ഉത്തർപ്രദേശിലെ ഗ്രേറ്റർ നോയിഡയിൽ 27-കാരിയായ വനിതാ സബ് ഇൻസ്പെക്ടറെ സർക്കാർ ക്വാർട്ടേഴ്സിലെ ശുചിമുറിയിൽ മരിച്ച നിലയിൽ കണ്ടെത്തി. ജാർച്ച പോലീസ് സ്റ്റേഷനിലെ സബ് ഇൻസ്പെക്ടറായ രശ്മി ഗൗതമാണ് മരിച്ചത്. ഉത്തർപ്രദേശ് പോലീസിലെ 2023 ബാച്ച് ഉദ്യോഗസ്ഥയായിരുന്നു രശ്മി. ചൊവ്വാഴ്ച രാവിലെയായിരുന്നു സഹപ്രവർത്തകരെയും കുടുംബത്തെയും നടുക്കിയ ഈ ദാരുണ സംഭവം പുറത്തറിഞ്ഞത്.
ചൊവ്വാഴ്ച രാവിലെ പതിവുപോലെ രശ്മിയുടെ പിതാവ് മകളെ ഫോണിൽ വിളിച്ചെങ്കിലും പ്രതികരണമൊന്നും ഉണ്ടായിരുന്നില്ല. തുടർച്ചയായി വിളിച്ചിട്ടും ഫോൺ എടുക്കാതിരുന്നതോടെ ആശങ്കയിലായ പിതാവ് ഉടൻ തന്നെ ജാർച്ച പോലീസ് സ്റ്റേഷനിലെ രശ്മിയുടെ സഹപ്രവർത്തകരെ വിവരമറിയിക്കുകയായിരുന്നു.
വിവരം ലഭിച്ചയുടൻ പോലീസ് ഉദ്യോഗസ്ഥർ സ്റ്റേഷൻ വളപ്പിലുള്ള സർക്കാർ ക്വാർട്ടേഴ്സിലെത്തി പരിശോധന നടത്തി. അകത്തുനിന്ന് പൂട്ടിയ നിലയിലായിരുന്ന വാതിൽ തകർത്ത് ഉദ്യോഗസ്ഥർ ഉള്ളിൽ കടന്നപ്പോഴാണ് ശുചിമുറിയിൽ രശ്മിയെ മരിച്ച നിലയിൽ കണ്ടെത്തിയത്. ഉടൻ തന്നെ ആശുപത്രിയിലെത്തിച്ചെങ്കിലും മരണം സംഭവിച്ചിരുന്നതായി ഡോക്ടർമാർ സ്ഥിരീകരിച്ചു.
ഹൃദയാഘാതമാണ് മരണകാരണമെന്നാണ് പ്രാഥമിക നിഗമനമെന്ന് ജാർച്ച പോലീസ് സ്റ്റേഷൻ ഇൻ-ചാർജ് കൈലാഷ് നാഥ് അറിയിച്ചു. രശ്മിയുടെ ശരീരത്തിൽ ബലപ്രയോഗം നടന്നതിന്റെയോ പരിക്കേറ്റതിന്റെയോ പാടുകളൊന്നും കണ്ടെത്തിയിട്ടില്ല. എങ്കിലും മരണത്തിന്റെ യഥാർത്ഥ കാരണം പോസ്റ്റ്മോർട്ടം റിപ്പോർട്ട് ലഭിച്ചതിന് ശേഷം മാത്രമേ പൂർണ്ണമായി വ്യക്തമാകൂ എന്ന് പോലീസ് പറഞ്ഞു. ഇൻക്വസ്റ്റ് നടപടികൾ പൂർത്തിയാക്കി മൃതദേഹം പോസ്റ്റ്മോർട്ടത്തിനായി അയച്ചിട്ടുണ്ട്. സംഭവത്തിൽ പോലീസ് അസ്വാഭാവിക മരണത്തിന് കേസെടുത്ത് വിശദമായ അന്വേഷണം ആരംഭിച്ചു.











