സമാജ്‌വാദി പാർട്ടി നേതാവും ഉത്തർപ്രദേശ് മുൻ മന്ത്രിയുമായ അസം ഖാന്റെ എൻഫോഴ്‌സ്‌മെന്റ് ഡയറക്ടറേറ്റ് (ഇഡി) അറസ്റ്റിനെതിരായ ഹർജി അലഹബാദ് ഹൈക്കോടതിയിലേക്ക് മാറ്റി സുപ്രീംകോടതി. ചീഫ് ജസ്റ്റിസ് സൂര്യകാന്ത്, ജസ്റ്റിസ് ജോയ്മല്യ ബാഗ്ചി എന്നിവരടങ്ങിയ ബെഞ്ചാണ് നവംബർ അഞ്ചിന് ഉത്തരവിട്ടത്. ഹർജിയുടെ അസൽ രേഖകൾ രണ്ട് ദിവസത്തിനകം ഹൈക്കോടതിക്ക് കൈമാറാനും കേസ് നവംബർ 16ന് ഡിവിഷൻ ബെഞ്ചിന് മുന്നിൽ പരിഗണനയ്ക്ക് എത്തിക്കാനും കോടതി നിർദേശിച്ചു. അന്നുതന്നെ അസം ഖാന്റെ ഇടക്കാല ആശ്വാസത്തിനായുള്ള അപേക്ഷയും പരിഗണിക്കണമെന്ന് ഹൈക്കോടതിയോട് ആവശ്യപ്പെട്ടിട്ടുണ്ട്. അറസ്റ്റിന്റെ നിയമസാധുതയെക്കുറിച്ച് സുപ്രീംകോടതി ഈ ഘട്ടത്തിൽ അഭിപ്രായം രേഖപ്പെടുത്തിയില്ല.
ഒക്ടോബർ 29ന് ഇരട്ട പാൻ കാർഡ് കേസിൽ അസം ഖാനും മകൻ അബ്ദുല്ല അസം ഖാനും ലഭിച്ച ജാമ്യത്തിന് പിന്നാലെയാണ് ഇഡി അസം ഖാനെ വീണ്ടും അറസ്റ്റ് ചെയ്തത്. ഒക്ടോബർ 31നായിരുന്നു അറസ്റ്റ്. റാംപൂർ ജയിലിൽ നിന്ന് പുറത്തിറങ്ങിയതിന് പിന്നാലെ ഇഡി കസ്റ്റഡിയിലെടുത്ത അദ്ദേഹത്തെ നവംബർ ഒന്നിന് ഗാസിയാബാദിലെ പ്രത്യേക പി.എം.എൽ.എ കോടതി 14 ദിവസത്തെ ജുഡീഷ്യൽ കസ്റ്റഡിയിൽ വിട്ടു. മുഹമ്മദ് അലി ജൗഹർ ട്രസ്റ്റിന്റെയും അതിന്റെ കീഴിലുള്ള മുഹമ്മദ് അലി ജൗഹർ സർവകലാശാലയുടെയും സാമ്പത്തിക ഇടപാടുകളുമായി ബന്ധപ്പെട്ട ആരോപണങ്ങളാണ് ഇഡി അന്വേഷിക്കുന്നത്. ഉത്തർപ്രദേശ് പൊലീസ് 2019ൽ രജിസ്റ്റർ ചെയ്ത കേസുകളുമായി ബന്ധപ്പെട്ടാണ് കള്ളപ്പണം വെളുപ്പിക്കൽ അന്വേഷണം മുന്നോട്ടുപോകുന്നത്. അറസ്റ്റും ജുഡീഷ്യൽ കസ്റ്റഡി ഉത്തരവും റദ്ദാക്കണമെന്നും കേസിൽ തീരുമാനമാകുന്നതുവരെ ജാമ്യം അനുവദിക്കണമെന്നുമാണ് അസം ഖാന്റെ ആവശ്യം.
അസം ഖാനുവേണ്ടി ഹാജരായ മുതിർന്ന അഭിഭാഷകൻ കപിൽ സിബൽ അറസ്റ്റിന് പിന്നിൽ ദുരുദ്ദേശ്യമുണ്ടെന്നും ഇത് രാഷ്ട്രീയ പീഡനമാണെന്നും കോടതിയിൽ വാദിച്ചു. ഒരൊറ്റ ഇ.സി.ഐ.ആറിന്റെ അടിസ്ഥാനത്തിൽ 28 കേസുകൾ ഉൾപ്പെടുത്തിയിട്ടുണ്ടെന്നും 2006ലെ സംഭവങ്ങളുമായി ബന്ധപ്പെട്ട ആരോപണങ്ങളിൽ 2019ലാണ് എഫ്.ഐ.ആർ രജിസ്റ്റർ ചെയ്തതെന്നും അദ്ദേഹം ചൂണ്ടിക്കാട്ടി. ആടുകളും പശുക്കളും വരെ കുറ്റകൃത്യത്തിലൂടെ ലഭിച്ച സ്വത്തായി ചിത്രീകരിക്കുന്നുവെന്നായിരുന്നു സിബലിന്റെ മറ്റൊരു വിമർശനം. വാദങ്ങളിൽ ചിലത് പ്രസക്തമായിരിക്കാമെന്ന് ചീഫ് ജസ്റ്റിസ് നിരീക്ഷിച്ചെങ്കിലും കേസിന്റെ ഉള്ളടക്കത്തെക്കുറിച്ച് അഭിപ്രായം പറയാൻ കോടതി തയ്യാറായില്ല. ഹർജി ഭേദഗതി ചെയ്യാനും കൂടുതൽ രേഖകൾ സമർപ്പിക്കാനും അസം ഖാന് സുപ്രീംകോടതി അനുമതി നൽകിയിട്ടുണ്ട്. ഇനി അറസ്റ്റിനെതിരായ വാദങ്ങളും ഇടക്കാല ജാമ്യാപേക്ഷയും അലഹബാദ് ഹൈക്കോടതിയാണ് പരിഗണിക്കുക.
