ന്യൂഡൽഹി: ഐസിസിയുടെ ജനുവരിയിലെ താരമായി ഇന്ത്യൻ ബാറ്റ്സ്മാൻ ശുഭ്മാൻ ഗില്ലിനെ തിരഞ്ഞെടുത്തു. ഏകദിനങ്ങളിലെ മികച്ച പ്രകടനമാണ് ഗില്ലിനെ നേട്ടത്തിന് അർഹനാക്കിയത്.
കഴിഞ്ഞ മാസം, പരിമിത ഓവർ ക്രിക്കറ്റിൽ റെക്കോർഡ് പ്രകടനമാണ് ശുഭ്മാൻ ഗിൽ കാഴ്ചവെച്ചത്. ശ്രീലങ്കയ്ക്കും ന്യൂസിലൻഡിനുമെതിരായ ഏകദിന പരമ്പരകളിൽ ഗംഭീര പ്രകടനമായിരുന്നു ഗില്ലിന്റേത്.
അതിമനോഹരമായ സ്ട്രോക് പ്ലേയിലൂടെയും ആക്രമണോത്സുകമായ ഷോട്ടുകളിലൂടെയും കളം നിറഞ്ഞ ഗിൽ, 567 റൺസാണ് ജനുവരിയിൽ അടിച്ച് കൂട്ടിയത്. ന്യൂസിലൻഡിനെതിരെ ഹൈദരാബാദിൽ നേടിയ ഇരട്ട സെഞ്ച്വറി താരത്തിന്റെ ഏറ്റവും മികച്ച ഇന്നിംഗ്സായാണ് വിലയിരുത്തപ്പെടുന്നത്.
ഇതിന് പുറമേ ശ്രീലങ്കയ്ക്കെതിരെയും ന്യൂസിലൻഡിനെതിരെയും ഓരോ സെഞ്ച്വറികൾ കൂടി ഗിൽ നേടിയിരുന്നു. അവസാന റൗണ്ടിൽ ന്യൂസിലൻഡ് താരം ഡെവൺ കോൺവേയെയും ഇന്ത്യൻ പേസർ മുഹമ്മദ് സിറാജിനെയും പിന്തള്ളിയാണ് ശുഭ്മാൻ ഗിൽ ഈ നേട്ടത്തിലെത്തിയത്.
