ഉത്തർപ്രദേശിലെ ഗോരഖ്പൂരിൽ സമാജ്വാദി പാർട്ടി (എസ്.പി) അധ്യക്ഷൻ അഖിലേഷ് യാദവ് നയിച്ച പി.ഡി.എ രഥയാത്രയ്ക്കിടെ അമിതവേഗതയിലെത്തിയ ബുൾഡോസർ (ജെ.സി.ബി) ഇടിച്ച് 14 വയസ്സുകാരൻ ദാരുണമായി കൊല്ലപ്പെട്ട സംഭവത്തിൽ മരിച്ച കുട്ടിയുടെ കുടുംബത്തെ മുഖ്യമന്ത്രി യോഗി ആദിത്യനാഥ് സന്ദർശിച്ചു. വ്യാഴാഴ്ച വൈകുന്നേരം ഗോരഖ്പൂരിലെ വീട്ടിലെത്തിയ മുഖ്യമന്ത്രി, പ്രാദേശിക ബി.ജെ.പി നേതാവിന്റെ മകനായ പത്താം ക്ലാസ് വിദ്യാർത്ഥി ആര്യവർധൻ സിംഗിന്റെ മാതാപിതാക്കളെ ആശ്വസിപ്പിക്കുകയും കുടുംബത്തിന് അഞ്ച് ലക്ഷം രൂപയുടെ ധനസഹായം പ്രഖ്യാപിക്കുകയും ചെയ്തു. സമാജ്വാദി പാർട്ടി പ്രവർത്തകരുടെ അരാജകത്വവും ഗുണ്ടായിസവുമാണ് നിരപരാധിയായ ഒരു കുട്ടിയുടെ ജീവനെടുത്തതെന്ന് യോഗി ആദിത്യനാഥ് ആരോപിച്ചു. വരുംതലമുറകൾ ഓർത്തിരിക്കുന്ന തരത്തിലുള്ള കർശന ശിക്ഷ കുറ്റക്കാർക്ക് ഉറപ്പാക്കുമെന്നും മാഫിയാ സംഘങ്ങളെ സംരക്ഷിക്കുന്ന എസ്.പിയുടെ ഗുണ്ടായിസത്തെ സർക്കാർ വീണ്ടും അടിച്ചമർത്തുമെന്നും അദ്ദേഹം വ്യക്തമാക്കി.
ബുധനാഴ്ച ഉച്ചയ്ക്ക് രണ്ട് മണിയോടെ സഹോദരിയെ വിളിക്കാൻ കേന്ദ്രീയ വിദ്യാലയത്തിലേക്ക് പോകുന്നതിനിടെ റോഡ് മുറിച്ചുകടക്കുകയായിരുന്ന ആര്യവർധൻ സിംഗിനെ, അഖിലേഷ് യാദവിന്റെ വാഹനവ്യൂഹത്തിന് പിന്നാലെ പുഷ്പവൃഷ്ടി നടത്തുന്നതിനായി കൊണ്ടുവന്ന ജെ.സി.ബി ഇടിച്ചുതെറിപ്പിക്കുകയായിരുന്നു. ഇടിയുടെ ആഘാതത്തിൽ റോഡ് ഡിവൈഡറിൽ തലയിടിച്ച് വീണ കുട്ടി സംഭവസ്ഥലത്ത് വെച്ച് തന്നെ മരണപ്പെട്ടു. അപകടത്തിന് പിന്നാലെ ജെ.സി.ബി ഡ്രൈവറും റാലി സംഘാടകരും സ്ഥലത്തുനിന്ന് ഓടിരക്ഷപ്പെട്ടതായി കുട്ടിയുടെ പിതാവ് ശ്രീനേത് ആരോപിച്ചു. സംഭവത്തിൽ അഞ്ച് സമാജ്വാദി പാർട്ടി നേതാക്കൾക്കും കണ്ടാലറിയാവുന്ന 66 പ്രവർത്തകർക്കുമെതിരെ പോലീസ് കേസെടുത്തിട്ടുണ്ട്.
കുട്ടിയുടെ മരണത്തിൽ അനുശോചനം അറിയിക്കാൻ പോലും സമാജ്വാദി പാർട്ടി നേതാക്കൾ തയ്യാറാകാത്തത് അവരുടെ ധാർഷ്ട്യത്തെയാണ് കാണിക്കുന്നതെന്ന് മുഖ്യമന്ത്രി യോഗി ആദിത്യനാഥ് വിമർശിച്ചു. അതേസമയം, റാലി അവസാനിച്ച് ജെ.സി.ബി മടങ്ങിയതിന് ശേഷമാണ് അപകടമുണ്ടായതെന്നും, സംഭവത്തിൽ പാർട്ടിക്ക് യാതൊരു പങ്കുമില്ലെന്നും സമാജ്വാദി പാർട്ടി വക്താവ് ഉദയ്വീർ സിംഗ് പ്രതികരിച്ചു. ഭരണകൂടം ആവശ്യമായ സുരക്ഷാ ക്രമീകരണങ്ങൾ ഒരുക്കിയില്ലെന്നും ബി.ജെ.പി തങ്ങളെ കള്ളക്കേസിൽ കുടുക്കാൻ ശ്രമിക്കുകയാണെന്നും അഖിലേഷ് യാദവ് ആരോപിച്ചു. എന്നാൽ, അഖിലേഷ് യാദവിനും റാലി സംഘാടകർക്കുമെതിരെ കൊലക്കുറ്റത്തിന് കേസെടുക്കണമെന്നാവശ്യപ്പെട്ട് കുട്ടിയുടെ കുടുംബവും ബി.ജെ.പി പ്രവർത്തകരും ഗോരഖ്പൂരിൽ റോഡ് ഉപരോധിച്ച് പ്രതിഷേധിച്ചു.










