ജന്മനാ കേൾവിശേഷിയും സംസാരശേഷിയുമില്ലാതെ ഇരുട്ടിലായിരുന്ന ഒരു കൂട്ടം കുരുന്നുകൾക്ക് കേൾവിയുടെയും ശബ്ദത്തിന്റെയും പുതിയ ലോകം തുറന്നുനൽകി മലയാളത്തിന്റെ പ്രിയനടൻ മമ്മൂട്ടി. ആലുവാ രാജഗിരി ആശുപത്രിയും മമ്മൂട്ടിയുടെ നേതൃത്വത്തിലുള്ള ‘കെയർ ആൻഡ് ഷെയർ ഇന്റർനാഷണൽ ഫൗണ്ടേഷനും’ സംയുക്തമായി നടപ്പിലാക്കുന്ന ‘കാതോട് കാതോരം’ പദ്ധതിയിലൂടെ സൗജന്യമായി കോക്ലിയർ ഇംപ്ലാന്റേഷൻ ശസ്ത്രക്രിയ പൂർത്തിയാക്കിയ കുട്ടികളുടെ സംഗമവേദിയിലാണ് വൈകാരിക നിമിഷങ്ങൾ അരങ്ങേറിയത്. ചടങ്ങിലേക്ക് അപ്രതീക്ഷിതമായി എത്തിയ മമ്മൂട്ടി, കേൾവി തിരിച്ചുകിട്ടിയ കുരുന്നുകളെ സാക്ഷിയാക്കി ബോർഡിൽ സ്വന്തം കൈകൊണ്ട് എഴുതിയത് ലോകത്തിലെ ഏറ്റവും മനോഹരമായ വാക്കാകുന്ന ‘അമ്മ’ എന്നായിരുന്നു.
നിശ്ശബ്ദതയുടെ താഴ്‌വരയിൽ നിന്ന് കോക്ലിയർ ഇംപ്ലാന്റേഷനിലൂടെയും തുടർന്നുള്ള ഓഡിറ്ററി വെർബൽ തെറാപ്പി പരിശീലനത്തിലൂടെയും ആ വാക്കുകൾ ഉച്ചരിച്ചു തുടങ്ങിയ കുരുന്നുകളും അവരുടെ മാതാപിതാക്കളും കണ്ണീരോടെയാണ് ഈ അപൂർവ്വ നിമിഷത്തിന് സാക്ഷ്യം വഹിച്ചത്. ലക്ഷക്കണക്കിന് രൂപ ചെലവ് വരുന്ന അത്യാധുനിക ശസ്ത്രക്രിയയും തുടർന്നുള്ള ചികിത്സകളും നിർദ്ധനരായ കുടുംബങ്ങൾക്ക് പൂർണ്ണമായും സൗജന്യമായാണ് ‘കാതോട് കാതോരം’ പദ്ധതിയിലൂടെ നൽകുന്നത്.
ശബ്ദത്തിന്റെ ലോകത്തേക്ക് തിരികെയെത്തിയ കുരുന്നുകളെ നെഞ്ചോട് ചേർത്ത മമ്മൂട്ടി, അവരോടൊപ്പം സമയം ചെലവഴിക്കുകയും സ്നേഹസമ്മാനങ്ങൾ കൈമാറുകയും ചെയ്തു. വൈകല്യങ്ങളെ മറികടന്ന് കുഞ്ഞുങ്ങൾ സാധാരണ ജീവിതത്തിലേക്ക് മടങ്ങിയെത്തുന്ന കാഴ്ച ഹൃദയസ്പർശിയാണെന്നും, ഈ ജീവകാരുണ്യ ദൗത്യം കൂടുതൽ നിർദ്ധന കുട്ടികളിലേക്ക് എത്തിക്കുമെന്നും ഫൗണ്ടേഷൻ അധികൃതരും രാജഗിരി ആശുപത്രി അധികൃതരും വ്യക്തമാക്കി.
