ഛത്തീസ്ഗഡിലെ ബിജാപൂർ ജില്ലയിൽ മാവോയിസ്റ്റുകൾ ഒളിപ്പിച്ചിരുന്ന വൻ സ്ഫോടകവസ്തു ശേഖരവും 900-ലധികം ഡിറ്റനേറ്ററുകളും സുരക്ഷാ സേന കണ്ടെടുത്തു. സി.ആർ.പി.എഫിന്റെ എലൈറ്റ് വിഭാഗമായ കോബ്ര (CoBRA) 204-ാം ബറ്റാലിയൻ നൽകിയ രഹസ്യവിവരത്തിന്റെ അടിസ്ഥാനത്തിൽ വെള്ളിയാഴ്ച പൂജാരികാങ്കർ ഗ്രാമത്തിന് സമീപമുള്ള വനമേഖലയിൽ നടത്തിയ സംയുക്ത പരിശോധനയിലാണ് പൂഴ്ത്തിവെച്ചിരുന്ന ഈ ഭീമൻ ശേഖരം കണ്ടെത്തിയത്.
455 ഇലക്ട്രിക് ഡിറ്റനേറ്ററുകൾ, 500 നോൺ-ഇലക്ട്രിക് ഡിറ്റനേറ്ററുകൾ, രണ്ട് മൾട്ടിമീറ്ററുകൾ, റേഡിയോ സെറ്റ് ബാറ്ററി ചാർജർ കപ്പുകൾ, മാവോയിസ്റ്റ് പ്രസിദ്ധീകരണങ്ങൾ, ലാപ്ടോപ്പ് അഡാപ്റ്ററുകൾ, മൾട്ടി-യുഎസ്ബി കാർഡ് റീഡറുകൾ തുടങ്ങിയ നിരവധി ഇലക്ട്രോണിക് ഉപകരണങ്ങളും ബോംബ് നിർമ്മാണ സാമഗ്രികളും നിലത്തു കുഴിച്ചിട്ട നിലയിൽ സുരക്ഷാ സേന പുറത്തെടുത്തു. തലേദിവസം കാറെഗുട്ട കുന്നുകൾക്ക് സമീപത്തുനിന്ന് 711 ബി.ജി.എൽ (Barrel Grenade Launcher) ഷെല്ലുകൾ കണ്ടെടുത്തതിന് തൊട്ടുപിന്നാലെയാണ് പൊലീസും സുരക്ഷാ സേനയും വീണ്ടും വൻ വിജയം കൊയ്തത്.
പ്രദേശത്ത് ഇപ്പോഴും പരിശോധന തുടരുകയാണെന്നും പൊതുജനങ്ങൾ വനമേഖലയിലേക്ക് പ്രവേശിക്കരുതെന്നും അധികൃതർ നിർദ്ദേശം നൽകിയിട്ടുണ്ട്. ഈ വർഷം മാർച്ച് 31-ഓടെ ഛത്തീസ്ഗഡിനെ ആയുധമേന്തിയ മാവോയിസ്റ്റ് മുക്ത സംസ്ഥാനമായി പ്രഖ്യാപിച്ചിരുന്നെങ്കിലും, വനത്തിനുള്ളിൽ പഴയകാലത്ത് ഒളിപ്പിച്ചു വെച്ച ആയുധശേഖരങ്ങൾ കണ്ടെത്തി സുരക്ഷിതമാക്കുന്നതിനുള്ള പ്രവർത്തനങ്ങൾ സുരക്ഷാ സേന ഊർജ്ജിതമായി തുടരുകയാണ്.
