ന്യൂഡൽഹി: ലഡാക്കിലെ തന്ത്രപ്രധാനമായ ന്യോമ (Nyoma) എയർഫീൽഡിൽ ‘ഐഎൽ-76 എംഡി’ (IL-76MD) എന്ന സ്ട്രാറ്റജിക് സിവിലിയൻ/സൈനിക ഗതാഗത വിമാനം വിജയകരമായി നിലത്തിറക്കി ഇന്ത്യൻ വ്യോമസേന. ലോകത്ത് ഏതൊരു ഐഎൽ-76 വിമാനവും നടത്തുന്ന ഏറ്റവും ഉയർന്ന ഉയരത്തിലുള്ള (Highest-Altitude Landing) ചരിത്രപരമായ ലാൻഡിംഗാണിത്. വ്യോമസേനാ പൈലറ്റുമാരുടെ സമാനതകളില്ലാത്ത പ്രൊഫഷണലിസവും വിമാനത്തിന്റെ പരുക്കൻ ശേഷിയുമാണ് ഈ നേട്ടത്തിന് പിന്നിലെന്ന് വ്യോമസേന ഔദ്യോഗികമായി അറിയിച്ചു.
സമുദ്രനിരപ്പിൽ നിന്നും 13,629 അടി ഉയരത്തിൽ സ്ഥിതി ചെയ്യുന്ന ന്യോമ എയർബേസ്, യഥാർത്ഥ നിയന്ത്രണ രേഖയ്ക്ക് (LAC) കേവലം 35 കിലോമീറ്റർ മാത്രം അകലെയാണ്. മുൻപ് ഹെലികോപ്റ്ററുകളും എഎൻ-32 പോലുള്ള ചെറിയ തന്ത്രപ്രധാന വിമാനങ്ങളും മാത്രം ഉപയോഗിച്ചിരുന്ന ഈ എയർബേസ്, ബോർഡർ റോഡ്സ് ഓർഗനൈസേഷന്റെ (BRO) ‘പ്രൊജക്റ്റ് ഹിമാങ്ക്’ വഴി മൈനസ് 40 ഡിഗ്രി തണുപ്പിനെ വരെ പ്രതിരോധിക്കുന്ന കോൺക്രീറ്റ് റൺവേ നിർമ്മിച്ച് അത്യാധുനിക എയർബേസാക്കി മാറ്റുകയായിരുന്നു. ഇതോടെ പോർവിമാനങ്ങൾക്കും കനത്ത ഭാരം വഹിക്കുന്ന സ്ട്രാറ്റജിക് എയർലിഫ്റ്റ് വിമാനങ്ങൾക്കും ഇവിടുത്തെ പ്രവർത്തനങ്ങൾ എളുപ്പമായി.
1980-കളുടെ മധ്യത്തിൽ വ്യോമസേനയുടെ ഭാഗമായ റഷ്യൻ നിർമ്മിത ‘ഗജരാജ്’ (IL-76) വിമാനങ്ങൾക്ക് ഏകദേശം 45 ടൺ ഭാരമുള്ള യുദ്ധടാങ്കുകളും സവാര വാഹനങ്ങളും യുദ്ധോപകരണങ്ങളും വഹിക്കാൻ ശേഷിയുണ്ട്. ചൈനീസ് അതിർത്തിക്ക് തൊട്ടടുത്ത് ഇത്രയും വലിയ സ്ട്രാറ്റജിക് വിമാനം ഇറക്കാൻ കഴിഞ്ഞത് അതിർത്തിയിലേക്ക് വേഗത്തിൽ സൈന്യത്തെയും കനത്ത ആയുധങ്ങളെയും എത്തിക്കാനുള്ള ഇന്ത്യയുടെ പ്രതിരോധ ശേഷിയെ ഇരട്ടിയാക്കി വർദ്ധിപ്പിക്കും. ലേ, തോയ്‌സ്, കാർഗിൽ എയർബേസുകൾക്ക് പുറമെ ന്യോമയിലെ ഈ നേട്ടം വടക്കൻ അതിർത്തിയിൽ ശത്രുക്കൾക്ക് മുന്നിൽ ഇന്ത്യയുടെ കൃത്യമായ അധീശത്വം ഉറപ്പാക്കുന്നതാണ്.
