സംസ്ഥാനത്തേക്ക് കൂടുതൽ വൻകിട നിക്ഷേപങ്ങൾ ആകർഷിക്കുന്നതിനും വ്യവസായിക അടിത്തറ ശക്തമാക്കുന്നതിനുമായി പശ്ചിമ ബംഗാൾ സർക്കാർ പുതിയ വ്യവസായ പ്രോത്സാഹന നയം പ്രഖ്യാപിക്കാൻ ഒരുങ്ങുന്നു. വ്യാപാരാന്തരീക്ഷം കൂടുതൽ സുഗമമാക്കുന്നതിനും (Ease of Doing Business) ചുവപ്പുനാട കുടുക്കുകൾ ഒഴിവാക്കി അതിവേഗ അനുമതികൾ ലഭ്യമാക്കുന്നതിനും മുൻഗണന നൽകുന്നതാണ് പുതിയ നയരേഖ. വൻതോതിൽ പുതിയ തൊഴിലവസരങ്ങൾ സൃഷ്ടിക്കുക എന്ന ലക്ഷ്യത്തോടെയാണ് നിർദ്ദിഷ്ട നിക്ഷേപ നയം തയ്യാറാക്കിയിരിക്കുന്നത്. സംസ്ഥാനത്തിന്റെ സാമ്പത്തിക വളർച്ചയ്ക്ക് വേഗം കൂട്ടുക, വ്യവസായ സൗഹൃദ അന്തരീക്ഷം ഒരുക്കുക, ആഭ്യന്തര-വിദേശ കമ്പനികളെ ബംഗാളിലേക്ക് ആകർഷിക്കുക എന്നിവയ്ക്കായിരിക്കും പുതിയ നയത്തിൽ പ്രധാന പരിഗണന ലഭിക്കുക. വ്യവസായ വികസനത്തിന് ആവശ്യമായ അടിസ്ഥാന സൗകര്യങ്ങൾ മെച്ചപ്പെടുത്തുന്നതും സർക്കാരിന്റെ പ്രധാന ലക്ഷ്യങ്ങളിലൊന്നായിരിക്കും.
നിക്ഷേപകരെ ആകർഷിക്കാൻ നിരവധി സാമ്പത്തിക ആനുകൂല്യങ്ങളും പുതിയ നയത്തിൽ ഉൾപ്പെടുമെന്നാണ് റിപ്പോർട്ടുകൾ. ചെറുകിട, ഇടത്തരം വ്യവസായങ്ങൾക്ക് പലിശ സബ്സിഡി, സംസ്ഥാന ജിഎസ്ടി തിരിച്ചുനൽകൽ, ജീവനക്കാരുടെ ഇപിഎഫ് വിഹിതത്തിൽ സർക്കാർ സഹായം തുടങ്ങിയവ പരിഗണനയിലുണ്ട്. സ്ത്രീകളെയും ട്രാൻസ്‌ജെൻഡർ വിഭാഗത്തിൽപ്പെട്ടവരെയും കൂടുതൽ നിയമിക്കുന്ന സ്ഥാപനങ്ങൾക്ക് പ്രത്യേക ആനുകൂല്യങ്ങൾ നൽകാനും പദ്ധതിയുണ്ട്. പുരുഷ ജീവനക്കാരുടെ ഇപിഎഫ് വിഹിതത്തിൽ 50 ശതമാനം സഹായം നൽകുമ്പോൾ സ്ത്രീകൾക്കും ട്രാൻസ്‌ജെൻഡർ ജീവനക്കാർക്കും ഇത് 100 ശതമാനമാക്കാനാണ് നിർദേശം. വ്യവസായ അനുമതികൾ വേഗത്തിലാക്കാൻ ഏകജാലക ഓൺലൈൻ സംവിധാനവും ഗവേഷണ-വികസന പ്രവർത്തനങ്ങൾക്ക് സാമ്പത്തിക സഹായവും നയത്തിന്റെ ഭാഗമാകുമെന്നാണ് സൂചന.
ഭൂമി ലഭ്യതയിലെ പ്രശ്നങ്ങൾ പരിഹരിക്കുന്നതിനും പുതിയ നയം പ്രാധാന്യം നൽകും. വ്യവസായ ആവശ്യങ്ങൾക്കായി ഭൂമി നേരിട്ട് വാങ്ങുന്നതിനും വിവിധ ഭൂമികൾ ഒരുമിപ്പിച്ച് വലിയ വ്യവസായ മേഖലകൾ സൃഷ്ടിക്കുന്നതിനും പദ്ധതിയുണ്ട്. ഉപയോഗിക്കാതെ കിടക്കുന്ന സർക്കാർ വ്യവസായ ഭൂമികൾ തിരിച്ചുപിടിച്ച് പുതിയ സംരംഭങ്ങൾക്ക് നൽകാനും ആലോചനയുണ്ട്. ഭക്ഷ്യസംസ്കരണം, തുണിത്തരങ്ങൾ, ഇലക്ട്രിക് വാഹനങ്ങൾ, സെമികണ്ടക്ടറുകൾ, ഗ്രീൻ ഹൈഡ്രജൻ, പ്രതിരോധ ഉൽപ്പാദനം, ഫാർമസ്യൂട്ടിക്കൽസ്, ആഭരണ നിർമ്മാണം, ഡാറ്റാ സെന്ററുകൾ തുടങ്ങിയ മേഖലകൾക്ക് പ്രത്യേക പരിഗണന ലഭിക്കുമെന്നാണ് റിപ്പോർട്ടുകൾ. പിന്നാക്ക ജില്ലകളിൽ വ്യവസായങ്ങൾ ആരംഭിക്കുന്നവർക്ക് അധിക ആനുകൂല്യങ്ങൾ നൽകുന്നതും പരിഗണിക്കുന്നുണ്ട്. കാർഷിക മേഖലയുമായി ബന്ധപ്പെട്ട വ്യവസായങ്ങൾക്കും സ്റ്റാർട്ടപ്പുകൾക്കും കയറ്റുമതി സ്ഥാപനങ്ങൾക്കും പുതിയ അവസരങ്ങൾ സൃഷ്ടിക്കുകയാണ് ലക്ഷ്യം. മുഖ്യമന്ത്രി സുവേന്ദു അധികാരി നവംബർ അഞ്ചിന് നബന്നയിൽ നയം പ്രഖ്യാപിക്കുമെന്നാണ് അറിയിച്ചിരിക്കുന്നത്. പുതിയ നയം പ്രഖ്യാപിക്കുന്നതോടെ ബംഗാളിലേക്ക് കൂടുതൽ നിക്ഷേപങ്ങൾ എത്തുമെന്നും യുവാക്കൾക്ക് പുതിയ തൊഴിലവസരങ്ങൾ ലഭിക്കുമെന്നുമാണ് വ്യവസായ ലോകത്തിന്റെ പ്രതീക്ഷ.
