തിയ അഖിലേഷ്, 2027ലെ തിരഞ്ഞെടുപ്പിൽ യോഗിയുടെ സ്വന്തം മണ്ഡലത്തിൽ പോലും ബിജെപിക്ക് തിരിച്ചടി നേരിടുമെന്ന് അവകാശപ്പെട്ടിരുന്നു. അയോധ്യയിൽ നിന്ന് മത്സരിക്കാൻ യോഗിയെ അദ്ദേഹം നേരത്തേ വെല്ലുവിളിക്കുകയും ചെയ്തിരുന്നു. എന്നാൽ അയോധ്യയിൽ സമാജ്വാദി പാർട്ടി ഇതിനകം തേജ്നാരായൺ പാണ്ഡെയെ സ്ഥാനാർഥിയായി പ്രഖ്യാപിച്ചിട്ടുണ്ടെന്നും യോഗിയെ നേരിടാൻ യുവ സ്ഥാനാർഥി മതിയെന്നും അഖിലേഷ് പ്രതികരിച്ചിരുന്നു. ഇരുനേതാക്കളുടെയും വാക്പോര് ശക്തമായതോടെ 2027ലെ നിയമസഭാ തിരഞ്ഞെടുപ്പിന് മുന്നോടിയായി ഉത്തർപ്രദേശിലെ രാഷ്ട്രീയ പോരാട്ടം കൂടുതൽ ശ്രദ്ധ നേടുകയാണ്. എന്നാൽ ഇരുവരും അയോധ്യയിൽ നിന്ന് മത്സരിക്കുമെന്ന് ഔദ്യോഗികമായി പ്രഖ്യാപിച്ചിട്ടില്ല.










