പശ്ചിമേഷ്യയിലെ യുദ്ധസമാനമായ സാഹചര്യങ്ങൾ ആഗോളതലത്തിൽ ഊർജ്ജ വിതരണത്തെ ബാധിച്ചപ്പോഴും ഇന്ത്യയിൽ പാചകവാതക ക്ഷാമമുണ്ടാകാതെ സർക്കാർ തടസ്സമില്ലാത്ത വിതരണം ഉറപ്പാക്കിയെന്ന് പ്രധാനമന്ത്രി നരേന്ദ്ര മോദി വ്യക്തമാക്കി. ഉത്തർപ്രദേശിലെ ലഖ്നൗവിൽ നടന്ന അഞ്ചാമത് ദേശീയ കൗശൽ ദീക്ഷാന്ത് സമാരോഹിൽ (നൈപുണ്യ ബിരുദദാന ചടങ്ങ്) സംസാരിക്കുകയായിരുന്നു അദ്ദേഹം. ആഗോള വിതരണ ശൃംഖലയിൽ തടസ്സങ്ങളുണ്ടായ സമയത്ത് രാജ്യത്ത് വലിയൊരു ഊർജ്ജ പ്രതിസന്ധി ഉണ്ടാകാൻ പോവുകയാണെന്ന് ചിലർ ബോധപൂർവ്വം അഭ്യൂഹങ്ങൾ പരത്തി ജനങ്ങളിൽ പരിഭ്രാന്തി സൃഷ്ടിക്കാൻ ശ്രമിച്ചുവെന്നും പ്രധാനമന്ത്രി വിമർശിച്ചു. എന്നാൽ, കേന്ദ്രസർക്കാരിന്റെ കൃത്യമായ ആസൂത്രണവും നയതന്ത്ര ഇടപെടലുകളും കാരണം സാധാരണക്കാരുടെ അടുക്കളകളിൽ പാചകവാതകം മുടങ്ങാതെ എത്തുകയായിരുന്നു.
പശ്ചിമേഷ്യൻ സംഘർഷത്തിന് പിന്നാലെ ഹോർമുസ് കടലിടുക്ക് വഴിയുള്ള ചരക്കുനീക്കം വെല്ലുവിളിയായപ്പോൾ, ഇന്ത്യ വിവിധ രാജ്യങ്ങളുമായി ബന്ധപ്പെട്ട് ബദൽ മാർഗ്ഗങ്ങളിലൂടെ ക്രൂഡ് ഓയിലും എൽ.പി.ജിയും എത്തിക്കാൻ നടപടികൾ സ്വീകരിച്ചിരുന്നു.
ആഭ്യന്തര ഉത്പാദനം വർദ്ധിപ്പിച്ചും, എൽ.പി.ജിക്ക് പകരമായി പൈപ്പ് വഴിയുള്ള പ്രകൃതിവാതക (PNG) കണക്ഷനുകൾ വ്യാപിപ്പിച്ചും സർക്കാർ ഊർജ്ജ സുരക്ഷ ശക്തമാക്കി. കരിഞ്ചന്തയും പൂഴ്ത്തിവെപ്പും തടയാൻ രാജ്യവ്യാപകമായി കർശന പരിശോധനകൾ നടത്തുകയും ലക്ഷക്കണക്കിന് പുതിയ പി.എൻ.ജി കണക്ഷനുകൾ വേഗത്തിൽ നൽകുകയും ചെയ്തതിലൂടെ ക്ഷാമം പൂർണ്ണമായും ഒഴിവാക്കാൻ സാധിച്ചുവെന്ന് അധികൃതർ ചൂണ്ടിക്കാട്ടുന്നു.
വളർന്നുവരുന്ന പുതിയ മേഖലകളിൽ നൈപുണ്യമുള്ള യുവാക്കൾക്ക് വലിയ അവസരങ്ങളാണ് വരാനിരിക്കുന്നതെന്ന് ലഖ്നൗവിലെ ഇന്ദിരാഗാന്ധി പ്രതിഷ്ഠാനിൽ നടന്ന ചടങ്ങിൽ പ്രധാനമന്ത്രി ഓർമ്മിപ്പിച്ചു.
പൈപ്പ്ഡ് ഗ്യാസ് ശൃംഖലയുടെ വിപുലീകരണവും ഊർജ്ജ മേഖലയിലെ പുതിയ പദ്ധതികളും സാങ്കേതിക വിദഗ്ധർക്ക് നിരവധി തൊഴിലവസരങ്ങൾ സൃഷ്ടിക്കുന്നുണ്ട്. ഐ.ടി.ഐകളിൽ നിന്നും മറ്റ് നൈപുണ്യ പരിശീലന കേന്ദ്രങ്ങളിൽ നിന്നും പഠിച്ചിറങ്ങുന്ന യുവതലമുറ ‘വികസിത് ഭാരത്’ കെട്ടിപ്പടുക്കുന്നതിൽ നിർണ്ണായക പങ്കുവഹിക്കണമെന്നും, ഉത്തർപ്രദേശ് ഇന്ന് നിക്ഷേപങ്ങളുടെയും അടിസ്ഥാന സൗകര്യ വികസനത്തിന്റെയും കേന്ദ്രമായി മാറിയെന്നും അദ്ദേഹം കൂട്ടിച്ചേർത്തു.











