തിരുവനന്തപുരം : നിയമസഭയിൽ ഇന്നലെ ഉണ്ടായ ഭരണ-പ്രതിപക്ഷ സംഘർഷത്തിൽ എംഎൽഎമാർക്കെതിരെയും വാച്ച് ആൻഡ് വാർഡിനെതിരെയും കേസെടുത്ത് പോലീസ്. രണ്ട് കേസുകളാണ് മ്യൂസിയം പോലീസ് രജിസ്റ്റർ ചെയ്തത്. ചാലക്കുടി എംഎൽഎ സനീഷിൻറെ പരാതിയിൽ എച്ച്. സലാം, സച്ചിൻദേവ്, അഡി. ചീഫ് മാർഷൽ മൊയ്ദ്ദീൻ എന്നിവർക്കെതിരെയാണ് എഫ്ഐആർ. മർദ്ദിക്കുക, പരിക്കേൽപ്പിക്കുക തുടങ്ങിയ വകുപ്പുകൾ പ്രകാരം ജാമ്യം ലഭിക്കാവുന്ന വകുപ്പുകളാണ് ഭരണപക്ഷ എംഎൽഎമാർക്കെതിരെ ചുമത്തിയത്.
വനിത വാച്ച് ആൻറ് വാർഡ് നൽകിയ പരാതിയിലും കേസെടുത്തിട്ടുണ്ട്. ചീഫ് മാർഷൽ ഓഫീസിൽനിന്ന് സ്പീക്കറുടെ ഓഫീസിലേക്കു പോകുമ്പോൾ തന്നെയും ചീഫ് മാർഷലിനെയും പ്രതിപക്ഷ എംഎൽഎമാർ അസഭ്യം വിളിച്ച് ആക്രമിച്ചതായി വനിതാ വാച്ച് ആൻഡ് വാർഡിന്റെ പരാതിയിൽ പറയുന്നു. റോജി എം ജോൺ, അനൂപ് ജേക്കബ്, പി കെ. ബഷീർ, ഉമാ തോമസ്, കെ.കെ. രമ, ഐസി ബാല കൃഷ്ണൻ എന്നിവർക്കെതിരെ ജാമ്യമില്ലാ വകുപ്പുകളാണ് ചുമത്തിയത്. ഉദ്യോഗസ്ഥരെ ആക്രമിക്കൽ, പരിക്കേൽപ്പിക്കൽ, ഭീഷണി, സംഘം ചേർന്നുള്ള ആക്രമണം എന്നിവയാണ് വകുപ്പുകൾ.
അതേസമയം പ്രതിപക്ഷ എംഎൽഎമാർക്കെതിരെ കള്ളക്കേസാണ് പോലീസ് എടുത്തതെന്ന് പ്രതിപക്ഷ നേതാവ് കുറ്റപ്പെടുത്തി. ഉപരോധസമരം നേരിടാനുള്ള വാച്ച് ആൻഡ് വാർഡിന്റെ ശ്രമമാണ് സംഘർഷത്തിലേക്ക് നയിച്ചത്. സ്പീക്കറുടെ ഓഫീസിനു മുന്നിൽ നടന്ന പ്രതിഷേധത്തിൽ പ്രതിപക്ഷ എംഎൽമാർക്ക് പരുക്കേറ്റിരുന്നു.












