ഭോപ്പാൽ: പക്ഷിപ്പനിക്കെതിരായ (H5N1) ഇന്ത്യയുടെ ആദ്യത്തെ തദ്ദേശീയ വാക്സിൻ കേന്ദ്ര കൃഷിമന്ത്രി ശിവരാജ് സിങ് ചൗഹാൻ രാജ്യത്തിന് സമർപ്പിച്ചു. മധ്യപ്രദേശിലെ ഭോപ്പാലിൽ നടന്ന ചടങ്ങിലാണ് കോഴികളെ മാരകമായ പക്ഷിപ്പനിയിൽ നിന്ന് സംരക്ഷിക്കുന്നതിനുള്ള ഈ വാക്സിൻ പുറത്തിറക്കിയത്. സാധാരണക്കാരായ കോഴി കർഷകർക്കും താങ്ങാനാകുന്ന തരത്തിൽ ഒരു ഡോസിന് ഒന്ന് മുതൽ രണ്ട് രൂപ വരെ മാത്രമാണ് വാക്സിന് വില നിശ്ചയിച്ചിരിക്കുന്നത്.
ഇന്ത്യൻ കൗൺസിൽ ഓഫ് അഗ്രികൾച്ചറൽ റിസർച്ചിന് (ICAR) കീഴിലുള്ള ഭോപ്പാലിലെ നാഷണൽ ഇൻസ്റ്റിറ്റ്യൂട്ട് ഓഫ് ഹൈ സെക്യൂരിറ്റി ആനിമൽ ഡിസീസസ് (ICAR-NIHSAD) ആണ് ഈ വാക്സിൻ തദ്ദേശീയമായി വികസിപ്പിച്ചെടുത്തത്. അതിതീവ്ര പക്ഷിപ്പനിക്ക് കാരണമാകുന്ന H5N1 വൈറസിന്റെ ‘ക്ലേഡ് 2.3.2.1a’ (Clade 2.3.2.1a) എന്ന പ്രത്യേക വകഭേദത്തിനെതിരെ നിർവീര്യമാക്കിയ വൈറസ് ഉപയോഗിച്ചാണ് ഇത് നിർമ്മിച്ചിരിക്കുന്നത്. ഈ വകഭേദത്തിനെതിരായ ലോകത്തിലെ തന്നെ ആദ്യത്തെ വാക്സിനാണിതെന്ന് കേന്ദ്രമന്ത്രി ശിവരാജ് സിങ് ചൗഹാൻ വ്യക്തമാക്കി.
വാക്സിൻ പുറത്തിറക്കുന്ന ചടങ്ങിൽ വെച്ച് ഭോപ്പാലിൽ 300 കോടി രൂപ ചെലവിൽ അത്യാധുനിക മൃഗരോഗ ഗവേഷണ ലബോറട്ടറി സ്ഥാപിക്കുമെന്നും കേന്ദ്രമന്ത്രി പ്രഖ്യാപിച്ചു. ഇന്ത്യയിൽ 2006-ലാണ് ആദ്യമായി പക്ഷിപ്പനി റിപ്പോർട്ട് ചെയ്തത്. അതിനുശേഷം രാജ്യത്തിന്റെ വിവിധ ഭാഗങ്ങളിൽ 500-ലധികം തവണ രോഗബാധയുണ്ടാകുകയും ലക്ഷക്കണക്കിന് പക്ഷികളെ കൊന്നൊടുക്കേണ്ടി വന്നതിലൂടെ കർഷകർക്ക് കോടിക്കണക്കിന് രൂപയുടെ നഷ്ടം സംഭവിക്കുകയും ചെയ്തിട്ടുണ്ട്.
കുറഞ്ഞ ചെലവിൽ തദ്ദേശീയമായി വികസിപ്പിച്ച ഈ വാക്സിൻ വിപണിയിൽ എത്തുന്നതോടെ രാജ്യത്തെ കോഴിവളർത്തൽ മേഖലയ്ക്ക് വലിയ ആശ്വാസമാകുമെന്നും, പക്ഷിപ്പനി മൂലമുണ്ടാകുന്ന സാമ്പത്തിക നഷ്ടം വലിയൊരളവ് വരെ തടയാൻ സാധിക്കുമെന്നുമാണ് വിദഗ്ധരുടെ വിലയിരുത്തൽ.









