ചിലയിടങ്ങളില്‍ പേര് മാത്രം പറയുമ്പോള്‍ മുഴുവന്‍ പേര് എന്താണെന്ന് ചോദിക്കാറില്ലേ. പക്ഷേ ചില വ്യക്തികളുടെ മുഴുവന്‍ പേര് ചോദിച്ചാല്‍ പണി കിട്ടുക ചോദിക്കുന്ന ആള്‍ക്കായിരിക്കും. പേര് കേള്‍ക്കാന്‍ തന്നെ വേണ്ടിവരും മിനിട്ടുകള്‍. അത്രയ്ക്കും നീളമുള്ള പേരുകള്‍. പേരില്‍ ഫസ്റ്റ് നെയിമും സര്‍നെയിമും നിര്‍ബന്ധമുള്ള രാജ്യങ്ങളുണ്ട്. പക്ഷേ എല്ലായിടത്തും അങ്ങനെയല്ല. ചിലര്‍ക്ക് മിഡില്‍നെയിമും ഉണ്ടാകും. ചില മാതാപിതാക്കള്‍ക്കാണെങ്കില്‍ മക്കള്‍ക്ക് വ്യത്യസ്തമായ ഒരു പേര് വേണമെന്ന് ആഗ്രഹമുണ്ടാകും. അവരില്‍ ചിലരാണെങ്കിലോ ആരും കേള്‍ക്കാത്ത (ആര്‍ക്കും പറയാനും കഴിയാത്ത) പേരുകള്‍ മക്കള്‍ക്കിടും.
ചില പേരുകള്‍ കേള്‍ക്കുമ്പോള്‍ ഇതെന്തൊരു വായില്‍ക്കൊള്ളാത്ത പേരാണെന്ന് പറയുന്നവര്‍ക്ക് അതിലും വലിയ പേരുകള്‍ ഈ ലോകത്തിലുണ്ടെന്ന് അറിയുമായിരിക്കില്ല. പാബ്ലോ പിക്കാസോ, ചാള്‍സ് മൂന്നാമന്‍ രാജാവ്, മൊസാര്‍ട്ട് അങ്ങനെ ലോകപ്രശസ്തരായ പല വ്യക്തികളുടെയും യഥാര്‍ത്ഥ പേര് ഇവയൊന്നും അല്ല. ഇവര്‍ അറിയപ്പെടുന്ന പേരുകളേക്കാള്‍ നീളം കൂടിയ, അക്ഷരാര്‍ത്ഥത്തില്‍ ‘വായില്‍ കൊള്ളാത്ത’ പേരുകളാണ് ഇവര്‍ക്കുള്ളത്. അവയെന്താണെന്ന് നോക്കാം.
പാബ്ലോ പിക്കാസോ
ലോകപ്രശസ്ത സ്പാനിഷ് കലാകാരനായ പിക്കാസോ പാബ്ലോ പിക്കാസോ എന്ന പേരിലാണ് അറിയപ്പെടുന്നത്. പക്ഷേ യഥാര്‍ത്ഥത്തില്‍ ഇദ്ദേഹത്തിന് ഒരു ഡസന്‍ പേരുകളെങ്കിലും ഉണ്ട്. പാബ്ലോ ഡീഗോ ജോസ് ഫ്രാന്‍സിസ്‌കോ ഡി പൗല ജുവാന്‍ നെപ്പോമ്യൂസേനോ മരിയ ഡി ലോസ് റെമഡിയോസ് സിപ്രിയാനോ ഡി ല സാന്റിസിമ ട്രിനിഡഡ് റൂയിസ് വൈ പിക്കാസോ എന്നതാണ് പിക്കാസോയുടെ യഥാര്‍ത്ഥ നാമം.
ചാള്‍സ് മൂന്നാമന്‍ രാജാവ്
ചാള്‍സ് മൂന്നാമന്‍ രാജാവിന്റെ രാജകീയ നാമം ചാള്‍സ് ഫിലിപ്പ് അര്‍തര്‍ ജോര്‍ജ് മൗണ്ട്ബാറ്റണ്‍-വിന്‍ഡ്‌സര്‍ എന്നാണ്.
ഏകണ്‍
‘ലോണ്‍ലി’ ആര്‍ട്ടിസ്റ്റായ ഏകണ്‍ അമേരിക്കയിലാണ് ജനിച്ചത്. ഇദ്ദേഹത്തിന്റെ മാതാപിതാക്കള്‍ സെനഗൽ സ്വദേശികളായിരുന്നു. അലിയണ്‍ ദമല ബൗഗ ടൈം ബോംഗോ പുറു നെക ലു ലു ലു ബദര ഏകണ്‍ തിയാം എന്നാണ് ഇദ്ദേഹത്തിന്റെ മുഴുവന്‍ പേര്.
ബെനിസിയോ ഡെല്‍ ടോറോ
അവാര്‍ഡ് ജേതാവായ ഈ പ്യൂട്ടോറിക്കൻ നടനും നീളമുള്ള പേരുള്ളയാളാണ്. ബെനിസിയോ മോണ്‍സെറാറ്റെ റാഫേല്‍ ഡെല്‍ ടോറോ സാന്‍ചെസ് എന്നാണ് ബെനിസിയോയുടെ മുഴുവന്‍ പേര്.
കീഫര്‍ സതര്‍ലന്‍ഡ്
കനേഡിയന്‍ അഭിനേതാക്കളായ ഡൊണാള്‍ഡ് സതര്‍ലാന്‍ഡും ഭാര്യ ഷേര്‍ളി ഡൗഗ്ലസും അവരുടെ മകന് വളരെ നീളമുള്ള പേരാണ് ഇട്ടത്. കീഫര്‍ വില്യം ഫെഡറിക് ഡാംസേ ജോര്‍ജ് റഫസ് സതര്‍ലന്‍ഡ് എന്നാണ് കീഫര്‍ സതര്‍ലന്‍ഡ് എന്ന പേരില്‍ പ്രശസ്തനായ ഈ നടന്റെ പേര്.
മൊസാര്‍ട്ട്
ഓസ്ട്രിയന്‍ ഗാനരചയിതാവായ മൊസാര്‍ട്ടിന്റെ ശരിക്കും പേര് വോള്‍ഫ്ഗാന്‍ഗസ് അമഡിയസ് മൊസാര്‍ട്ട് എന്നാണ് പലരും ധരിച്ചിരിക്കുന്നത്. എന്നാല്‍ ഇദ്ദേഹത്തിന്റെ ശരിക്കും പേര് ജൊഹനാസ് ക്രിസോസ്റ്റുമസ് വോള്‍ഫ്ഗാന്‍ഗസ് തിയോഫിലിസ് മൊസാര്‍ട്ട് എന്നാണ്.
സീല്‍
കിസ്സ് ഫ്രം റോസ് എന്ന പ്രശസ്ത ഗാനം ആലപിച്ച സീല്‍ എന്ന ഗായകന്‍ ജനിച്ചത് യുകെയിലാണ്. ഇദ്ദേഹത്തിന്റെ മാതാവ് നൈജീരിയക്കാരിയും പിതാവ് ആഫ്രോ-ബ്രസീലിയനുമായിരുന്നു. സീലിന്റെ മുഴുവന്‍ പേര് സീല്‍ ഹെന്റി ഒലുസെഗണ്‍ ഒലുമിഡെ അദിയോല സാമുവല്‍ എന്നാണ്.
സാല്‍വദോര്‍ ദാലി
സ്പാനിഷ് സറിയലിസ്റ്റ് കലാകാരനായ സാല്‍വദോര്‍ ദാലിയുടെ മുഴുവന്‍ പേര് സല്‍വദോര്‍ ഫെലിപ് ജസീന്തോ ദാലി യ് ഡൊമനിക് എന്നാണ്. 1982ല്‍ ദാലിക്ക് മറ്റൊരു റോയല്‍ പദവിയും ലഭിച്ചു. അതിനുശേഷം മാര്‍ക്വിസ് ഓഫ് ദാലി ഡെ പ്യൂബള്‍ ഒന്നാമന്‍ എന്നതും കൂടി അദ്ദേഹത്തിന്റെ പേരിനൊപ്പം ചേര്‍ക്കാന്‍ തുടങ്ങി.
